كوكشەتاۋدا مامىر ايىنان باستاپ شىبىن-شىركەي مەن ماساعا قارسى دەزينفەكتسيالىق شارالار جۇرگىزىلۋدە. ول ءۇشىن سۋىق جانە ىستىق تۇماندى تەرموگەنەراتور, اەروزولدى شاشىراتقىشتار قولدانىلىپ جاتىر.
بيىل قالاداعى ساياباقتاردا ماساعا قارسى دەزينفەكتسيانى جۇرگىزۋ تەندەر بويىنشا «دەزينفەكتسيا كوكشەتاۋ» كومپانياسىنا بۇيىردى. ولار ءتيىستى جۇمىستاردى 4 مامىردان باستاعان. تۇرعىندار ماسامەن كۇرەسۋ شارالارىنىڭ ناتيجەلى ەكەندىگىن راستاپ وتىر.
دەزينفەكتسيالاۋ جۇمىستارىن جۇرگىزەتىن مەكەمە قالاداعى 25 نىسانعا جاۋاپتى. ونىڭ ىشىندە ورتالىق ساياباق, تەمىرجولشىلار اللەياسى, قوپا كولىنىڭ جاعالاۋى بار. ال جەرتولەلەر مەن تۇرعىن ءۇي اۋلالارىن پاتەر يەلەرى كووپەراتيۆتەرى قاداعالايدى.
– دەزينفەكتسيا شارالارىنىڭ كەلەسى كەزەڭىن ماۋسىمنىڭ بىرىندە باستايمىز. ەگەر تۇرعىنداردىڭ تاراپىنان ماساعا بايلانىستى شاعىم تۇسسە, بۇل شارالاردى قايتا جاسايمىز. ءبىز شىبىن-شىركەيلەردى تسيپەرمەترينمەن ۋلايمىز. بۇل بەلگىلى پرەپارات. الايدا ونى سۋ ايدىندارىنا قولدانبايمىز. بارلىق جۇمىس ادامدار جوق كەزدە, تاڭەرتەڭ جۇرگىزىلەدى. ءتيىستى شارالار مامىر مەن قىركۇيەك ارالىعىندا وتەدى,–دەيدى «دەزينفەكتسيا كوكشەتاۋ» سەرىكتەستىگى ديرەكتورىنىڭ ورىنباسارى بوتا اليەۆا.
مامانداردىڭ ايتۋىنشا, ولار شىبىن-شىركەيمەن كۇرەسۋ جۇمىستارىن جۇرگىزۋگە ءاماندا دايىن.
اقمولا وبلىسى