پەتروپاۆل قالاسى اكىمدىگىنىڭ اۆتوموبيل جولدارى ءبولىمىنىڭ باستىعى باقىت ءىلياسوۆتىڭ ايتۋىنا قاراعاندا, بيىل قىزىلجاردىڭ 75 كوشەسى مەن ساياجايلار جانە قورىمدارعا اپاراتىن جولدارى جوندەلمەكشى. ال بىلتىر 50 كوشە جوندەلگەن ەكەن. وسى ماقساتقا بيۋدجەتتەن 704 ملن تەڭگە بولىنگەن. جوندەۋ جۇمىستارىنىڭ جالپى اۋماعى 300 مىڭ شارشى مەتردى قۇرايدى. جوندەلەتىندەردىڭ قاتارىنا قالانىڭ قاق ورتاسىنداعى م.جۇماباەۆ, م.گوركي اتىنداعى ەڭ ۇلكەن كوشەلەر دە ەنگىزىلىپتى.
ماعجان اتىنداعى ماگيسترالدى كوشەنىڭ جوندەلگەنىنە كوپ بولا قويعان جوق ەدى, بىراق قازىردىڭ وزىندە شۇقاناقتارى كوبەيىپ كەتكەن. ونىڭ ۇستىنە بۇل كوشەنىڭ بويىنداعى جاياۋلار جۇرەتىن تروتۋار اباي قيىلىسىنان ءارى مۇلدە جوق. اقشاسى قولدى بولعانعا ۇقسايدى. بيىلعى جوندەۋدە قالا تۇرعىندارى وسى ماسەلە ەسكەرىلەر دەگەن ۇمىتتە. جالپى, ماعجان كوشەسى بۇرىنعى «كوممۋنيستيچەسكي» اتىنداعى داڭعىلدى يەلەنىپ, قالانى قاق جاراتىن ەڭ ۇلكەن كوشەلەردىڭ ءبىرى بولعان ەدى. الايدا ءبىر پىسىقاي اكىمنىڭ تۇسىندا ونىڭ سولتۇستىك جارتىسى شوقان ءۋاليحانوۆتىڭ اتىنا بەرىلگەن. باسقا اتاۋلاردى يەلەنگەن جۇزدەگەن كوشە تۇرعاندا قازاقتىڭ ەكى ارىسىنا ءبىر كوشەنى ءبولىپ بەرىپ, ءماز بولىپ كەتكەن ول اكىم.
سونىمەن بىرگە, بيىل 73 اۋلانىڭ جولدارى جوندەلمەكشى. قالا ورتالىعىنداعى كەيبىر اۋلالار جىلدار بويى جوندەلمەي, قازان-شۇڭقىرلارى قاپتاپ جاتاتىن. ەندى سوندايلارعا دا جوندەۋ جۇرگىزۋدى جوسپارعا ەنگىزگەنى قالا اكىمىنىڭ حالىققا جانشىرلىعىن كورسەتىپ تۇر. اۋلالاردىڭ جولدارى عانا جوندەلىپ قويماي, بەينەباقىلاۋ كامەرالارى دا ورناتىلاتىندىعى كوڭىلگە قۋانىش ۇيالاتۋدا.
قالا تۇرعىندارى قالا اكىمىمەن بولعان كەزدەسۋدە م.جۇماباەۆتان باسقا دا 16 كوشەگە تروتۋارلار سالۋدى وتىنگەن ەكەن. بيىعى جوندەۋ جۇمىستارىندا وسى وتىنىشتەر دە ەسكەرىلگەن ەكەن.
قىزىلجار