كوروناۆيرۋس پاندەمياسىنا بايلانىستى ۋاقىتشا توقتاتىلعان فۋتبولدان يسپانيا بىرىنشىلىگى 8 ماۋسىمنان باستاپ قايتا جالعاساتىن بولدى. بۇل تۋرالى يسپانيانىڭ پرەمەر-ءمينيسترى مالىمدەدى.
پەدرو سانچەس جەرگىلىكتى باق وكىلدەرىنە بەرگەن سۇحباتىندا يسپانيا كارانتين تالاپتارىن جوعارى دەڭگەيدە ساقتاعانىن, سونىڭ ارقاسىندا كەلەسى ايدان باستاپ تىرشىلىك قايتا جانداناتىنىن حابارلادى. سونداي-اق 8 ماۋسىمنان باستاپ ەل بىرىنشىلىگىن وتكىزۋىنە رۇقسات بەرىلگەنىن دە جانكۇيەر قاۋىمعا جەتكىزدى.
لا ليگا ويىندارى ىندەتكە بايلانىستى ۋاقىتشا توقتاتىلعانعا دەيىن تۋرنير كەستەسىندە «بارسەلونا» كلۋبى 58 ۇپايمەن كوش باسىندا كەلەدى. كاتالونيا كومانداسىنان ەكى ۇپاي قالىپ كەلە جاتقان «رەال» ەكىنشى ورىندا. ال ۇزدىك ۇشتىكتى 47 ۇپايمەن «سەۆيليا» قورىتىندىلاپ تۇر. كوماندالار بۇگىنگە دەيىن 27 تۋر وتكىزگەن.