اسا داۋلەتتى كاسىپكەردىڭ ءزاۋلىم ۇيىنە كۇتۋشى بولىپ جۇمىسقا ورنالاسقان وتىز ءبىر جاستاعى زەينەش ءبىر قاراعاندا سىرتقى سىمباتىمەن عانا ەمەس, ادەپتىلىگىمەن دە كوز تارتاتىن. مىنەزى وتە سالماقتى, وزىنە تاپسىرىلعان جۇمىستى ۇقىپتى اتقاراتىن قىزمەتشى بىردەن ءۇي يەلەرىنىڭ كوڭىلىنەن شىققان ەدى. وزبەكستاننان جۇمىس ىزدەپ كەلگەن جاس كەلىنشەكتىڭ ءوز ەلىندە ەكى بالاسى جانە قارت اناسى بار ەكەنىن ەستىگەن اقجارقىن جاندار وعان ءتىپتى اياۋشىلىق ءبىلدىرىپ, مىڭ جىلعى تانىستارىنداي قۇلاي سەنگەن. سوندىقتان دا, كەز-كەلگەن ۋاقىتتا ەرلى-زايىپتىلار ءوز باسپانالارىنا بوتەن ايەلدى قالدىرىپ كەتە بەرگەندى ادەتكە اينالدىرعان بولاتىن.
وكىنىشكە وراي, ءۇي جۇمىسىمەن اينالىساتىن ايەل ەكىجۇزدىلىگىمەن قوسا, باۋكەسپە ۇرى بولىپ شىقتى جانە ونىڭ بۇل “كاسىپتى” مەڭگەرگەنىنە دە بىرقاتار ۋاقىت ءوتىپتى. “بايلار دا جىلايدى” دەمەكشى, تالاي داۋلەتتىلەردىڭ ەسىگىنە يمەنىپ كىرىپ, ال, كەتەرىندە ولاردى قىمبات دۇنيەسىنەن جۇرداي ەتىپ, جىلارمان جاعدايدا قالدىرىپ زىم-زيا جوعالاتىن زەينەش, بۇل جولى دا سول سۇيىكتى “ادەتىنە” باسادى. بەس اي جۇمىس ىستەپ, جاقۇت جۇزىكتەن باستاپ, قۇندى ىشىكتەردىڭ, “كوك” قاعازداردىڭ قايدا جاسىرىلعانىن ءجىتى باقىلاپ ءجۇرىپ, انىقتاعان زەينەش ءوز “وپەراتسياسىن” ءسويتىپ ءساتتى اياقتاعان.
ەكى بىردەي قۇندىز ىشىكتى, قىمبات باعالى التىن بۇيىمداردى جانە وزگە دە قىمبات دۇنيەلەردى قولتىعىنا قىسىپ, قاراسىن مۇلدەم ۇزۋگە نيەتتەنگەن ۇرى كەلىنشەك ءبارىبىر الىسقا ۇزاي المادى. الماتى قالاسىنداعى جەتىسۋ اۋداندىق ىشكى ىستەر دەپارتامەنتى باستىعىنىڭ ورىنباسارى دەنيس لوسكۋتوۆتىڭ ايتۋىنشا, كۇدىكتى تونالعان زاتتاردى ساتىپ تۇرعان كەزىندە ۇستالعان. وزبەكستان ازاماتشاسى وسىعان دەيىن بەس رەت وسىنداي سيپاتتاعى قىلمىسقا بارىپ, وزگەلەردىڭ دۇنيە-مۇلكىن توناعانىن اشىق ايتىپ, مويىنداعان.
باقىت بالعارينا.
الماتى.