جىل باسىنان بەرى سولتۇستىك قازاقستان وبلىسىندا 76 ەسىرتكى قىلمىسى تىركەلدى. زاڭسىز اينالىمنان 4,5 كيلوگرام ءتۇرلى ەسىرتكى زاتى, ونىڭ ىشىندە ءبىر كيلوگرامداي سينتەتيكالىق ەسىرتكى الىندى.
سونداي-اق اعىمداعى جىلى جەدەل ۋاكىلدەر سينتەتيكالىق پرەپاراتتار ساتقان ەكى ينتەرنەت-دۇكەننىڭ جۇمىسىن توقتاتتى. قازىرگى ۋاقىتتا اتالعان فاكتىلەر بويىنشا سوتقا دەيىنگى تەرگەۋ جۇرگىزىلۋدە.
سقو پوليتسيا دەپارتامەنتى ەسىرتكى قىلمىسىنا قارسى ءىس-قيمىل باسقارماسىنىڭ باستىعى پوليتسيا پولكوۆنيگى جاندوس باسىباەۆتىڭ ايتۋىنشا, جەدەل ۋاكىلدەر ەسىرتكىمەن بايلانىستى قىلمىستاردى انىقتاۋ جانە جولىن كەسۋ جۇمىسىنان بولەك, بارلىق قول جەتىمدى ارنالار بويىنشا الدىن الۋ جۇمىسىن دا جۇرگىزەدى.
اتاپ ايتقاندا, الدىن الۋ جۇمىسى بەلگىلى الەۋمەتتىك جەلىلەردە جۇرگىزىلەدى. «جىل باسىنان مەكتەپ وقۋشىلارىمەن جانە جاستارمەن ەسىرتكىگە قارسى كۇرەس باعىتىندا ءدارىس, كەزدەسۋ مەن اڭگىمە تۇرىندە 130-دان استام ءىس-شارا وتكىزىلدى. كارانتيندىك شارالار كۇندەلىكتى جۇمىس رەجىمىن وزگەرتتى, الايدا, «قامقور» ەرىكتىلەر كلۋبى كومەك كورسەتۋدەن قول ۇزگەن جوق. ناشاقورلىق تاقىرىبىنا ارنالعان بەينەروليكتەر الەۋمەتتىك جەلى ءۇشىن مەملەكەتتىك جانە ورىس تىلدەرىندە ارنايى دايىندالىپ جاسالدى. ول سقو پوليتسيا دەپارتامەنتى رەسمي اككاۋنتارىنىڭ پاراقشالارىندا جاريالانىپ, جەلى قولدانۋشىلارىنىڭ وڭ پىكىرىنە يە بولدى. الەۋمەتتىك جەلىدەگى جۇمىستان بولەك, ەرىكتىلەر ەسىرتكى ساۋدالايتىن ينتەرنەت-رەسۋرستاردىڭ مەكەنجايى سالىنعان ەسىرتكى گراففيتيىن بوياۋعا كومەكتەسىپ تۇرادى»,- دەدى جاندوس باسىباەۆ.
پەتروپاۆل