شاحماتتان الەم چەمپيونى, نورۆەگيالىق ماگنۋس كارلسەننىڭ ۇيىمداستىرۋىمەن ءوتىپ جاتقان جۇلدە قورى 1 ميلليون اقش دوللارىن قۇرايتىن ونلاين-تۋرنيرلەر سەرياسى جالعاسۋدا.
كەشە «Lindores Abbey Rapid Challenge» دەپ اتالاتىن ءتۋرنيردىڭ تۇساۋى كەسىلدى. ايتۋلى دودا ماگنۋس كارلسەننەن بولەك, امەريكالىق حيكارۋ ناكامۋرا مەن ۋەسلي سو, يراندىق اليرەزا فيرۋجا, رەسەيلىك الەكساندر گريششۋك, سەرگەي كارياكين, دانيل دۋبوۆ, ارمەنيالىق لەۆون ارويان, پولشالىق يان-كريشتوف دۋدا, قىتايلىق ليجەن دين, ۆەي ي جانە يۋي ياني سىندى ويىنشىلار ونەر كورسەتۋدە.
العاشقى ءتورت تۋردان كەيىن ءۇش ۇپايدان جيعان ءتورت شاحماتشى كوش باستادى. ولار – حيكارۋ ناكامۋرا, ماگنۋس كارلسەن, سەرگەي كارياكين جانە ۋەسلي سو. سولاردان جارتى ۇپايى كەم ليجەن دين بەسىنشى ورىندى يەلەنۋدە. التىنشى جانە جەتىنشى ساتىعا الەكساندر گريششۋك پەن لەۆون ارويان جايعاستى. ولاردىڭ قورجىنىندا ەكى ۇپايدان بار. سەگىزىنشى ورىنداعى يۋي ياني (كيتاي) 1,5 ۇپايدى ەنشىلەۋدە. ال قالعان ويىنشىلار ازىرگە جالقى ۇپايدى قاناعات تۇتۋدا.
ەستەرىڭىزگە سالا كەتەيىك, العاشقى كەزەڭدە گروسسمەيستەرلەر اينالمالى جۇيە بويىنشا راپيدتەن 11 پارتيا وتكىزەدى. سولاردىڭ اراسىنان وزىپ شىققان سەگىز ساڭلاق پلەي-وفف سايىستارىندا باق سىناپ, ءوزارا باسەكەلەر ارقىلى جارىس جەڭىمپازىن انىقتايدى.