پاۆلودار وبلىسى باس مەملەكەتتىك سانيتارلىق دارىگەرىنىڭ قاۋلىسىنا كەزەكتى وزگەرتۋلەر ەنگىزىلدى, دەپ حابارلادى pavlodarnews.kz ءتىلشىسى.
№7 قاۋلىداعى وزگەرىستەر 17 مامىر كۇنى ساعات 00:00-دەن باستاپ كۇشىنە ەنەدى.
-سانيتارلىق نورمالاردى ساقتاي وتىرا ءدىني ماقساتتاعى نىساندارعا جۇمىسىن ساعات 07:00-دەن 20:00-گە دەيىن جاساۋعا رۇقسات بەرىلەدى. وزەن كولىگى قىزمەتىنە (قىدىرۋ تەپلوحودتارى, بارجالار, كاتەرلەر ت.ب.) ساعات 07:00-دەن 21:00-گە دەيىن رۇقسات بەرىلەدى. بۇنىڭ بارىندە جالپى پايدالى اۋماقتىڭ 30 پايىزدان كوپ ەمەس اۋماعىن تولتىرۋعا رۇقسات. كەلۋشىلەر اراسىندا قاشىقتىقتى ساقتاۋ ماقساتىندا 1,5 مەتردەن كەم ەمەس بەلگىنى سالۋ, بەتپەردەلىك رەجيمدى ساقتاۋ, 3 رەتتەن كەم ەمەس رەت جەلدەتۋ, دەزينفەكتسيالىق رەجيمدى كۇشەيتۋ تالابىن ساقتاۋ كەرەك, - دەلىنگەن قاۋلىدا.
سونىمەن قاتار سانيتارلىق-دەزينفەكتسيالىق شارالار مەن الەۋمەتتىك قاشىقتىقتى كۇشەيتە وتىرا, قوناقۇيلەر كەشەندەرى جۇمىسىنا كىرىسەدى. وعان قوسا, ءبىر ۋاقىتتا كەلۋشىلەردىڭ سانىن 30 ادامنان كوبەيتپەي شەكتەۋ ارقىلى, قوعامدىق تاماقتانۋ نىساندارىنا جۇمىسىن ساعات 8:00-دەن 21:00-گە دەيىن جالعاستىرۋعا رۇقسات.
-تاماقتانۋ ورىندارىندا ۇجىمنىڭ ءبىر رەتتىك قولعاپتار مەن بەتپەردەنى پايدالانۋى, بەتپەردەنى ءار 3 ساعات سايىن 1 رەت اۋىستىرىپ وتىرۋى, سانيتايزەرلەر ورناتۋى, كۇشەيتىلگەن دەزينفەكتسيالىق رەجيمدى ەنگىزۋى, ءجىتى رەسپيراتورلىق ينفەكتسياسى بەلگىلەرى بار قىزمەتكەردى جۇمىسقا جىبەرمەۋى, بولمەلەردى جۇمىس اۋىسىمى بىتكەن سوڭ نەمەسە ءار 6 ساعات سايىن دەزينفەكتسيالىق قۇرالداردى پايدالانۋ ارقىلى جەلدەتىپ, ىلعالدى جيناۋى, ۇستەلدەر اراسىندا 2 مەتردەن كەم ەمەس قاشىقتىقتى ساقتاۋى قاجەت, - دەلىنگەن قاۋلىدا.
الەۋمەتتىك قاشىقتىقتى جانە سانيتارلىق-دەزينفەكتسيالىق شارالاردى كۇشەيتە وتىرا, اشىق اۋادا جۇمىس ىستەيتىن جازعى الاڭى بار قوعامدىق تاماقتانۋ ورىندارى ساعات 10:00-دەن 21:00-گە دەيىن ىستەيدى.