ەلوردادا قوعامدىق كولىك قوزعالىسىنىڭ كەستەسى وزگەردى

بۇگىننەن باستاپ نۇر-سۇلتان قالاسى باعدارلارىنىڭ ءجۇرۋ كەستەسى وزگەردى. ەندى اۆتوبۋستار ساعات 06:00-دەن 22:00-گە دەيىن جۇرەدى. بۇعان دەيىن ساعات 07:00-دەن 21:00-گە دەيىن قاتىنادى.

العاشقى كۇنى (12 مامىر) جولاۋشىلار اعىنى 146 907 ادامدى قۇرادى. ونىڭ ىشىندە 2 787 وقۋشىلار, 36 884 جەڭىلدىگى بار ازاماتتار. 13 مامىر كۇنى جولاۋشىلار اعىنى – 205 295 ادامدى قۇرادى, ونىڭ 3 686-سى وقۋشىلار, 48 418-ءى جەڭىلدىگى بار ازاماتتار. كارانتينگە دەيىن جولاۋشىلار اعىنى 762 مىڭدى قۇراعان. قازىر لينياعا قالالىق باعدارلار شىقتى.

ەكىنشى كەزەڭدە قالا ماڭىنا قاتىنايتىن باعدارلار شىعادى. قوزعالىس قالپىنا كەلتىرىلگەن كەزدە, قوسىمشا حابارلانادى. بارلىق اۆتوبۋستارعا بۇرىنعىداي دەزينفەكتسيا جۇرگىزىلەدى. اۆتوبۋس جۇرگىزۋشىلەرى بارلىق قاۋىپسىزدىك شارالارىن ساقتايدى: بەتپەردە, قولعاپ كيىپ, انتيسەپتيكتەردى قولدانادى. اتالعان شارالاردى جولاۋشىلار دا ساقتاۋى قاجەت. سونىمەن قاتار جۇرگىزۋشىلەر بيلەت ساتۋدى ۋاقىتشا توقتاتتى. جول ءجۇرۋ ءۇشىن كولىك كارتالارىن جانە جولاقى تولەۋدىڭ بالاما تاسىلدەرىن قولدانۋعا بولادى. ولار SMS, QR-كود جانە ءموبيلدى قوسىمشالار.

كارانتين ەنگىزىلگەنگە دەيىن قولما-قول اقشاسىز تولەم ۇلەسى 98%-دى قۇرادى. كولىكتىك باقىلاۋ دەپارتامەنتىنىڭ قىزمەتكەرلەرى جانە جۇرگىزۋشىلەردىڭ وزدەرى اۆتوبۋستاعى ەرەجەلەردى جولاۋشىلارعا بارىنشا تۇسىندىرەدى. بۇل ەرەجەلەر: الدىڭعى ەسىك ارقىلى كىرۋ, بەتپەردە كيۋ جانە قولما-قول اقشاسىز تولەم.

جولاۋشىلاردىڭ الدىڭعى ەسىك ارقىلى كىرۋى, قالعان ەكى ەسىك ارقىلى شىعۋى – جۇرگىزۋشىلەردىڭ جولاۋشىلار سانىن, ولاردا ماسكالاردىڭ بولۋىن باقىلاۋ ءۇشىن, سونداي-اق قاجەت بولعان جاعدايدا جولاۋشىلارعا وسى ەرەجەلەردى ءتۇسىندىرۋى ءۇشىن ورىندالادى. كارانتين كەزىندە ساتىپ الىنعان ايلىق جول ءجۇرۋ تاريفتەرى پايدالانۋشىلاردىڭ كولىك كارتالارىنا قايتا جۇكتەلدى.

ايلىق جول ءجۇرۋ 12 مامىردان 11 ماۋسىمعا دەيىن جارامدى. ەسكە سالا كەتەيىك, 28 ناۋرىزدان باستاپ قوسىمشا تاريفتەر ىسكە قوسىلدى. ەلوردادا قوعامدىق كولىكتە 18 جاسقا دەيىنگى بالالار كولىك كارتاسى بار بولعان جاعدايدا تەگىن جۇرە الادى.