قىزىلجاردىڭ «بەرەكە» مولتەك اۋدانىندا قىزمەتتىك شارۋالارىمەن جۇرگەن قالالىق اكىمدىكتىڭ قىزمەتكەرلەرى دوسۇلان بوسىنوۆ پەن ناتاليا دەروۆا 14 مامىر كۇنى كالينين كوشەسىنىڭ بويىنداعى جەكەمەنشىك ۇيلەردىڭ بىرىنەن شىعىپ جاتقان جالىندى كوزدەرى شالىپ قالادى.
وزدەرىنىڭ ادامدار الدىنداعى جاۋاپكەرشىلىگىنەن اينىماعان ادال قىزمەتكەرلەر ماشينالارىن دەرەۋ ورتەنىپ جاتقان ۇيگە بۇرادى. ولار ءورت سوندىرۋشىلەر جەتكەنشە ادامدار وت قۇشاعىندا قالىپ قويۋى مۇمكىن ەكەندىگىن بىردەن جورىعان ەدى. جولدا كەلە جاتىپ «101» نومىرىنە دابىل دا ءتۇسىرىپ ۇلگەرەدى.
بۇلار جەتكەندە ءتىلسىز جاۋ كۇش الىپ, ءۇيدىڭ ءىشى جالىن قۇشاعىنا ورانعان. دوسۇلان ۇيدە ادام بارىن سەزىپ, ەسىكتى بۇزىپ كىرۋدىڭ قامىنا شۇعىل كىرىسەدى. ناتاليا وعان بولىسىپ, شىنىنى سىندىراتىن قارۋ ىزدەپ تابادى. ۇيگە كىرگەن قۇتقارۋشىلار وندا جاس قىزدىڭ وتىرعانىن كورەدى. ەسى شىعىپ كەتكەن 11 جاسار بالا بۇلاردىڭ شاقىرعانىنا كەلمەي, انا جاقتا اتاسى بارىن ايتىپ, ايعايلاپ, سونى قۇتقارۋ كەرەك دەي بەرەدى. بىراق ول جاققا ءوتۋ مۇمكىن ەمەس ەدى. جالىن ابدەن كۇش الىپ, لاپىلداپ جاتقان. سوندا دا كىرمەك بولعان دوسۇلاندى قايتا شىعا الماسىن كورگەن ناتاليا ۇستاپ قالادى. ەكەۋى 11 جاسار كسەنيانى قولىنان تارتىپ, سىنعان تەرەزەدەن كۇشپەن شىعارىپ الادى.
بۇل ورتتە وكىنىشكە وراي 63 جاستاعى ءۇي يەسى قازا بولدى. ال اكىمدىك قىزمەتكەرلەرى 11 جاسار قىزدى سابىرعا كەلتىرىپ, كورشىلەرىنىڭ قولىنا تاپسىرادى. وسى ۋاقىتتا ءورت سوندىرۋشىلەر مەن دارىگەرلەر دە جەتەدى. ءورت سوندىرۋگە جەدەل كىرىسكەن №5 ءورت ءسوندىرۋ ءبولىمىنىڭ قىزمەتكەرلەرى ونى جارتى ساعاتتا ءسوندىرىپ ۇلگەرەدى. سونىڭ وزىندە ءورت 120 شارشى مەتردەي جەردى شارپىعان.
پەتروپاۆل اكىمدىگىنىڭ وكىلدەرى دوسۇلان بوسىنوۆ پەن ناتاليا دەروۆا وزدەرىنىڭ مەملەكەتتىك قىزمەتكەرگە لايىق مىندەتىن ادال اتقارىپ, ءبىر ادامدى اجالدان الىپ قالدى. 32 جاستاعى دوسۇلان تۇركىستان ءوڭىرىنىڭ تۋماسى, قىزىلجاردا ۋنيۆەرسيتەت بىتىرگەن سوڭ وسىندا قىزمەتكە قالعان. قازىر اكىمدىكتىڭ ءبولىم باستىعىنىڭ مىندەتىن اتقارادى. ال ناتاليا ءورت ءسوندىرۋشىنىڭ وتباسىندا تۋعان قىز ەكەن. كەيىن جەدەل جاردەم قىزمەتىندە دە ىستەپتى. سوندىقتان ول ادامدارعا كومەكتەسۋگە جاسىنان بەيىل جان ەكەن. اكىمدىك قىزمەتكەرلەرىنىڭ ىسىنە بارلىق قالالىقتار ريزاشىلىعىن بىلدىرۋدە.
قىزىلجار