وتباسى – ءومىردىڭ تۇتقاسى. ءۇي-ءىشىنىڭ قىزىققا, قۋانىشقا تولى بولۋى وتباسىنداعى باۋىرمالدىق, بەرەكە-بىرلىككە بايلانىستى. مامىرباەۆتار اۋلەتى – شاڭىراقتىڭ وسىنداي قادىر-قاسيەتىن ورەلى ءھام ءتالىمدى ۇرپاعىنىڭ ارقاسىندا جالعاستىرىپ وتىرعان مەرەيلى وتباسىنىڭ ءبىرى. تاربيە – وتباسىنىڭ ۇزىلمەيتىن جەلىسى.
سەرىك اتا بۇگىندە شاڭىراقتىڭ كوز قۋانىشىنا اينالعان نەمەرەلەرى مەن شوبەرەلەرىنىڭ باعىندىرار اسۋى بيىك بولسا ەكەن دەگەن اتالىق تىلەكپەن كۇن كەشىپ جاتىر.
سەرىك مامىرباي ۇلى ءومىرىنىڭ 51 جىلى مەكتەپتە وقۋشىلارعا ساباق بەرىپ, تاربيەلەۋمەن ءوتتى. الدىنان مىڭداعان شاكىرت ءبىلىم الىپ, تۇلەپ ۇشتى. ولار بۇگىندە ءومىردىڭ سان ءتۇرلى جولدارىندا ەڭبەك ەتىپ ءجۇر. ەسەلى ەڭبەگىنىڭ ارقاسىندا ابىرويعا بولەندى. «حالىق اعارتۋ ءىسىنىڭ وزىق قىزمەتكەرى», بايزاق اۋدانىنىڭ قۇرمەتتى ازاماتى اتاندى. بىرنەشە مەدال مەن قۇرمەت گراموتاسىنىڭ يەگەرى.
سەرىك اتانىڭ جارى مانات اپانىڭ دا بار ەڭبەك جولى مەكتەپپەن بايلانىستى. 1959 جىلى اۋىلداعى ءبىلىم ورداسىنا كىتاپحاناشى بولىپ ورنالاسقان ول ءبىر ورنىندا تاپجىلماستان ەڭبەك ەتىپ, 1994 جىلى زەينەتكەرلىككە شىقتى. دۇنيەگە 15 پەرزەنت اكەلگەن باتىر انا.
– اللانىڭ بەرگەنى, 13 بالام امان-ەسەن ءوسىپ, ەرجەتتى, ءۇبىرلى-ءشۇبىرلى بولدى. تەك وسىدان ەكى جىل بۇرىن دارىگەر بولىپ ەڭبەك ەتىپ جۇرگەن ۇلكەن قىزىم اياق استىنان باقيلىق بولىپ كەتتى. ءار بالانىڭ ءوز نەسىبەسى بار عوي. 11 بالام جوعارى ءبىلىم الدى. ەڭبەك ەتە ءجۇرىپ, دۇنيەگە كەلتىرىپ, سولاردى قاتارعا قوستىق, – دەيدى مانات اپا اعىنان جارىلىپ.
شىنىندا, مامىرباەۆتارعا وسىنشا بالانى جەتەلەپ ءجۇرىپ جەتىلدىرۋ وڭاي بولدى دەيسىز بە؟ ەندى بۇگىندە سول پەرزەنتتەرىنىڭ راقاتىن كورىپ وتىر. وسىنداي اتا-انانىڭ تاربيەسىن كورگەن ۇل-قىزدارى دا شەتىنەن ەڭبەكقور, اقكوڭىل جاندار. جەتى كەلىن ءتۇسىردى. 7 ۇل, 6 قىزدىڭ ىشىنەن التاۋى جانە كەلىنى اكە جولىن قۋىپ, ۇستاز اتاندى. بۇدان بولەك, ەكى قىزى جوعارى ءبىلىمدى دارىگەر, ەسبولاتى – ينجەنەر, بەكبولات – كاسىپكەر, ەربولات – جول قۇرىلىسىندا, شىمبولات – گازەتتە جاۋاپتى قىزمەتكەر, ەڭ كەنجەسى اقبولاتى اسكەري بولىمدە قىزمەت ەتەدى.
تاربيە باسى – تال بەسىك. سەرىك اتا مەن مانات اپا ۇل-قىزدارىنان وربىگەن 35 نەمەرە مەن 29 شوبەرەنىڭ تاربيەسىن تاسادا قالدىرعان ەمەس. حالقىمىز «وتان – قۋات, وتباسى – شۋاق», دەپ تەگىن ايتپاعان. ويتكەنى وتباسىلاردان مەملەكەت قۇرالادى. دەمەك, ءار ەلدىڭ, ءار مەملەكەتتىڭ مىزعىماس بەرىكتىگى – ءار وتباسىنىڭ مىقتىلىعىندا. سوندىقتان وتباسى – ازاماتتىڭ تىرەگى عانا ەمەس, قوعامنىڭ باستى نەگىزى بولىپ تابىلادى. جۇزدەرىنەن جىلىلىق ەسىپ, كوڭىلدەرىنەن تەكتىلىكتىڭ تابى سەزىلەتىن قوس قاريا اڭىزداردان سىر شەرتىپ, قيال-عاجايىپ ەرتەگىلەردى ەرىنبەي-جالىقپاي نەمەرە-شوبەرەلەرىنە وقىپ بەرىپ وتىرعانى. ءيا, سەرىك اتا مەن مانات اپا – ونەگەلى وتباسىنىڭ ۇيىتقىسى بولىپ وتىرعان اسىل جاندار. ادامنىڭ باقىتى دەگەن وسى ەمەس پە.
جامبىل وبلىسى,
بايزاق اۋدانى,
تۇيمەكەنت اۋىلى.