مادەنيەت جانە سپورت ءمينيسترى اقتوتى رايىمقۇلوۆا ورتالىق كوممۋنيكاتسيالار قىزمەتىندە وتكەن ونلاين بريفينگتە ە-sport cاندىق پلاتفورماسىن ەنگىزۋ قاراستىرىلعانىن ايتتى.
«اتالعان پلاتفورمادا بىرىككەن سپورتتىق كلاسسيفيكاتسيا, سپورتتىق كۇنتىزبە, سپورتشىلاردىڭ, جاتتىقتىرۋشىلار مەن تورەشىلەردىڭ بىرىككەن ەلەكتروندىق بازاسى سىندى سپورتقا قاتىستى باستى قۇجاتتار ساقتالادى. ءبىز بۇل جۇمىستى 2020 جىلدىڭ سوڭىنا دەيىن «ۇلتتىق اقپاراتتىق تەحنولوگيالار» اق بىرلەسىپ اياقتايمىز. ءبىزدىڭ جاساعان قۇجاتىمىزدا سپورتتىق-بۇقارالىق شارالار دا بار. مينيسترلىكتىڭ ۇيىمداستىرۋىمەن 2019 جىلى «قازاقستان جاستار Fest» جوباسى جۇزەگە اسىرىلعان بولاتىن. بۇل باستامامىزدى وڭىرلەرىمىز بەلسەندى قولداعان ەدى. جوسپاردا اتالعان فەستيۆالدى جىل سايىن تۇراقتى تۇردە وتكىزۋ ويلاستىرىلعان. جاسالىپ جاتقان جۇمىستى حالىققا جەتكىزۋ دە اسا ماڭىزدى. سوندىقتان بۇگىنگى جوسپارىمىزدى بۇقارالىق اقپارات قۇرالدارى ارقىلى سپورتسۇيەر قاۋىمعا جەتكىزۋدى قالايمىز»,- دەدى اقتوتى رايىمقۇلوۆا.
ءمينيستردىڭ ايتۋىنشا, 2025 جىلى حالىقتىڭ بارلىق توبى اراسىندا دەنە شىنىقتىرۋ جانە سپورتپەن تۇراقتى تۇردە اينالىساتىنداردىڭ سانى 7,5 ملن ادامدى قۇرايتىن بولادى.