بوكستان قازاقستان ەرلەر قۇراماسى 25 مامىر مەن 12 ماۋسىم ارالىعىندا الماتىداعى ايبا بازاسىندا وقۋ-جاتتىعۋ جيىنىن وتكىزەدى. بۇل تۋرالى بوكستان قازاقستان ۇلتتىق قۇراماسىنىڭ باس باپكەرى عالىم كەنجەباەۆ مالىمدەدى.
اتالعان جيىن كوروناۆيرۋس پاندەمياسىنا بايلانىستى ەلدە جاريالانعان توتەنشە جاعداي رەجيمىنەن كەيىنگى العاشقى جاتتىعۋ بولماق. باس باپكەردىڭ ايتۋىنشا, جيىندا بارلىق سانيتارلىق تالاپتار ساقتالىپ, جاتتىعۋ ارنايى فيزيكالىق دايىندىق بويىنشا وتەدى.
«وقۋ جاتتىعۋ-جيىنىنا ۇلتتىق قۇرامانىڭ 30 سپورتشىسى شاقىرىلادى. الداعى ۋاقىتتا وزبەكستان, ۋكراينا جانە رەسەي قۇرامالارىمەن بىرگە بىرلەسكەن جاتتىعۋ جيىنىن وتكىزۋ جوسپاردا بار. ءارى قاراي شەكارانىڭ اشىلعانىنا بايلانىستى جوسپار قۇرامىز», دەيدى عالىم كەنجەباەۆ.
سونداي-اق عالىم كەنجەباەۆ كۇزدە قازاقستان چەمپيوناتى ۇيىمداستىرىلاتىنىن جانە الەمدىك دودالارعا قاتىسۋدى حالىقارالىق جارىس كۇنتىزبەسىندەگى وزگەرىستەرگە بايلانىستى جوسپارلايتىنىن ايتتى.