قازاقستان پرەزيدەنتى نۇرسۇلتان نازارباەۆ اقوردادا جوعارى ەۋرازيالىق ەكونوميكالىق كەڭەستىڭ وتىرىسىنا قاتىسۋ ءۇشىن استاناعا كەلگەن كەدەن وداعى مەن ءبىرتۇتاس ەكونوميكالىق كەڭىستىككە مۇشە ەلدەردىڭ ۇكىمەت باسشىلارىمەن كەزدەسۋ وتكىزدى, دەپ حابارلادى پرەزيدەنتتىڭ ءباسپاسوز قىزمەتى.
قازاقستان پرەزيدەنتى نۇرسۇلتان نازارباەۆ اقوردادا جوعارى ەۋرازيالىق ەكونوميكالىق كەڭەستىڭ وتىرىسىنا قاتىسۋ ءۇشىن استاناعا كەلگەن كەدەن وداعى مەن ءبىرتۇتاس ەكونوميكالىق كەڭىستىككە مۇشە ەلدەردىڭ ۇكىمەت باسشىلارىمەن كەزدەسۋ وتكىزدى, دەپ حابارلادى پرەزيدەنتتىڭ ءباسپاسوز قىزمەتى.
كەزدەسۋگە قازاقستان پرەمەر-ءمينيسترى سەرىك احمەتوۆ, رەسەي فەدەراتسياسى ۇكىمەتىنىڭ توراعاسى دميتري مەدۆەدەۆ, بەلارۋس رەسپۋبليكاسىنىڭ پرەمەر-مينيسترى ميحايل مياسنيكوۆيچ, سونداي-اق ۋكراينا پرەمەر-ءمينيسترى نيكولاي ازاروۆ پەن قىرعىز رەسپۋبليكاسىنىڭ پرەمەر-ءمينيسترى جانتورو ساتىبالديەۆ قاتىستى.
كەزدەسۋگە قاتىسۋشىلار ەۋرازيالىق ەكونوميكالىق ينتەگراتسيانى ودان ءارى تەرەڭدەتۋ, سونداي-اق 2013 جىلى 29 مامىردا استانادا وتكەن جوعارى ەۋرازيالىق ەكونوميكالىق كەڭەستىڭ وتىرىسى بارىسىندا قول جەتكىزىلگەن كەلىسىمدەردى ىسكە اسىرۋدىڭ كەڭ اۋقىمدى ماسەلەلەرىن قاراستىردى.
نۇرسۇلتان نازارباەۆ ۇكىمەت باسشىلارىنا ىقىلاسىن بىلدىرە كەلىپ, ولاردىڭ جەمىستى جۇمىس ىستەۋى ءۇشىن بارلىق قاجەتتى جاعداي جاسالعانىنا سەنىمدى ەكەنىن ايتتى.
– مەن سىزدەردىڭ وتىرىستارىڭىزدىڭ كۇن تارتىبىمەن تانىستىم. اتاپ ايتقاندا, كەدەن وداعى, ءبىرتۇتاس ەكونوميكالىق كەڭىستىك بويىنشا, سونىڭ ىشىندە جاڭا مۇشەلەر مەن باقىلاۋشىلاردى قابىلداۋعا قاتىستى ودان ارعى جۇمىسىمىزدى تالقىلاۋ مىندەتى تۇر. مۇنىڭ ءبارى وڭاي ماسەلە ەمەس. مەن سىزدەر بۇل جونىندە ورتاق شەشىمگە كەلەسىزدەر دەپ سەنەمىن. كەڭ اۋقىمداعى كەزدەسۋ – ەۋرازيالىق ينتەگراتسياعا زور كوڭىل ءبولىنىپ وتىرعاندىعىنىڭ دالەلى, – دەدى مەملەكەت باسشىسى.
كەزدەسۋ بارىسىندا قازاقستان پرەمەر-ءمينيسترى س.احمەتوۆ جوعارى ەۋرازيالىق ەكونوميكالىق كەڭەس وتىرىسىنىڭ كۇن تارتىبىندەگى نەگىزگى تارماقتار تۋرالى باياندادى.
– الداعى وتىرىستىڭ كۇن ءتارتىبى ايتارلىقتاي اۋقىمدى. ءبىرىنشى كەزەكتە مەملەكەت باسشىلارى دەڭگەيىندە جوعارى ەۋرازيالىق ەكونوميكالىق كەڭەستىڭ شەشىمدەرىن ىسكە اسىرۋعا بايلانىستى ماسەلەلەر قارالاتىن بولادى. ءبىز كەدەندىك-تاريفتىك رەتتەۋگە بايلانىستى كەدەن وداعى كوميسسياسى شەشىمىنىڭ, سونداي-اق ەۋرازيالىق ەكونوميكالىق كوميسسيا القاسى شەشىمىنىڭ ورىندالۋ بارىسىن دا قاراستىرامىز, – دەدى س.احمەتوۆ.
سونداي-اق, وتىرىستا ينتەگراتسيا ماسەلەلەرىن, وزگە دە ءتۇرلى باعىتتار مەن ەكونوميكا سالاسىندا ءوزارا ءىس-قيمىلدى كۇشەيتۋ جولدارىن تالقىلاۋ جوسپارلانعان.
-----------------------------------------
سۋرەتتى تۇسىرگەندەر
س.بوندارەنكو, ب.وتارباەۆ.