الەمگە ايگىلى شاحماتشىلاردىڭ قاتىسۋىمەن 15-17 مامىر ارالىعىندا فيدە-ءنىڭ ونلاين-ءتۋرنيرى وتەدى. بۇل جارىس ايگىلى ۆيلگەلم ستەينيتستى ەسكە تۇسىرۋگە ارنالادى.
1836 جىلى سول كەزدەرى اۋستريا يمپەرياسىنىڭ قاراماعىندا بولعان پراگا قالاسىندا تۋىپ-ءوسىپ, كەيىننەن اقش-قا قونىس اۋدارعان ستەينيتستىڭ ەسىمى تۇڭىش الەم چەمپيونى رەتىندە تاريحتا قالدى. بۇل اتاققا ول 1886 جىلى قول جەتكىزدى. كەيىنەن دە كوپتەگەن ءدۇبىرلى دودالاردا دارالاندى. 1884 جىلى ۆيلگەلم گەرمانيانىڭ وكىلى ەمانۋەل لاسكەردەن ۇتىلعاننان سوڭ چەمپيوندىق تاجدەن ايىرىلدى. شاحماتتان بولەك, ول جۋرناليستيكامەن دە, ادەبيەتپەن دە, ساياساتپەن دە اينالىستى. اتاقتى شاحماتشى وسىدان 120 جىل بۇرىن, ياعني 1900 جىلدىڭ جازىندا 65 شاسقا قاراعان شاعىندا و دۇنيەگە اتتاندى.
ۆيلگەلم ستەينيتستى ەسكە تۇسىرۋگە ارنالعان تۋرنيردە ءبىزدىڭ جانسايا ابدىمالىك تە ونەر كورسەتەدى. قازاق قىزى رەسەيلىك ەكاتەرينا لاگنو مەن الەكساندرا كوستەنيۋك, قىتايلىق لەي تينتسزە مەن تان چجوني, بولگاريالىق انتوانەتا ستەفانوۆا, فرانتسيالىق ماري سەباگ, يراندىق ساراسادات حادەمالشارەح, گەرمانيالىق ەليزابەت پاەتتس جانە پەرۋلىق دەيسي كوريمەن شەبەرلىك بايقاسادى. ال ەرلەر اراسىنداعى جارىستا الەم چەمپيونى نورۆەگيالىق مانگۋس كارلسەن باستاعان ءبىر توپ ساڭلاقتار سايىسقا تۇسەدى.