وتكەن سەنبى كۇنى استانادا «ءبىز تازا قالا ءۇشىن» سانيتارلىق تازارتۋ, كوگالداندىرۋ جانە اباتتاندىرۋ بويىنشا ءداستۇرلى جالپى قالالىق سەنبىلىك ءوتتى. بۇل شارا ەلوردادا 10 قىركۇيەك-10 قازان ارالىعىندا ءوتىپ جاتقان ەكولوگيالىق ايلىق اياسىندا ۇيىمداستىرىلدى.
وتكەن سەنبى كۇنى استانادا «ءبىز تازا قالا ءۇشىن» سانيتارلىق تازارتۋ, كوگالداندىرۋ جانە اباتتاندىرۋ بويىنشا ءداستۇرلى جالپى قالالىق سەنبىلىك ءوتتى. بۇل شارا ەلوردادا 10 قىركۇيەك-10 قازان ارالىعىندا ءوتىپ جاتقان ەكولوگيالىق ايلىق اياسىندا ۇيىمداستىرىلدى.
جالپى قالالىق ەكولوگيالىق سەنبىلىك اياسىندا باس قالامىزدا قونىس تەپكەن قالالىق جانە رەسپۋبليكالىق ۇيىمدار «استانا-زەلەنستروي» اق-پەن بىرلەسىپ اعاش كوشەتتەرىن وتىرعىزدى. الماتى اۋدانىندا اقجول جانە №14 كوشەلەردىڭ قيىلىسىندا قاۋ جاپىراقتى شەگىرشىن, ءسۇمبىل تەرەك, قىزىل تال, ۇيەڭكى مەن جيدە اعاشىنىڭ 1848 كوشەتى وتىرعىزىلدى. سارىارقا اۋدانىندا تىلەنديەۆ داڭعىلى بويىنشا پريدوروجنىي كوشەسىنەن باستاپ سولتۇستىك-باتىس اينالما جولىنا دەيىن جانە سارىارقا-اباي كوشەلەرىنىڭ قيىلىسىنداعى ساياباقتا 646 ءتۇپ اعاش بوي كوتەردى. مۇندا تەرەك, ۇيەڭكى, قاراعاي, بالقاراعاي اعاشتارى گۇل جاراتىن بولادى. ەسىل اۋدانىندا 1545 ءتۇپ اعاش, ياعني تۇران داڭعىلى №31 كوشەدەن «استانا جۇلدىزى» مونۋمەنتىنە دەيىن ۇساق جاپىراقتى شەگىرشىن, ال بوتانيكالىق باق اۋدانىنا قاراعاي, ارشا, قايىڭ, شەتەن جانە زەرەك اعاشتارى وتىرعىزىلدى. جالپى قالالىق سەنبىلىك اياسىندا 4039 الۋان ءتۇرلى اعاش ەگىلدى.
سونىمەن قاتار, جينالعان قوقىس تاسۋ بويىنشا ونداعان جۇك تيەگىش تەحنيكا مەن بريگادا جۇمىس ىستەدى. قالا باسشىسىنىڭ تاپسىرماسىنا سايكەس, ەنەرگەتيكا, كولىك جانە قۇرىلىس باسقارمالارىنان لاستانعان جەرلەردى تازالاۋ ءجانە ونى پوليگونعا ۋاقتىلى كومۋ ءۇشىن 30 جۇك تيەگىش جانە 90 ۇلكەن جۇك تاسىمالدايتىن ماشينا ءبولىندى. بۇدان باسقا, كوممۋنالدىق, قۇرىلىس جانە قالاداعى باسقا دا كاسىپورىنداردىڭ مەحانيزاتسيالانعان تەحنيكاسى تولىق تارتىلدى.
استانادا وتكەن جالپى قالالىق سەنبىلىكتە تەك سارىارقا اۋدانى بويىنشا پوليگونعا 13,58 توننا كۇل-قوقىس شىعارىلدى. سەنبىلىككە 49 تەحنيكا تارتىلدى. وندا مەحانيزاتسيالانعان جانە قولمەن جيناۋ شارالارى ەكى اۋىسىممەن جۇرگىزىلدى. سونىمەن قاتار, سارىارقا اۋدانى بويىنشا سۋدى تارتىپ الۋ, جاڭبىر سۋلارىن جينايتىن قۇدىقتار مەن ناۋالاردى باتپاق پەن قوقىستان تازالاۋ جۇمىستارى جۇرگىزىلدى. بۇدان باسقا, جالپى قالالىق سەنبىلىك اياقتالعان سوڭ «استانا تازالىق» جشس كۇشىمەن قوقىس شىعارۋ جانە قالانى سانيتارلىق تازالاۋ شارالارى ودان ءارى جالعاستى.
نياز جىلقىباەۆ.