پرەزيدەنت قاسىم-جومارت توقاەۆتىڭ تاپسىرماسىمەن شىمكەنت قالاسىنداعى 40 مايدانگەرگە ۇلى جەڭىستىڭ 75 جىلدىعى ارنايى مەدالى مەن قۇتتىقتاۋ حاتى تابىستالدى. بۇل تۋرالى قالا اكىمدىگىنىڭ ءباسپاسوز قىزمەتى حابارلادى.
مەرەكە قارساڭىندا قالا اكىمى مۇرات ايتەنوۆ ۇوس ارداگەرى سارسەن ءابدىنۇروۆتىڭ ۇيىنە بارىپ, ارنايى مەدالىن تاپسىرىپ, پرەزيدەنت ق.توقاەۆتىڭ قۇتتىقتاۋ حاتىن وقىپ بەردى.
مايدانگەر اتامىز 1922 جىلدىڭ 22 جەلتوقسانىندا دۇنيەگە كەلگەن. سوعىس جىلدارىندا ول 368-شى, كەيىن 823-ءشى اتقىشتار پولكىندە قىزمەت ەتتى. كەيىننەن 1-ءشى ۋكراينا مايدانىنىڭ قۇرامىندا شايقاسىپ بەرلينگە دەيىن بارعان. سۇراپىل سوعىس اياقتالعاننان سوڭ 1947 جىلعا دەيىن گەرمانيادا سوۆەت ارمياسى قاتارىندا قىزمەت ەتكەن.
ەلگە ورالعان سوڭ پوچتادا, مادەنيەت سالاسىندا باسشىلىق لاۋازىمدا قىزمەت ەتكەن. الماتىداعى قازاق مەملەكەتتىك ۋنيۆەرسيتەتىن سىرتتاي بىتىرگەن سوڭ 1961-1971 جىلدار ارالىعىندا شىمكەنت وبلىستىق ىشكى ىستەر سالاسىندا جاۋاپتى قىزمەتتەر اتقاردى. 1971 جىلدان قۇرمەتتى ەڭبەك دەمالىسىنا شىققانشا شىمكەنت قالاسىنداعى ەڭبەككە ورنالاستىرۋ باسقارماسىندا جاۋاپتى قىزمەتتە بولعان.
سوعىس جىلدارىندا سارسەن ءابدىنۇروۆ ءىى دارەجەلى « ۇلى وتان سوعىسى» وردەنىمەن, «1941-1945 ج.ج. گەرمانيانى جەڭگەنى ءۇشىن», «سوۆەت وداعىنىڭ مارشالى گ.ك. جۋكوۆ» جانە باسقا دا مەدالدارمەن ماراپاتتالعان.
ايتا كەتەيىك, ۇلى جەڭىستىڭ 75 جىلدىعىنا وراي قالاداعى ۇوس 40 ارداگەرىنىڭ اربىرىنە شىمكەنت قالاسىنىڭ اكىمدىگى 1 ميلليون تەڭگە كولەمىندە سىياقى بەردى.