وسىدان ءدال 30 جىل بۇرىن, ياعني 1990 جىلدىڭ 7 مامىرىندا جول اپاتىنان ايگىلى بالۋان اسلان حادارتسەۆ قايتىس بولعان ەدى. ول نەبارى 29 جىل عۇمىر كەشتى.
اسلان حابي ۇلى 1961 جىلدىڭ 4 اقپانىندا سولتۇستىك وسەتيانىڭ الاگير اۋدانىنىڭ سۋاداگ اۋىلىندا دۇنيەگە كەلدى. ەركىن كۇرەسپەن شۇعىلدانعان ول بوزبالا كەزىنەن دارا تالانتىمەن وقشاۋلاندى. ءوز قۇرداستارى اراسىندا وتكەن كوپتەگەن اسا ءىرى حالىقارالىق جارىستاردا جەڭىس تۇعىرىنا كوتەرىلگەن بالۋان ەرەسەكتەر دۋىندا دا بيىك بەلەستەردى باعىندىردى. اتاپ ايتساق, ءۇش رەت الەم چەمپيوناتىندا, ەكى رەت ەۋروپا بىرىنشىلىگىندە, ءتورت رەت الەم كۋبوگىندا. دوستىق ويىندارى جانە ىزگى نيەت ويىندارىندا قارسىلاس شاق كەلتىرمەي, باس جۇلدەلەردى ولجالادى.
اسلان حادارتسەۆتاي ارىندى بالۋاننىڭ جەڭىستى جولى ودان ءارى جالعاساتانىنا ەشكىمنىڭ كۇمانى جوق ەدى. الايدا ول ءوز ەلىندە جول اپاتىنا ۇشىراپ, سول جەردە جان ءتاسىلىم ەتتى.
اسلاننىڭ قولى جەتپەگەن بيىكتەردى كەيىننەن ونىڭ تۋعان ءىنىسى جالعاستىردى. كۇرەس الىپپەسىن تۋعان اعاسىنان ۇيرەگەن ماحاربەك حادارتسەۆ سەۋل جانە بارسەلونا وليمپيادالارىنىڭ جەڭىمپازى, اتلانتا وليمپياداسىنىڭ كۇمىس جۇلدەگەرى اتاندى. الەم مەن ەۋروپا چەمپيوناتتارىن بەس رەتتەن ۇتىپ, تاعى بىرنەشە مارتە ايتۋلى دودالاردا جۇلدەلى ورىنداردى يەلەندى.