الماتى قالاسىنداعى «عىلىم ورداسىنىڭ» ۇلكەن زالىندا قازاقستان رەسپۋبليكاسى ۇلتتىق عىلىم اكادەمياسىنىڭ جالپى جينالىسىنىڭ سەسسياسى ءوتتى. القالى جيىندا قر ۇعا پرەزيدەنتىن جانە قر ۇعا تورالقاسىنىڭ جاڭا قۇرامىن سايلاۋ ماسەلەلەرى قارالدى.
الماتى قالاسىنداعى «عىلىم ورداسىنىڭ» ۇلكەن زالىندا قازاقستان رەسپۋبليكاسى ۇلتتىق عىلىم اكادەمياسىنىڭ جالپى جينالىسىنىڭ سەسسياسى ءوتتى. القالى جيىندا قر ۇعا پرەزيدەنتىن جانە قر ۇعا تورالقاسىنىڭ جاڭا قۇرامىن سايلاۋ ماسەلەلەرى قارالدى.
سوڭعى بىرەر جىلدىڭ جۇزىندە ومىردەن وتكەن وتاندىق عىلىمعا ەڭبەكتەرى سىڭگەن, عالىمداردى ءۇنسىز ەسكە الۋمەن باستالعان قر ۇعا-نىڭ جالپى جينالىسىندا ەلىمىزدىڭ مەملەكەتتىك حاتشىسى م.ءتاجيننىڭ قازاقستان رەسپۋبليكاسىنىڭ ۇلتتىق تاريحىن زەردەلەۋ جونىندەگى ۆەدومستۆوارالىق جۇمىس توبىنىڭ كەڭەيتىلگەن وتىرىسىندا جاساعان بايانداماسىنا وراي ۇيىمداستىرىلعان «قازاقستان تاريحى, وعان قوسا عىلىم مەن جوعارى ءبىلىم تاريحى» اتتى «دوڭگەلەك ۇستەل-كونفەرەنتسياسى» ءوتتى.
عىلىمنىڭ ءار سالاسىن قامتيتىن 259 مۇشەسى بار عىلىمي ورتانىڭ 211 مۇشەسى قاتىسقان جيىندا قر ۇعا-نى وسى ۋاقىتقا دەيىن باسقارىپ كەلگەن مۇرات جۇرىنوۆ پرەزيدەنت بولىپ قايتا سايلاندى. جينالىسقا قاتىسقانداردىڭ 97,7 پايىزى ونى قولداپ داۋىس بەردى. قر ۇعا تورالقا مۇشەلىگىنە 21 عالىم سايلاندى. ولاردىڭ 12-ءسى تۇراقتى قۇرام دا, ال قالعان 9-ى سايلانبالى مۇشەلەر.
قازاقستان رەسپۋبليكاسىنىڭ ۇلتتىق عىلىم اكادەمياسى (قر ۇعا) – وتاندىق عىلىمنىڭ, ءبىلىم مەن مادەنيەتتىڭ قالىپتاسۋى مەن دامۋىنا, قوعامىمىزدىڭ ەكونوميكالىق, الەۋمەتتىك جانە رۋحاني دامۋىنىڭ ماڭىزدى ماسەلەلەرىن شەشۋگە زور ۇلەس قوسقان, قۇرامىندا الەمدىك عىلىمي قاۋىم مويىنداعان 150 اكادەميگى جانە 109 كوررەسپوندەنت-مۇشەسى بار ەلىمىزدىڭ جەتەكشى عىلىمي ۇيىمى.
قازاق ەلىنىڭ عىلىمي ەليتاسى الدىندا سويلەگەن سوزىندە اكادەميك م.جۇرىنوۆ وسى ۋاقىتقا دەيىنگى كەزەڭدە قر ۇعا پەرزيدەنتى مەن ونىڭ باسقارۋىنداعى قر ۇعا تورالقاسى تاراپىنان جالپى ءماجىلىستىڭ قاۋلىلارىن ورىنداۋ بويىنشا جانە قر ۇعا شۇعىل قىزمەتىنىڭ اعىمداعى سۇراقتارىنىڭ شەشىلۋى بويىنشا ەداۋىر جۇمىستار اتقارىلعانىن تىلگە تيەك ەتىپ, ەلىمىزدىڭ ۇلتتىق عىلىم اكادەمياسىنىڭ حالىقارالىق قاتىناستار سالاسىنداعى قىزمەتى بەلسەندەندىرىلە تۇسكەندىگىن باياندادى. قر ۇعا بارلىق ءىرى عىلىم اكادەميالارى حالىقارالىق اسسوتسياتسيالارىنا مۇشە بولا وتىرىپ, عىلىم اكادەميالارىمەن جانە الەمنىڭ 30 ەلىنىڭ ءتۇرلى قورلارىمەن شىعارماشىلىق بايلانىستا جۇمىس ىستەۋدە, ال تاياۋدا ىرگەلى عىلىمنىڭ قورى شوعىرلانعان شانحاي ىنتىماقتاستىق ۇيىمى جانىنداعى اكادەمياارالىق كەڭەستىڭ مۇشەسى بولىپ تانىلدى. كۇنى بۇگىنگە دەيىن اتقارىلعان وسى يگى ىستەردىڭ بارلىعى قازاقستاندىق عالىمداردىڭ حالىقارالىق ارەناعا شىعۋىنا ىقپال ەتەتىنى انىق.
ەل عىلىمىنىڭ مىندەتتەرى مەن ماسەلەلەرى تالقىعا تۇسكەن بۇل جيىندا «وتاندىق تاريح عىلىمى: مەجەلەر مەن مىندەتتەر», ۇلتتىق تاريح جانە زەرتتەۋشى جاۋاپكەرشىلىگى», «قازاقستاننىڭ ەرتە تاريحى جانە باتىس ەۋروپا دەرەككوزدەرى», «شىعىس دەرەككوزدەرىندەگى قازاقستان تاريحى», «قازاق كسر عىلىم اكادەمياسى ستاليندىك-سۇرگىن جىلدارىندا» جانە باسقا باياندامالار تىڭدالدى.
جالپى جينالىستا ءمالىم بولعانداي, ەسەپ بەرۋ مەرزىمىندە قر ۇعا تاراپىنان عىلىم تۋرالى ۇلتتىق باياندامانىڭ 4 تومى دايىندالىپ جارىققا شىقسا, سونىمەن قاتار 8 عىلىمي جۋرنال بەتتەرىندە 2 مىڭنان اسا عىلىمي ماقالالار, قازاقستان عالىمدارىنىڭ كىتاپتارىنا 10 پىكىر, قر ۇعا تورالقاسىنىڭ ماتەريالدارىمەن بىرگە قر ۇعا مۇشەلەرىنىڭ قىزمەتتەرى تۋرالى اقپاراتتىق ماتەريالدار جاريالانعان. قازاقستان عالىمدارى فورۋمى اياسىندا ەلباسىمىز ن.نازارباەۆ عىلىم تۋرالى ۇلتتىق باياندامانىڭ حالىقارالىق ستاندارت تالاپتارىنا سايكەس كەلەتىن جاڭا ۇلگىسىنىڭ دايىندالۋى قاجەتتىلىگىن اتاپ كورسەتكەن ەدى. بيىلعى جىلدان باستاپ ۇلتتىق عىلىم اكادەمياسى ۇلتتىق بايانداماسىن قر پرەزيدەنتى جارلىعىنىڭ جاڭا ەرەجەلەرىنە سايكەس دايىندايتىن بولادى.
قانات ەسكەندىر,
«ەگەمەن قازاقستان».
الماتى.