وسىدان ءدال 96 جىل بۇرىن, ياعني 1924 جىلدىڭ 4 مامىرىندا VIII جازعى وليمپيا ويىندارى باستالعان ەدى.
بايراقتى باسەكەنى وتكىزۋگە لوس-اندجەلەس, بارسەلونا, امستەردام, ريم, پاريج جانە پراگا سىندى التى قالا ءوز وتىنىشتەرىن ءبىلدىردى. سولاردىڭ اراسىنان تاڭداۋ فرانتسيانىڭ استاناسىنا ءتۇستى. ايتۋلى جارىستا 44 مەملەكەتتەن كەلگەن 3089 سپورتشى باق سىنادى. سايىستار 17 سپورت ءتۇرى بويىنشا ءوتىپ, 126 جۇلدە جيىنتىعى ساراپقا سالىندى.
جارىس قورىتىندىسى بويىنشا جالپى كومادالىق ەسەپتە اقش قۇراماسى الدىنا جان سالمادى. ولار 99 (45 التىن+27 كۇمىس+27 قولا) جۇلدەنى ولجالادى. ەكىنشى جانە ءۇشىنشى ورىنداردى فينليانديا (14+13+10) مەن فرانتسيا (13+15+10) يەلەندى. ال ءتورتىنشى جانە بەسىنشى ساتىلارعا ۇلىبريتانيا (9+13+12) مەن يتاليا (8+3+5) جايعاستى.
جەكەلەگەن تۇلعالار جايىندا ايتار بولساق, فينليانديالىق جەلاياق پااۆو نۋرۋمي بەس التىن جۇلدەنى ولجالاپ, پاريج وليمپياداسىنىڭ ەڭ ۇزدىك سپورتشىسىنا تيەسىلى ارنايى سىيلىقتى يەلەندى. ءدال وسى دودادا دجون ۆايسميۋللەر دە دارلاندى. امەريكانىڭ ماقتانىشى ەركىن ءتاسىل بويىنشا 100 جانە 400 مەترگە جۇزۋدە عالامات كورسەتكىشكە قول جەتكىزدى. كەيىننەن دجون «تارازان» فيلمىنە ءتۇسىپ, اكتەرلىك قىرىنان دا تانىلدى.