حان اپانى ارىپتەستەرى مەن شاكىرتتەرى ەسكە الدى

كسرو مەملەكەتتىك سىيلىعىنىڭ لاۋرەاتى, ء«داۋىردىڭ دارا ۇستازى» اتانعان قانيپا بىتىباەۆانىڭ 75 جىلدىعىنا وراي «ۇستازدارعا ۇستاز بولعان – اسىل جان» اتتى اپتالىق ءوتتى. قازىرگى ەلدەگى جاعدايعا بايلانىستى قاشىقتان ۇيىمداستىرىلعان اپتالىقتىڭ وتۋىنە وبلىستىق ءبىلىم باسقارماسىنىڭ باسشىسى سايرانگۇل ءجۇمادىلوۆا قولداۋ كورسەتتى. ورايى كەلگەندە ايتا كەتەيىك, بۇگىن ۇلى ۇستازدىڭ تۋعان كۇنى.

جەتى كۇنگە جوسپارلانعان ءىس-شارا اياسىندا اباي مەن مۇحتاردى دارىپتەگەن ۇلاعاتتى ۇستاز جايلى بەينەروليكتەر كورسەتىلدى. سونداي-اق رەسپۋبليكالىق قازاق ءتىلى مەن ادەبيەتىنەن وتكىزىلەتىن پاندىك وليمپيادانىڭ ءانۇرانىنا اينالعان «سارقىلمايتىن ساعىنىشىم – حان اپا» اتتى ءان ناقىشىنا كەلتىرە شىرقالدى.

اپتالىق بارىسىندا كوزى تىرىسىندە-اق اتى اڭىزعا اينالعان قانيپا بىتىباەۆانىڭ ارىپتەستەرى مەن شاكىرتتەرى رەسپۋبليكانىڭ تۇكپىر-تۇكپىرىنەن جۇرەكجاردى لەبىزدەرىن بەينەروليك ارقىلى جولدادى. سونىڭ ىشىندە ۇلاعاتتى ۇستازدىڭ اتىنا تۇڭعىش رەت وقۋ گرانتىن بولگەن س.امانجولوۆ اتىنداعى شقمۋ-دىڭ رەكتورى مۇحتار تولەگەننىڭ قازاقتىڭ حان اپاسىنا ارناعان جىلى لەبىزى قاتىسۋشىلاردىڭ جۇرەگىن ەلجىرەتتى. بۇدان سوڭ شىعىس قازاقستان گۋمانيتارلىق كوللەدجىنىڭ ديرەكتورى فارحاد قۇرمانوۆ ءسوز الىپ, كورنەكتى ۇستاز تۋرالى لەبىزىن جەتكىزدى. «ۇلاعاتتى ۇستازىم قانيپا ومارعاليقىزى مەنىڭ ادام رەتىندە قالىپتاسۋىما جانە عىلىم جولىنا بەت بۇرۋىما ۇلكەن ەڭبەك ءسىڭىردى. مەنىڭ ەكىنشى انامداي بولدى. سوناۋ 1987 جىلدان ماعان قازاق ءتىلى مەن ادەبيەتى پانىنەن ساباق بەردى. سوندا حان اپامىز بىزگە «كىم بولامىن؟» دەگەن تاقىرىپتا شىعارما جازدىردى. ول كەزدە ءبارىمىز باسقا ماماندىق يەسى بولامىز دەپ ويىمىزدى بىلدىردىك. الايدا ۋاقىت وتە كەلە قانيپا بىتىباەۆا ءبىزدى ادەبيەت نارىمەن سۋسىنداتتى. ءبىز ونىڭ ساباقتارىنا اسقان قىزىعۋشىلىقپەن دايىندالدىق. 11 سىنىپتى بىتىرگەندە 25 وقۋشىنىڭ 20-سى قازاق ءتىلى مەن ادەبيەتى ءپانى مۇعالىمى ماماندىعىنا وقۋعا ءتۇستى. مەن قانيپا اپايدىڭ اۆتورلىق سىنىبىنىڭ العاشقى تۇلەگىمىن. ۇستازىم مەنىڭ ۋنيۆەرسيتەت قابىرعاسىنداعى العاشقى عىلىمي جەتەكشىم بولدى. اباي مەن مۇحتاردى زەرتتەۋگە باعىت-باعدار بەردى. ۇستاز بەينەسى ءبىزدىڭ ماڭگى جۇرەگىمىزدە ساقتالادى» دەيدى س.امانجولوۆ اتىنداعى شقمۋ-دىڭ پروفەسسورى, ابايتانۋشى ايجان قارتاەۆا.

اپتالىق كەزىندە جامبىل اتىنداعى مامانداندىرىلعان مەكتەپ-گيمنازيا-ينتەرناتىنىڭ 7-11 سىنىپتار اراسىنداعى تاربيە جەتەكشىلەرىنىڭ باستاۋىمەن قانيپا ومارعاليقىزىنا ارنالعان چەللەندج ۇيىمداستىرىلدى. وعان گۇلنار ومارباەۆا, قارلىعاش ساعيدوللدينا, بايان قىرىقباەۆا, ءجاميلا احمەتوۆا, كەنجەگۇل ەلەۋسىزوۆا, ينديرا الىمحانقىزى, ءانيا رايسوۆا سىندى بىرقاتار قىزمەتكەرلەر قاتىستى. «بيىلعى جىلدىڭ ەرەكشەلىگى سول, ۇلى اقىن اباي قۇنانباي ۇلىنىڭ 175 جىلدىق مەرەيتويى مەن كسرو مەملەكەتتىك سىيلىعىنىڭ لاۋرەاتى قانيپا ومارعاليقىزىنىڭ 75 جىلدىعى تۇسپا-تۇس كەلىپ وتىر. اپاي ۇستازدىقتى ۇلىقتاعان ەرەكشە تۇلعا ەدى. ونىڭ بۇل سالاداعى سىڭىرگەن ەڭبەگى زور» دەيدى پەداگوگيكا عىلىمدارىنىڭ دوكتورى, پروفەسسور فاۋزيا ورالباەۆا.

اپتالىق بارىسىندا «ماقتانساڭ, قانيپام دەپ قازاق ماقتان» اتاۋىمەن قانيپا بىتىباەۆانىڭ رەسپۋبليكالىق عىلىمي-ادىستەمەلىك زەرتحاناسىنىڭ جۇمىسى ۇستازدار قاۋىمىنىڭ نازارىنا ونلاين رەجيمدە ۇسىنىلدى. وسى ماقساتتا 60-قا تارتا بەينەروليك ءتۇسىرىلدى. «قانيپا بىتىباەۆا ەسىمى التىن ارىپتەرمەن جازىلاتىن ۇلى تۇلعا. مەن ءۇشىن تەك قانا قازاق ءتىلى مەن ادەبيەتىنىڭ مۇعالىمى عانا ەمەس, جالپى قازاق ۇستازىنىڭ سيمۆولى, ەتالونى دەر ەدىم. ونىڭ ءبىر اۋىز ءسوزى مەنىڭ وعان دەگەن قۇرمەتىمدى ارتتىردى. حان اپا ايتۋشى ەدى: «ەگەر ماعان حان تاعىن ۇسىنسا, مەن وعان ەشقاشاندا ۇستازدىق جولىمدى ايىرباستاماس ەدىم» دەپ. وسى ارقىلى ول ءبىزدىڭ بويىمىزعا ادالدىقتى ءسىڭىردى دەيدى حالىقارالىق ۇلتتىق يۋنەسكو كلۋبتارى فەدەراتسياسى كلۋبىنىڭ ۆيتسە-پرەزيدەنتى عاني بەيسەنباەۆ.

شىعىس قازاقستان وبلىسى