ەلوردادا «زەينەتاقى جۇيەسىن جاڭعىرتۋدىڭ گەندەرلىك اسپەكتىلەرى» اتتى سەمينار-كەڭەس بولىپ ءوتتى. وعان پرەزيدەنت كەڭەسشىسى, پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات ءجونىندەگى ۇلتتىق كوميسسيانىڭ ءتورايىمى گۇلشارا ءابدىقالىقوۆا, ەڭبەك جانە حالىقتى الەۋمەتتىك قورعاۋ مينيسترى تامارا دۇيسەنوۆا, «باس رەداكتورلار كلۋبى» قوعامدىق بىرلەستىگىنىڭ پرەزيدەنتى كەنجەبولات جولدىباي, سونداي-اق, بىرقاتار رەسپۋبليكالىق بۇقارالىق اقپارات قۇرالدارىنىڭ وكىلدەرى قاتىسىپ, ءوز وي-پىكىرلەرىن ورتاعا سالدى.
ەلوردادا «زەينەتاقى جۇيەسىن جاڭعىرتۋدىڭ گەندەرلىك اسپەكتىلەرى» اتتى سەمينار-كەڭەس بولىپ ءوتتى. وعان پرەزيدەنت كەڭەسشىسى, پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات ءجونىندەگى ۇلتتىق كوميسسيانىڭ ءتورايىمى گۇلشارا ءابدىقالىقوۆا, ەڭبەك جانە حالىقتى الەۋمەتتىك قورعاۋ مينيسترى تامارا دۇيسەنوۆا, «باس رەداكتورلار كلۋبى» قوعامدىق بىرلەستىگىنىڭ پرەزيدەنتى كەنجەبولات جولدىباي, سونداي-اق, بىرقاتار رەسپۋبليكالىق بۇقارالىق اقپارات قۇرالدارىنىڭ وكىلدەرى قاتىسىپ, ءوز وي-پىكىرلەرىن ورتاعا سالدى.
«مەملەكەت باسشىسىنىڭ 2012 جىلعى 27 قاڭتارداعى «الەۋمەتتىك-ەكونوميكالىق جاڭعىرتۋ – قازاقستان دامۋىنىڭ باستى باعىتى» اتتى ەل حالقىنا جولداۋىندا جانە ۇكىمەتتىڭ بيىلعى جىلعى قاڭتاردا وتكەن كەڭەيتىلگەن وتىرىسىندا بەرگەن تاپسىرمالارىن ورىنداۋ ماقساتىندا قازاقستاندا زەينەتاقى جۇيەسىن كەزەڭ-كەزەڭىمەن جاڭعىرتۋ جۇرگىزىلۋدە», دەدى وتىرىستا ەڭبەك جانە حالىقتى الەۋمەتتىك قورعاۋ ۆيتسە-مينيسترى سۆەتلانا جاقىپوۆا. سونداي-اق, ول جاڭعىرتۋدىڭ ماقساتى زەينەتاقىمەن قامسىزداندىرۋدىڭ كوپ دەڭگەيلى ۇلگىسىن ساقتاپ, جوعالتىلعان تابىستى زەينەتاقى تولەمىمەن الماستىرۋ مولشەرلەمەسىن ارتتىرا وتىرىپ, ازاماتتاردى زەينەتاقىمەن قامسىزداندىرۋ سالاسىنداعى تۇتاس مەملەكەتتىك ساياساتتى قالىپتاستىرۋ مەن زەينەتاقى جۇيەسىنىڭ قارجىلىق تۇراقتىلىعىن قامتاماسىز ەتۋ بولىپ تابىلاتىندىعىن تىلگە تيەك ەتتى.
جيىندا باق وكىلدەرى تاراپىنان دا بىرقاتار ماسەلەلەر كوتەرىلدى. ماسەلەن, دەموگرافيانى كوتەرۋدە بوسانعان ايەلدەردىڭ قاسىندا ەرىنە كەمىندە 40 كۇندىك دەمالىس بەرىلۋ كەرەكتىگى جايىندا ۇسىنىس ايتىلدى. قالالى جەرلەردە تۋعان-تۋىسسىز بوسانعان ايەلگە اياق-قولىن باۋىرىنا العانشا ەرىنەن باسقا كىم قارايدى, سوندىقتان مۇنى دا ەسكەرگەن ءجون دەگەن پىكىرلەر دە نازاردان تىس قالمادى.
سەمينار-كەڭەستى قورىتىندىلاعان پرەزيدەنتتىڭ كەڭەسشىسى, پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ ءتورايىمى گ.ءابدىقالىقوۆا اتالعان شاراعا باق وكىلدەرىنىڭ ارنايى كەلىپ قاتىسىپ, ۇسىنىس-پىكىرلەر ايتقانىنا ريزاشىلىعىن ايتا كەلە, كوتەرىلگەن ماسەلەلەر جونىندە جۇمىستار جۇرگىزىلەتىندىگىن جەتكىزدى.
ءابدىراحمان قىدىربەك,
«ەگەمەن قازاقستان».