اڭىزعا اينالعان چەبۋراشكا ەكى ەل اراسىنداعى تۇسىنبەستىكتىڭ سەبەبى بولايىن دەپ تۇر. رەسەيلىك انيماتورلار جاپونيا مۋلتيپيليكاتورلارىنىڭ چەبۋراشكانى قايتالايتىن قالقان قۇلاق كەيىپكەرلەر تۋرالى جاڭا فيلمدەر شىعارۋعا قۇقى جوق دەپ وتىر.
«سويۋزمۋلتفيلم» كينوستۋدياسىنىڭ باسقارما توراعاسى يۋليانا سلاششەۆا كومپانيا جاپوندىق تاراپتىڭ چەبۋراشكا بەينەسىن پايدالانۋ قۇقىعىنان باس تارتۋدى تالاپ ەتۋگە نيەتتى ەكەنىن ايتىپتى. مۇنداي مالىمدەمە جاپونيادا چەبۋراشكا تۋرالى العاشقى 3D مۋلتفيلم تانىستىرىلعاننان كەيىن ايتىلدى. جوبا اۆتورلارى چەبۋراشكانى 3D فورماتىندا شىعارعان.
ء«بىز كەلىسىمنىڭ قازىرگى نۇسقاسىن جارامسىز دەپ سانايمىز. مەنىڭ ويىمشا, تاعى ءبىر شەشىم, مەملەكەتتىك جانە ۇكىمەتارالىق دەڭگەيگە چەبۋراشكا قۇقىعىن قايتارۋ ماسەلەسىن شەشۋ. قالاي بولعاندا دا, جاقىن ارادا ءبىز قۇقىقتى قايتارۋ ماسەلەسىن بايىپتى تۇردە شەشۋگە نيەتتىمىز», دەدى سلاششەۆانىڭ ءسوزىن كەلتىرگەن تاسس.
سوڭعى جىلدارى «سويۋزمۋلتفيلم» مۋلتفيلمدەردىڭ «التىن كوللەكتسياسى» دەپ اتالاتىن ايگىلى فيلمدەرگە قاتىستى اۋديوۆيزۋالدى قۇقىقتاردى قايتارۋ ماسەلەسىمەن اينالىسۋدا. ستۋديا باسشىلىعىنىڭ ايتۋىنشا, وسى ۋاقىتقا دەيىن قۇقىقتاردىڭ 90 پايىزدان استامى قايتارىلعان. چەبۋراشكا جازۋشى ەدۋارد ۋسپەنسكيدىڭ «كروكوديل گەنا جانە ونىڭ دوستارى» كىتابىندا العاش رەت پايدا بولدى.
جازۋشى 2006 جىلى «پولەزنايا پلوششاد. نەدۆيجيموست» باسىلىمى تىلشىسىمەن كەزدەسكەن كەزدە كەيىپكەرى تۋرالى يدەيانىڭ تۋىنا سەبەپ بولعان وقيعا تۋرالى ايتىپ بەرگەن. دوستارىنا قوناققا كەلگەن جازۋشى ەتەگى ەدەندە وراتىلىپ جۇرگەن شۋبانى كيىپ, ءسۇرىنىپ-قابىنىپ جۇرگەن كىشكەنتاي قىزدى كورەدى. قىز بالا شۋبانىڭ ەتەگىنە شالىنىپ, جەتى رەت قۇلاسا دا ۇستىندەگىسىن شەشپەيدى جانە ەشكىمنىڭ سۇيەمەلدەۋىنسىز جىعىلعان جەرىنەن ءوزى تۇرىپ كەتەدى. اكەسى قىزىنا كەيىپ: «وي, وپيات چەبۋراحنۋلاس!؟» دەيدى. كەيىن سۇراستىرسا, ورىس تىلىندە سيرەك كەزدەسەتىن «چەبۋراحنۋتسيا» ءسوزىنىڭ ماعىناسى, قۇلاپ قالسا دا ەكى اياعىمەن تىك تۇراتىنداردى چەبۋراشقا دەپ اتاعان.
ەدۋارد ۋسپەنسيدىڭ اتاقتى كەيىپكەرى تۋرالى يدەيا وسىلاي پايدا بولعان. «چەبۋراشكا بالالار مەن ەرەسەكتەردىڭ ناعىز سۇيىكتىسىنە اينالدى. ەكراندا العاش رەت چەبۋراشكا 1969 جىلى «كروكوديل گەن» انيماتسيالىق فيلمىندە پايدا بولدى. كەيىنىرەك, ء«سويۋزمۋلتفيلمنىڭ» التىن قورى «چەبۋراشكا» (1971), «شاپوكلياك» (1974), «چەبۋراشكا» مەكتەپكە بارادى (1983) كينولارىمەن تولىقتى.
چەبۋراشكا جاپونياعا قالاي ساتىلدى؟
2003 جىلى توكيوداعى حالىقارالىق انيماتسيا جارمەڭكەسىندە SP International جاپون كومپانياسى «سويۋزمۋلتفيلمنەن» 2023 جىلعا دەيىن جاپونيادا چەبۋراشكا تۋرالى مۋلتفيلمدەر تاراتۋ قۇقىعىن الدى.
چەبۋراشكا جاپونيادا پايدا بولۋى ناعىز سەنساتسيا بولدى. كەيبىر ساياساتكەرلەر كوممۋنيستىك ۇگىت-ناسيحات دەپ قابىلداپ, سىننىڭ استىنا العان دەسەدى. 2010 جىلدىڭ مامىر ايىندا چەبۋراشكا تۋرالى ءمۋلتفيلمنىڭ جاپوندىق نۇسقاسى جارىق كوردى. جاپون اۆتورلارى كەيىپكەرلەردىڭ شىتىرمان وقيعالارى تۋرالى جاڭا اڭگىمەلەر بولسا دا, تۇپنۇسقا ءفيلمنىڭ فورماتىن ساقتاۋعا تىرىستى. سونىمەن قاتار, 26 ءۇش مينۋتتىق ەپيزودتان تۇراتىن «چەبۋراشكا ارەرە» انيماتسيالىق سەرياسى بار.
ايتا كەتۋ كەرەك, جاڭا چەبۋراشكا ءتۇرلى-ءتۇستى سىزىلعان انيماتسيالىق سەرياعا اينالدى. العاش رەت جاپونيادا «چەبۋراشكا جانە كروكوديل گەنا» ءمۋلتفيلمى 2001 جىلى كورسەتىلگەندە 700 مىڭ ادام تاماشالاعان. وسىدان كەيىن «چەبۋراشكا» دەپ اتالاتىن رەسمي سايت پايدا بولدى. الايدا, جاپون انيماتورلارىنىڭ كەيىپكەرلەرى مەن مازمۇنى ەدۋارد ۋسپەنسكيدىڭ تۇپنۇسقاسىنان الىستاتپاعان.
2013 جىلى چەبۋراشكا تۋرالى جاپون قۋىرشاق ءمۋلتفيلمىن جاساۋشى ماكوتو ناكامۋرا چەبي دەپ اتالاتىن جاڭا فيلم شىعاردى, اۆتور ءتۇپ-نۇسقادان الىستاپ كەتپەي, چەبي تۋرالى ەل ىشىندەگى اڭگىمەلەرمەن تولىقتىرعان. بۇل فيلم رەسەيدە كورسەتىلدى.
بىراق بۇل دا جاپونيانىڭ انيماتورلارى مەن «سويۋزمۋلتفيلم» اراسىنداعى كەلىسپەۋشىلىكتىڭ توڭىن جىبىتە الماعان سياقتى. ەرەسەكتەر اراسىنداعى تالاس-تارتىستان چەبۋراشقا مەن چەبيدى جاقسى كورىپ ۇلگەرگەن ەكى ەلدىڭ بالالارى زارداپ شەكپەسە بولعانى.
الماتى