كارانتين باستالعالى بەرى رەسپۋبليكا بويىنشا ونلاين رەجيمدە 30 ملن كورەرمەنگە دەيىن قامتيتىن 15 مىڭ ءىس-شارا ءوتتى. بۇل تۋرالى مادەنيەت جانە سپورت ءمينيسترى اقتوتى رايىمقۇلوۆا ورتالىق كوممۋنيكاتسيالار قىزمەتىندە وتكەن ونلاين بريفينگە ايتتى.
«مادەنيەت جانە سپورت مينيسترلىگى مەن «قازاقتەلەكوم» اق بىرلەسىپ ازىرلەگەن «كارانتيندەگى جۇلدىز» ونلاين جوباسىنا كورەرمەندەر تاراپىنان جاقسى پىكىرلەر ايتىلىپ جاتىر. جوبا ىسكە قوسىلعان ساتتەن باستاپ قازاقستاندىق ونەر جۇلدىزدارىنىڭ قاتىسۋىمەن 15 ملن كورەرمەنگە دەيىن قامتيتىن 30 ونلاين كونتسەرت ءوتتى», دەدى اقتوتى رايىمقۇلوۆا.
سونداي-اق ول رەسپۋبليكالىق ۇيىمدارمەن قاتار وڭىرلەردەگى مادەنيەت مەكەمەلەرى دە ونلاين فورماتتاعى ءىس-شارالار وتكىزىپ جاتقانىن اتاپ ءوتتى.
«جالپى كارانتين باستالعالى بەرى رەسپۋبليكا بويىنشا ونلاين رەجيمدە 15 مىڭ ءىس-شارا وتكىزىلىپ, شامامەن 30 ملن كورەرمەن بولعان ەكەن. جۇرگىزىلگەن تالداۋ بارىسىندا ءبىزدىڭ ازاماتتارىمىزدىڭ جۇزەگە اسىرىلىپ جاتقان ءار ءتۇرلى جانرلىق جوبالار مەن ءىس-شارالارعا قىزىعۋشىلىق تانىتاتىنىن بايقادىق. ماسەلەن ءبىر عانا ونلاين كونتسەرت 1 ملن ادامعا دەيىن اۋديتوريانى جينايدى ەكەن. ءبىز بۇعان وتە قۋانىشتىمىز. ءارى قاراي دا جۇمىستارىمىزدى جالعاستىرامىز», دەدى مينيستر.