ەلوردادا 42 500 تەڭگە كولەمىندەگى الەۋمەتتىك كومەكتى 170 مىڭعا جۋىقتادام الدى. 353 مىڭ ءوتىنىم ءتۇستى. جۇمىسپەن قامتۋ جانە الەۋمەتتىك قورعاۋ باسقارماسىنىڭ باسشىسى ساۋلە نۇرعوجينا اتاپ وتكەندەي وتىنىمدەردىڭ اراسىندا ءبىر ادامنان بىرنەشە رەت كەلگەن, ءجيى قايتالاناتىندارى دا بار.
«ماماندار دەمالىسسىز كۇشەيتىلگەن تارتىپتە جۇمىس ىستەپ جاتىر. وتىنىمدەردى «ازاماتتارعا ارنالعان ۇكىمەت» كەاق-مەن جانە مەملەكەتتىك الەۋمەتتىك ساقتاندىرۋ قورىمەن (ماسق) بىرلەسە قاراستىرىپ جاتىرمىز. ۋاقىتتىڭ ءبىر بولىگى بارلىق دەرەكتەردى تەكسەرۋگە كەتىپ جاتىر. قازىرگى تاڭدا جۇمىس جاساپ جاتقان تۇرعىندار دا ءوتىنىم بەرۋدە, ولاردىڭ ىشىندە ەڭبەكاقىسى 500 مىڭ تەڭگەنى قۇرايتىندارى دا بار. كەي ادام بىرنەشە قايتارا رەت ءوتىنىم بەرۋدە. وسىنىڭ بارلىعى وتىنىمدەردى تەكسەرۋ ۋاقىتىنا اسەر ەتەدى. ماماندار ءار ءوتىنىمدى مۇقيات تەكسەرەدى. ۋاقىتتى ۇنەمدەۋ جانە وتىنىمدەردى وڭدەۋ جىلدامدىعىن ارتتىرۋ ءۇشىن ءوتىنىمدى تەك ءبىر رەت عانا جىبەرۋ كەرەك», - دەدى جۇمىسپەن قامتۋ جانە الەۋمەتتىك قورعاۋ باسقارماسىنىڭ باسشىسى ساۋلە نۇرعوجينا.
توتەنشە جاعداي كەزىندە قارجى كومەگىن بۇرىن رەسمي جۇمىس ىستەگەن ادامدار عانا ەمەس, ءوزىن-ءوزى جۇمىسپەن قامتىعاندار, ءبىر جىلدان استام ۋاقىت ىشىندە دەكرەتتىك دەمالىستا بولعان ايەلدەر, ستۋدەنتتەر دە الا الادى. ءوتىنىشتى «ەلەكتروندىق ۇكىمەت» ۆەب-پورتالى, telegrambot egov.kz نەمەسە 42500.enbek.kz سايتى ارقىلى ەلەكتروندىق فورماتتا بەرۋگە بولادى. قوسىمشا اقپارات الۋ ءۇشىن جۇمىسپەن قامتۋ جانە الەۋمەتتىك قورعاۋ باسقارماسىنا 55-14-87, 55-01-74, 55-69-59, 55-67-12, 109(iKomek) حابارلاسۋعا بولادى.