پرەزيدەنت جانىنداعى ورتالىق كوممۋنيكاتسيالار قىزمەتىنىڭ الاڭىندا قازاقستان قارۋلى كۇشتەرى باس شتابى باستىعىنىڭ ورىنباسارى سەرىك بورانباەۆ قارۋلى كۇشتەردىڭ اۋماقتىق اسكەرلەرىن جاساقتاۋ ماقساتىندا اسكەري مىندەتتىلەردى ارنايى جيىندارعا شاقىرۋ بارىسى تۋرالى بريفينگ وتكىزدى.
س.بورانباەۆتىڭ ايتۋىنشا, مەملەكەت باسشىسى قاسىم-جومارت توقاەۆتىڭ «اسكەري مىندەتتىلەردى ارناۋلى جيىندارعا شاقىرۋ تۋرالى» جارلىعىنا سايكەس, بۇگىندە نۇر-سۇلتان, الماتى قالالارى مەن اقمولا, الماتى, قىزىلوردا جانە پاۆلودار وبلىستارىندا اۋماقتىق اسكەري بولىمشەلەر قۇرىلدى.
سونداي-اق اقتوبە جانە اتىراۋ وبلىستارىندا اسكەري مىندەتتىلەردى شاقىرۋ جالعاسۋدا. شىمكەنت قالاسى مەن قاراعاندى وبلىسىندا اسكەري بولىمشەلەردى جاساقتاۋدىڭ باستالۋى 13 ساۋىرگە, سولتۇستىك قازاقستان وبلىسىندا – 14 ساۋىرگە, جامبىل وبلىسىندا – 15 ساۋىرگە, تۇركىستان وبلىسىندا 17 ساۋىرگە جوسپارلانعان.
– قورعانىس مينيسترلىگى تاراپىنان الدىن الا قابىلدانعان ۇيىمداستىرۋ-تەحنيكالىق سيپاتتاعى شارالاردىڭ, سونداي-اق كارانتيندىك شەكتەۋلەردىڭ كۇردەلى جاعدايلارىندا جەرگىلىكتى اسكەري باسقارۋ ورگاندارى مەن مەديتسينا قىزمەتكەرلەرىنىڭ ۇيلەسىمدى جۇمىسىنىڭ ناتيجەسىندە قىسقا مەرزىمدە ارنايى جيىنعا – 473 اسكەري مىندەتتىنى, سونىڭ ىشىندە 71 وفيتسەر مەن 402 سەرجانتتى, زاپاستاعى ساربازداردى شاقىرۋعا مۇمكىندىك بەردى, – دەدى س.بورانباەۆ.
جەرگىلىكتى اسكەري باسقارۋ ورگاندارىنا ەرىكتى تۇردە شاقىرىلۋ ءۇشىن 2372 جاس ازامات ءوتىنىش ءبىلدىردى. ال اسكەري مىندەتتىلەردىڭ ورتاشا جاسى قازىرگى ۋاقىتتا 27,5 جاستى قۇرايدى.
اسكەري مىندەتتىلەردىڭ 34%-ى جۇمىسقا ورنالاستىرىلدى. ولاردىڭ ورتاشا ەڭبەكاقىسى – 82 000 تەڭگە. قورعانىس مينيسترلىگىنىڭ باسشىلىعى اسكەري پوليتسيانى تارتا وتىرىپ, اسكەري مىندەتتىلەردى شاقىرۋ بارىسىنا, سانيتارلىق-گيگيەنالىق نورمالاردىڭ, اسكەري ءتارتىپتىڭ ساقتالۋىنا جۇيەلى باقىلاۋ ۇيىمداستىردى. حالىققا ارناۋلى جيىندارعا شاقىرۋ شارتتارىن جەدەل ءتۇسىندىرۋ ءۇشىن قورعانىس مينيسترلىگى مەن قورعانىس ىستەرى جونىندەگى وڭىرلىك دەپارتامەنتتەردە 4 ساۋىردەن باستاپ تاۋلىك بويى 18 Call-ورتالىق جۇمىس ىستەيدى.