بيىل ءساۋىر ايى باستالعان كۇنى بەلگىلى اقىن, عالىم سەرىكباي وسپانوۆ 75 جاسقا تولدى. ءبىر قولىن شىعاناقتان جاۋدىڭ وعى ۇشىرعان مايدانگەردىڭ ۇلى عوي. جەڭىسپەن قۇرداس ەكەن.
ميلليونداعان ادامنىڭ قولىن عانا ەمەس, ءومىرىن جۇتقان ەكىنشى دۇنيەجۇزىلىك سوعىستىڭ اۋقىمى دا كوروناۆيرۋس سەكىلدى جەر ءجۇزىن تۇگەل قامتي الماپ ەدى. ءبىزدىڭ ۇرپاق ەستىمەگەن ناۋبەت جەردەگى پەندەنىڭ بارلىعىن ءبىر تارىنىڭ قاۋىزىنا سىيعىزىپ, ءبىر ۋىس ەتتى. جەر-انا بۋسانىپ, قىم-قۋىت جۇمىستىڭ باستالار كەزىندە اياققا تۇساۋ سالىنعانداي, جۇرت قامالىپ ۇيدە وتىر. ايتەۋىر تىعىرىقتان جول تاۋىپ تۇرعان ينتەرنەت پەن تەلەفون عانا. وقىرماندارى, قالامداستارى, جولداس-جورا, اعايىن-جەكجاتى اقىندى تۋعان كۇنىمەن, مەرەي جاسىمەن جاپىرلاي قۇتتىقتاپ جاتتى. «سەرىكباي اعا, جاساي بەرىڭىز! قالامىڭىز تالماسىن!» دەگەن تىلەكتەر جىلداعىداي اقىن داستارقانىنىڭ باسىندا نەمەسە وعان قۇرمەت كورسەتىلەتىن كەزدەسۋلەردە ايتىلماي, الەۋمەتتىك جەلىلەردە تىزبەكتەلە جازىلدى. وسىنداي تىلەكتى ايتقان ءبىز دە, تەلەفوننىڭ ار جاعىنداعى اقىنعا:
– سەرىكباي اعا, كارانتين بولعالى ۇيدە نەمەن اينالىستىڭىز؟ جازۋ شىعار؟ – دەيمىز.
– ءيا, جازۋ قالمايدى عوي. بىراق مەن ونىڭ سىرتىندا بەسىك جاساپ جاتىرمىن. ۇيدە وتىرعالى التى بەسىك جاساپ قويدىم, – دەيدى سەرىكباي اعا.
قازاق ادەبيەتىنە ليريكالىق پوەزياسىمەن سالىم سالعان, ال سوڭعى جىلدارى ىبىراي ءالتىنساريندى زەرتتەپ, ىبىرايتانۋعا سۇبەلى ۇلەس قوسىپ جۇرگەن سەرىكباي وسپان ۇلىن جۇرت قولونەر شەبەرى رەتىندە دە جاقسى بىلەدى. اكەسى وسپاننان دارىعان ونەردى سەرىكباي اعاي وگەيسىتكەن ەمەس. ول جاساعان دومبىرا, ساندىق, ۇستەل, تاعى باسقا بۇيىمدار سۇلۋلىعىمەن ەرەكشەلەنەدى. بۇگىن دە ءوزى تۇراتىن جەر ءۇيدىڭ اۋلاسىنداعى كۇنشۋاقتا وتىرىپ, بەسىك جاسايدى. اقىننىڭ وسى جولى ۇلتتىق ناقىشپەن كومكەرىلگەن قاسيەتتى بەسىك جاساۋدى قولىنا الۋى كەزدەيسوق ەمەس سەكىلدى.
– كوروناۆيرۋسقا وسىلاي قارسىلاسىپ جاتىرمىز, – دەپ قويادى اقىن ءبىزدىڭ ويىمىزدى وقىعانداي. – سۇمدىق-اي, ۇيگە ادام كەلمەيدى, ءوزىمىز ۇيدەن شىقپايمىز. حابارلاسقاندار اراسىندا ۇيدە جاتىپ, ءىشى پىسقاندار دا بارشىلىق سەكىلدى. قاراپ وتىرۋ ءوزىم ءۇشىن قيىن ءىس. مەنى جازۋدان دەمالدىراتىن دا, شارشاعانىمدى باساتىن دا وسى قولونەرىم.
ونىڭ جاساعان بۇيىمدارىن سۇراۋشىلار دا جەتكىلىكتى. ەل ءىشى ەمەس پە, ساندىق تا, دومبىرا دا كوپ كۇتتىرمەي, يەسىن تاۋىپ كەتەدى. بىراق وسى جولى وعان بەسىك ءۇشىن ەشكىم الدىن الا سۇرانىس بەرمەپتى. ءوزى جاساپ, قاز-قاتار قويىپ جاتىر. قازاقتىڭ باسىنان قانداي ناۋبەت وتپەدى؟ حالقىمىزدىڭ قىناداي قىرىلعان كەزى تاريحتا از ەمەس. تورعاي وڭىرىندە بالاعا شىعاتىن قىزىلشادان ءۇي بوساپ قالعان كەزدەر دە بولعان ەكەن. ونىڭ شەت-جاعاسىن اقىننىڭ ءوزى دە بىلەدى. «قانشا ناۋبەت بولسا دا, كەلىندەر بەسىك تەربەتسىن, ەل ىرگەسى امان بولسىن» دەگەن تىلەكپەن قاسيەتتى بەسىك جاساۋدى قولىنا الدى-اۋ» دەپ اقىننىڭ ويىن ءبىز دە وقىعانداي بولدىق. شەبەردىڭ قولىنان شىققان بۇيىم جەردە قالمايدى دەدىك. جاقسى ىرىم ەكەنىن ايتسايشى!..
ءنازيرا جارىمبەت
قوستاناي