پرەزيدەنت جانىنداعى ورتالىق كوممۋنيكاتسيالار قىزمەتى الاڭىندا قورعانىس ءمينيسترى نۇرلان ەرمەكباەۆ «قازاقستان قارۋلى كۇشتەرىنىڭ اۋماقتىق اسكەرلەرىن جاساقتاۋ ءۇشىن اسكەري مىندەتتىلەردى ارنايى جيىندارعا شاقىرۋ تۋرالى» پرەزيدەنت جارلىعىن ءتۇسىندىردى.
جارلىقتىڭ نەگىزگى مازمۇنى – ايماقتارداعى اكىمدەرگە اۋماقتىق قورعانىس بريگاداسىنىڭ شتاتتىق قۇرامىنا قاراي بەلگىلى ءبىر ءوڭىردىڭ قاجەتتىلىگى نەگىزىندە اسكەري دايارلىقتان وتۋگە مىندەتتى تۇلعالاردى شاقىرۋعا مۇمكىندىك بەرۋ. بۇل شارا ەڭ الدىمەن ازاماتتارىمىزدىڭ قاۋىپسىزدىگىن ءتيىمدى ءارى تولىققاندى قورعاۋعا باعىتتالىپ وتىر.
ۆەدومستۆو باسشىسىنىڭ ايتۋىنشا, جارلىققا سايكەس اسكەري جيىندار 3 اي مەرزىمگە دەيىن سوزىلۋى مۇمكىن. الايدا ناقتى مەرزىمدى جەرگىلىكتى اكىمدەر بەلگىلەيدى. ولار ارنايى قاۋلى قابىلداپ, اسكەري جيىن ۇيىمداستىرادى. سونداي-اق قاجەتتىلىككە جانە بارلىق ءىس-شارالاردىڭ ورىندالۋىنا قاراي جيىنداردى توقتاتا الادى.
– بىرقاتار ايماقتا اسكەري جيىندارعا شاقىرۋ ماسەلەسى مۇلدە قاجەت بولماۋى دا مۇمكىن. اسكەري بولىمدەرىمىز ورنالاسقان ايماقتاردا اسكەري قىزمەتشىلەردىڭ باسىم بولىگى ءتۇرلى ءىس-شارالارعا جۇمىلدىرىلىپ ۇلگەردى. اسكەري قىزمەتشىلەردىڭ ءبىر بولىگى وزگە ايماقتارعا جىبەرىلدى. جالپى العاندا, قارۋشى كۇشتەرگە ارتىلعان مىندەتتەمەلەر تولىقتاي ورىندالۋدا, – دەدى ن.ەرمەكباەۆ.
«اسكەري قىزمەت جانە اسكەري قىزمەتشىلەردىڭ مارتەبەسى تۋرالى» جارلىعىنا سايكەس, اسكەري ەسەپتە تۇرعان جانە دەنساۋلىعى جارامدى دەپ تانىلعان ەل ازاماتتارى ارنايى جيىندارعا شاقىرىلۋعا جاتادى. الايدا, مەملەكەتتىك ورگانداردا قورعانىستى, قاۋىپسىزدىكتى جانە قۇقىقتىق ءتارتىپتى قامتاماسىز ەتەتىن لاۋازىمداردا جۇمىس ىستەيتىن ادامدار; مەملەكەتتىك, ازاماتتىق جانە سىناق اۆياتسيانىڭ اۆياتسيالىق قىزمەتكەرلەرى; اۋىل شارۋاشىلىعىندا جانە اۋىل شارۋاشىلىعى تەحنيكاسىن جوندەۋ ۇيىمدارىندا جۇمىس ىستەيتىن تۇلعالار ەگىس جانە وراق جۇمىستارى كەزەڭىندە; ءبىلىم بەرۋ ۇيىمدارىنىڭ كۇندىزگى وقۋ بولىمىندەگى پەداگوگتار وقۋ جىلى كەزەڭىنە; ءبىلىم بەرۋ ۇيىمدارىندا كۇندىزگى وقۋ بولىمىندە وقيتىندار; اسكەري مىندەتتى ايەلدەر; ون سەگىز جاسقا تولماعان ءۇش جانە ودان دا كوپ بالالارى بار ادامدار; قىلمىستىق زاڭناماعا سايكەس, ولارعا قاتىستى ءىس جۇرگىزۋ ارەكەتتەرى جۇزەگە اسىرىلاتىن ادامدار; پارلامەنتتىڭ نەمەسە جەرگىلىكتى وكىلدى ورگانداردىڭ دەپۋتاتتارى بولىپ سايلانعان (تاعايىندالعان) اسكەري مىندەتتىلەر اسكەري جيىندارعا شاقىرۋدان بوساتىلادى.
جيىن كەزىندە اسكەري مىندەتتىلەر قارۋلى كۇشتەردىڭ اسكەري قىزمەتشىسى مارتەبەسىن الادى جانە «اسكەري قىزمەت جانە اسكەري قىزمەتشىلەردىڭ مارتەبەسى تۋرالى» جارلىعىنا سايكەس, ولارعا الەۋمەتتىك سيپاتتاعى بارلىق جەڭىلدىكتەر قولدانىلادى. تاماقپەن, قاجەتتى زاتتارمەن جانە مەديتسينامەن قامتاماسىز ەتىلەدى.
سونىمەن قاتار اسكەري جيىندار كەزەڭىندە اسكەري مىندەتتىلەردىڭ جۇمىس ورنى جانە اتقاراتىن قىزمەتى ساقتالادى. ولارعا مەملەكەت ەسەبىنەن ورتاشا جالاقى, ال جۇمىس ىستەمەيتىن ادامدارعا – ەڭ تومەنگى ەڭبەكاقى مولشەرى تولەنەدى. ماسەلەن, اسكەري جيىنعا شاقىرىلعانعا دەيىن اسكەري قىزمەتشىنىڭ جالاقىسى 200 000 تەڭگەنى قۇراعان بولسا, جيىنداعى ءار ايدا ول 200000 تەڭگە الادى. ال ەڭ تومەنگى ەڭبەكاقى مولشەرى – 42500 تەڭگە.
ۆەدومستۆو باسشىسى اسكەري مىندەتتىلەر دەنساۋلىعىنا, وتباسى جاعدايىنا, جاسىنا قاراي قورعانىس ىستەرى جونىندەگى وڭىرلىك بولىمدەر (اسكەري كوميتەتتەر) ارقىلى جيىندارعا شاقىرىلاتىنىن اتاپ ءوتتى. جيىنعا شاقىرۋ كەزىندە ەرىكتىلەرگە بىرقاتار ارتىقشىلىق بەرىلەدى. ماسەلەن, ازاماتتار تۇرعىلىقتى جەرى بويىنشا جيىندارعا شاقىرىلاتىن بولسا, وندا كۇن سايىن قىزمەتتىك ءىس-شارالاردى ورىنداۋ اياقتالعاننان كەيىن ولار ءوز ۇيلەرىنە ورالا الادى.