وبلىستىق ءماسليحاتتىڭ كەزەكتى سەسسياسىندا وڭىرلىك بيۋدجەتتى ناقتىلاۋ جۇرگىزىلدى. جۇمىس وتىرىسىنا پاۆلودار وبلىسىنىڭ اكىمى ابىلقايىر سقاقوۆ قاتىستى.
ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى ماقسات تۇرلىباەۆتىڭ ايتۋىنشا, پاۆلودار وبلىسىندا «جۇمىسپەن قامتۋدىڭ جول كارتاسى» باعدارلاماسىن ىسكە اسىرۋ ءۇشىن 43,2 ميلليارد تەڭگە قاراستىرىلعان.
- باعدارلامانى جۇزەگە اسىرۋ الەۋمەتتىك سالا, تۇرعىن ءۇي-كوممۋنالدىق شارۋاشىلىعى, ينجەنەرلىك-كولىك ينفراقۇرىلىمى وبەكتىلەرىن قايتا قۇرۋ جانە جوندەۋ, سونداي - اق ەلدى مەكەندەردى اباتتاندىرۋ ەسەبىنەن جاڭا جۇمىس ورىندارىن قۇرۋدى كوزدەيدى, - دەپ مالىمدەدى بايانداماشى. - وبلىستا بارلىعى 12 مىڭعا جۋىق جاڭا جۇمىس ورنىن اشۋ جوسپارلانۋدا.
قوسىمشا 700 ميلليون تەڭگەدەن استام قاراجاتتى كوروناۆيرۋس اۋرۋىمەن اۋىراتىندار انىقتالعان جاعدايعا ونكولوگيالىق ديسپانسەر مەن ورتالىق اۋداندىق اۋرۋحانالار ءۇشىن مەديتسينالىق جابدىقتار ساتىپ الۋعا باعىتتاۋ شەشىلدى. ءوڭىر قاجەتتىلىگى ءۇشىن بىردەن 20 وكپەنى جاساندى جەلدەتۋ اپپاراتى مەن 10 توسەك جانىنداعى مونيتورلار ساتىپ الۋ جوسپارلانۋدا.
- قازىرگى جاعدايدا بۇل كوروناۆيرۋس ينفەكتسياسى انىقتالعان جاعدايدا جۇمىس ىستەۋ ءۇشىن ەڭ قاجەتتى جابدىقتار, - دەپ مالىمدەدى پاۆلودار وبلىسىنىڭ اكىمى ابىلقايىر سقاقوۆ. - بۇگىندە وڭىردە 128 وكپەنى جاساندى جەلدەتۋ اپپاراتى بار, قوسىمشا قاجەتتىلىك – 56 اپپارات. ءبىز 20 وكپەنى جاساندى جەلدەتۋ اپپاراتىنا قارجى سالۋدامىز. تاعى 8 اپپارات جالپى سيپاتتاعى ترانسفەرتتەر ەسەبىنەن ساتىپ الىناتىن بولادى.
سونىمەن قاتار, «نۇرلى جەر» باعدارلاماسى اياسىندا پاۆلودار وبلىسىندا كرەديتتىك تۇرعىن ءۇي سالۋ ءۇشىن 6 ميلليارد تەڭگە ءبولىندى. بۇل قاراجاتقا پاۆلوداردىڭ «دوستىق» جانە «سارىارقا» شاعىن اۋداندارىندا 16 تۇرعىن ءۇي سالىنىپ, 500-دەن استام پاتەر پايدالانۋعا بەرىلمەك.