الەمدەگى احۋالعا شولۋ: كانادادا ارا قاشىقتىق ساقتاماعاندارعا ايىپپۇل سالىنادى

17:30

كانادا كارانتين رەجيمىن بۇزعانى ءۇشىن سالىناتىن قارجىلىق جازانى قاتاڭداتتى

ەل استاناسى تورونتودا الەۋمەتتىك ارا قاشىقتىقتى بۇزعانى ءۇشىن ايىپپۇل سالىنادى. كوروناۆيرۋسەن كۇرەس جاعدايىندا قوعامدىق ورىنداردا ءبىر-بىرىمەن ەكى مەتر قاشىقتىقتى ساقتاماعاندار $3,5 مىڭنان استام ايىپپۇل تولەيدى. 

كانادادا كوروناۆيرۋس جۇقتىرعاندار سانى 11 مىڭنان استى.

17:25

شۆەتسيا كوروناۆيرۋسپەن كۇرەستە وزگە ءتاسىلدى تاڭدادى

ەلدە ەشقانداي وقشاۋلاۋ نەمەسە كارانتين ەنگىزىلگەن جوق, تەك ەرىكتى نەگىزدە ۇسىنىستار مەن ۇلكەن ءۇمىت.

شاڭعى تراسسالارى اشىق, مەيرامحانالار جۇمىس ىستەپ تۇر, ال ساۋدا ورتالىقتارىنا كەلۋشىلەردىڭ قاراسى كوپ.

كوروناۆيرۋس پاندەمياسىمەن كۇرەستە وزگە ءتاسىلدى قولدانعان ەۋروپا ەلدەرىنىڭ بىرەگەيى شۆەتسياعا قوش كەلدىڭىزدەر.  

ەۋروپا مەن اقش-تىڭ كوپ بولىگى ۇكىمەت ەنگىزگەن تۇرعىندار قوزعالىسىن شەكتەيتىن شارالارعا باعىنىپ وتىرسا, شۆەتسيادا كەڭسەلەر مەن دۇكەندەر سول كۇيى اشىق, ال ەل بيلىگى حالىققا شەكتەۋ ەمەس, ۇسىنىس ءبىلدىرىپ وتىر.

بۇل شەشىمنىڭ ءتيىمدى الدە ءساتسىز بولاتىنى تۋرالى Wall Street Journal جاساعان ساراپتامانىڭ اۋدارماسىن وقي وتىرىڭىز.

15:10

يزرايلدە COVID-19-دى 6800 ادام جۇقتىرعان, ولاردىڭ ىشىندە قايتىس بولعاندار سانى ‒ 37.

14:50

ۋكراينادا كوروناۆيرۋس ينفەكتسياسىن جۇقتىرۋدىڭ جاڭا 45 دەرەگى تىركەلدى. اتالعان ەلدە جالپى اۋىرىپ جاتقاندار سانى ‒ 941 ادام. 

13:40

وزبەكستاندا COVID-2019 كوروناۆيرۋس ينفەكتسياسىن جۇقتىرعان تاعى 31 ادام تىركەلدى. ۆيرۋستى جۇقتىرعانداردىڭ جالپى سانى ‒ 221 ادام. 

12:45

قىرعىزستاندا العاشقى ناۋقاس قايتىس بولدى

كورشى ەلدە كوروناۆيرۋس جۇقتىرعان العاشقى ناۋقاس كوز جۇمدى.

ول - بۇرىن وش وبلىسىنىڭ نووكات اۋرۋحاناسىنا تۇسكەن 61 جاستاعى ەر ادام. ناۋقاستىڭ كوروناۆيرۋستان باسقا, دەنساۋلىعىن ناشارلاتقان وزگە  سوزىلمالى اۋرۋلارى بولعان.

ەلدە 130 جاعداي تىركەلگەن.

12:21

گرۋزيادا كوروناۆيرۋس جۇقتىرعان ادامداردىڭ سانى 148-گە جەتتى 

10:21

ۋكراينا قارۋلى كۇشتەرىنىڭ قىزمەتكەرى ۆيرۋس جۇقتىردى

ۋقك اسكەري ءبولىمنىڭ ءبىرى ورنالاسقان حمەلنيتسكي وبلىسىندا COVID-19-دى اسكەري مەديتسينا قىزمەتكەرى جۇقتىردى. ناۋرىز ايىنىڭ سوڭىندا ول جەدەل رەسپيراتورلى اۋرۋلار (جرا) دياگنوزىمەن امبۋلاتورلىق ەمدەۋدە بولعان. 1 ساۋىردە دەنساۋلىعى ناشارلاعاننان كەيىن حمەلنيتسكي جۇقپالى اۋرۋلار اۋرۋحاناسىنا جاتقىزىلعان. اۋرۋحاناعا جاتقىزۋ كەزىندە پنەۆمونيا دياگنوزى انىقتالعان. ساراپتاما ناتيجەسىندە ونىڭ COVID-19 ۆيرۋسىن جۇقتىرعانى بەلگىلى بولعان.  

قازىر ناۋقاسپەن بايلانىستا بولعان 140 ۋكرايندىق اسكەري قىزمەتكەر ءوزىن-ءوزى وقشاۋلاۋ رەجيمىن ساقتاپ وتىر.

09:35

ۆيرۋس جۇقتىرعاندار ميلليوننان استى

بۇگىن تاڭەرتەڭگى ەسەپ بويىنشا, دۇنيەجۇزىندە Covid-19 ۆيرۋسىن جۇقتىرعاندار سانى 1 015 709 ادام بولدى.

ال قايتىس بولعاندار سانى 50 مىڭنان استى.

اقش ءالى دە ۆيرۋس ەڭ كوپ تارالعان ايماق, ەلدە 245 مىڭنان استام جاعداي تىركەلگەن.

گەرمانيادا ۆيرۋس جۇقتىرعاندار سانى قىتايدان 2 مىڭ ادامعا اسىپ كەتتى.

قازىر ۆيرۋس تارالعان العاشقى تورتتىك باتىس ەلدەرى: اقش, يتاليا, يسپانيا, گەرمانيا.

ادام ءولىمى بويىنشا ەڭ جوعارعى كورسەتكىش يتاليادا 14 مىڭعا جۋىق ادام. 

09:15

يتاليادا كوروناۆيرۋستان ءبىر تاۋلىكتە 760 ادام قايتىس بولدى, پاندەميا باستالعاننان بەرى 13 915 ادامعا جەتتى. بۇل تۋرالى بەيسەنبى كۇنى ازاماتتاردى قورعاۋ دەپارتامەنتىنىڭ باسشىسى اندجەلو بوررەللي حابارلادى.

حورۆاتيادا جاڭا كوروناۆيرۋس ينفەكتسياسىن جۇقتىرعاندار سانى 1 011-گە جەتتى. قازىرگى ۋاقىتتا بۇل ەلدە 35 ناۋقاس وكپەنى جاساندى جەلدەتۋ اپپاراتتارىنا قوسىلعان.

رەسەيدە ءساۋىر ايىندا تولىعىمەن جۇمىسسىز كۇندەر بولادى دەپ جاريالاندى. بۇل ەلدە 3500-دەن استام ادام جۇقتىرعان كوروناۆيرۋستىڭ تارالۋىنا بايلانىستى دەمالىس كۇندەرىن ۇزارتۋ تۋرالى شەشىم قابىلداندى.

كانادادا كوروناۆيرۋستى جۇقتىرعاندار سانى 10 مىڭ ادامنان استى. قازىرگى تاڭدا كانادادا كوروناۆيرۋستىڭ اعزادا بار-جوقتىعىنا بايلانىستى 257 مىڭعا جۋىق ادام تەكسەرىلدى, 127 ءولىم تىركەلدى.

تايلاند 3 ساۋىردەن باستاپ جالپىۇلتتىق كومەندانتتىق ساعاتتى ەنگىزەدى. ول جەرگىلىكتى ۋاقىت بويىنشا 22:00-دەن 04:00-گە دەيىنگى ارالىقتا بولادى.

ازەربايجان بيلىگى كوروناۆيرۋسقا بايلانىستى ادامداردىڭ قوزعالىسىنا شەكتەۋ ەنگىزۋدە. تۇرعىندار ۇيدەن ءۇش جاعدايدا عانا شىعا الادى: مەديتسينالىق كومەك قاجەت بولعان جاعدايدا, كۇندەلىكتى سۇرانىستاعى ونىمدەر مەن ازىق-ت ۇلىكتى, ءدارى-دارمەكتەردى ساتىپ الۋعا, بانك جانە پوشتا قىزمەتتەرىن پايدالانۋعا, تۋىسىنىڭ جەرلەۋىنە قاتىسۋعا. وسى ماقساتتا SMS-حابارلاما جىبەرۋ قاجەت.

09:05

الەمدەگى جاعداي قىسقاشا:

• ازەربايجاندا كارانتيندەگىلەردى ەلەكتروندى قۇرالدار ارقىلى باقىلايدى

• COVID-19 تۋرالى تەگىن ونلاين-كۋرس باستالدى

•بەلگيادا 12 جاسار قىز ۇلىبريتانيادا 13 جاسار ۇل كوروناۆيرۋستان قايتىس بولدى

• بۇۇ باس حاتشىسى: بۇل - قازىرگى قوعام ءۇشىن سىني كەزەڭ