كوكشەتاۋداعى «ۆەكتور» كومباين قۇراستىرۋ زاۋىتى بيىلعى ەگىن وراعى قارساڭىندا ءوزىنىڭ العاشقى ونىمدەرىن ديقاندار يگىلىگىنە ۇسىنا باستادى. قازاقستان-رەسەي بىرلەسكەن كاسىپورنى «قازاگروقارجى» جانە «روستسەلماش» كومباين زاۋىتى» اكتسيونەرلىك قوعامدارى اراسىنداعى «Yector 410Kz» كومبايندارىن قۇراستىرۋ جونىندەگى مامىلە نەگىزىندە قۇرىلعان بولاتىن.
كوكشەتاۋداعى «ۆەكتور» كومباين قۇراستىرۋ زاۋىتى بيىلعى ەگىن وراعى قارساڭىندا ءوزىنىڭ العاشقى ونىمدەرىن ديقاندار يگىلىگىنە ۇسىنا باستادى. قازاقستان-رەسەي بىرلەسكەن كاسىپورنى «قازاگروقارجى» جانە «روستسەلماش» كومباين زاۋىتى» اكتسيونەرلىك قوعامدارى اراسىنداعى «Yector 410Kz» كومبايندارىن قۇراستىرۋ جونىندەگى مامىلە نەگىزىندە قۇرىلعان بولاتىن.
وتكەن جۇمادا, اتباسار اۋدانى جاعىنان ءىسساپاردان كەلە جاتقان ءبىز, «قازاقستاندا جاسالعان» دەگەن بەلگىسى بار كومبايندار تىزبەسىنە قۇرمەتپەن جول بوساتىپ تۇرعان كولىك جۇرگىزۋشىلەرىنە ريزاشىلىعىمىزدى بىلدىرگەنبىز. اۋدانمەن حابارلاسقانىمىزدا, اۋىل شارۋاشىلىعى ءبولىمىنىڭ باسشىسى جولامان كاجەنوۆ اتالعان تەحنيكالار «پوليگراف-استانا» جشس القاپتارىندا ەگىن وراعىنا دايىن تۇرعانىن ايتتى.
وسىدان كەيىن زاۋىتقا ادەيى كەلگەنبىز. قاقپا الدىندا شورتاندى اۋدانىنداعى «بەكتاۋ» جشس ديرەكتورى, وبلىستىق ءماسليحاتتىڭ دەپۋتاتى ساتىبالدى سىزدىقوۆتى كەزدەستىردىك. وزىمىزگە جاقسى تانىس ساتىبالدى حامزەن ۇلى جايدارى جۇزبەن قۋانىشىن ءبولىسىپ جاتىر.
– ءبىزدىڭ شارۋاشىلىق «اگروتسەنتر-استانا» فيرماسىمەن ۇلەسكەر, – دەيدى ول. – قارجىلىق جاعدايىمىز اسا باپتى بولماعانىمەن, «نۇربانك» وتىنىشىمىزگە ءتۇسىنىستىكپەن قارادى. وسىنىڭ ارقاسىندا, اناۋ-مىناۋ ەمەس, «ۆەكتوردىڭ» 20 داناسىن ساتىپ الۋعا مۇمكىندىك تۋدى. بۇل اۋىلداستارىم ءۇشىن ايرىقشا قۋانىشتى وقيعا. ويتكەنى, شارۋاشىلىعىمىز سوڭعى رەت 2001 جىلى الىنعان «ەنيسەيلەردى» ىلدەبايلاپ پايدالانىپ ءجۇر ەدى. توزىعى جەتكەن تەحنيكا قايبىر ونىمدىلىك بەرسىن. مەحانيزاتورلاردان دا ۇيات بولىپ ءجۇر ەدى. جىگەرى تاسىعان جىگىتتەر 28 مىڭ گەكتار القاپتاعى بىتىك ەگىندى توكپەي-شاشپاي جيناۋعا قۇلشىنىپ تۇر.
– ءيا, كوكشەتاۋعا قۇستاي ۇشىپ جەتكەندەيمىز, – دەيدى شارۋاشىلىقتاعى تراكتور-ەگىس بريگاداسىنىڭ بريگاديرى الەكساندر تكاچەنكو. – بۇگىن كۇنى بويى مەحانيزاتورلار وزدەرىنە تيەسىلى كومباينداردى 250 شاقىرىمدىق جولعا دايىنداۋمەن بولدى. جولباسشىلارىمىزدىڭ كومەگىمەن تۇندە بولسا دا ءجۇرىپ كەتپەكپىز. جالپى, مەن «ۆەكتور» كومبايندارىنىڭ تەحنيكالىق مۇمكىندىكتەرىن جوعارى باعالايمىن. ولاردى اۋدانىمىزداعى «نوۆوكۋبانكا» جشس كوپ جىلداردان بەرى پايدالانىپ كەلەدى. «ۆەكتور» ءوڭىرىمىزدىڭ كليماتتىق ەرەكشەلىكتەرىنە قولايلى, جەڭىل باسقارىلادى ءارى جەرگىلىكتى جاعدايدا جوندەپ تە الۋعا بولادى. ال, ونىمدىلىگى جاعىنان شەتەلدىك كومباينداردان قالىسپايدى.
وسى كەزدە زاۋىت قاقپاسىنان شىعۋعا دايىن كومباينداردىڭ قۇجاتتارى مەن قوسالقى بولشەكتەرىن تەكسەرىستەن وتكىزىپ جۇرگەن زاۋىت ديرەكتورى يۋري باشۋروۆتىڭ قالت ەتكەن ۋاقىتىن پايدالانىپ, سوزگە تارتتىق.
– «ۆەكتوردىڭ» قازاقستان رىنوگىندا ۇلەسى جىل ساناپ ارتىپ كەلەدى. ناقتىلاي ايتساق, رەسپۋبليكامىزداعى ەگىن جيناۋ تەحنيكاسىنىڭ 42 پايىزى وسى كومباينداردىڭ ۇلەسىندە, –دەدى ول. بۇگىن ءبىز شورتاندىلىقتارعا تيەسىلى كومباينداردىڭ العاشقى توعىزىن ساپارعا اتتاندىراماقپىز. جالپى, بيىل 144 اگرەگاتتى دايىندىق ساپىنا قويامىز. ونىڭ جەتپىسىن «روستسەلماش» كومپانياسىمەن ون جىل بويى ارىپتەستىك بايلانىستاعى «قازاگروقارجى» اق جۇيەسىمەن ساتاتىن بولامىز. قازىرگى تاڭدا وندىرىستىك الاڭدارىمىزدى قىزۋ جاڭعىرتىپ, قۋاتتاندىرۋ ۇستىندەمىز. كەلەسى جىلى 3000 شارشى مەترلىك ەكىنشى تسەحتى ىسكە قوسۋ ارقىلى 200 كومبايندى قۇراستىرۋعا مۇمكىندىك تۋادى. ال, 2015 جىلى ونى 300-گە جەتكىزۋ نيەتىندەمىز. سۇرانىستىڭ وسە ءتۇسۋىن تەحنيكانىڭ ساپالىق كورسەتكىشىمەن بىرگە, بيىلعى شىلدە ايىندا كەدەن رەجىمىندەگى ەركىن قويما جەلىسىن اشقانىمىزبەن بايلانىستىرۋعا بولادى. ياعني ونىمدەرىمىزدى قوسىمشا قۇن سالىعىنسىز بوساتۋدىڭ ارقاسىندا كومبايننىڭ باعاسى 12 پايىزعا ارزانداپ وتىر. مۇنىڭ ءوزى اۋىل ەڭبەككەرلەرى ءۇشىن ايتارلىقتاي جەڭىلدىك.
كوكشەتاۋ زاۋىتىنىڭ بولاشاق جوسپارلارى تۋرالى سۇراعىمىزعا يۋري ەفيموۆيچ 2015-2016 جىلدارى ءوندىرىستى ارتاراپتاندىرۋعا باعىت ۇستالىپ, زامانالىق «اگروسويۋز-حورش» تۇقىم سەبۋ كەشەندەرىن شىعارۋ جوباسى تۇزىلگەنىن ايتتى. ۋاقىت وتە كەلە جاڭا جۇمىس ورىندارى دا كوپتەپ اشىلاتىن بولادى. كاسىپورىن ءوز ماماندارىن روستوۆتاعى زاۋىتتا كەزەڭ-كەزەڭىمەن وقىتۋ ۇستىندە.
باقبەرگەن امالبەك,
«ەگەمەن قازاقستان».
اقمولا وبلىسى.