ەكونوميستەر الەۋمەتتىك تولەمدەردىڭ قالاي جۇرگىزىلەتىنى تۋرالى پىكىر ءبىلدىردى.
كەشە تىكەلەي ەفيردە وتكەن ەلىمىزدەگى توتەنشە جاعدايعا جانە مەملەكەتتىڭ داعدارىسقا قارسى ءىس-شارالارىنا بايلانىستى مالىمدەمەسىندە پرەزيدەنت قاسىم-جومارت توقاەۆ «ينفلياتسيانىڭ ارتۋىنا بايلانىستى زەينەتاقى, مەملەكەتتىك جاردەماقى جانە اتاۋلى الەۋمەتتىك كومەك مولشەرىن 10 پايىزعا يندەكساتسيالاۋدى تاپسىردىم. وسىعان وراي, اتالعان ساناتتاعى ازاماتتاردىڭ تابىسىن ارتتىرۋ ءۇشىن مەملەكەت تاراپىنان 200 ميلليارد تەڭگەدەن استام قاراجات بولىنەدى», - دەدى.
ەكونوميست مۇرات تەمىرحانوۆ الەۋمەتتىك تولەمدەر تۇرمىسى ورتاشا حالىق ءۇشىن ايتارلىقتاي كومەك بولادى دەپ ەسەپتەيدى. مىسالى 100 مىڭ تەڭگە زەينەتاقى الاتىنداردىڭ قولىنا 110 مىڭ تەڭگە تۇسەدى. ەكونوميست وسى تۇستا, بۇل قارجى ۋاقىتشا شارالار ەمەستىگىن ايتىپ ءوتتى. 2-3 اي تولەپ, جاعداي تۇزەلگەن توقتاپ قالمايدى. ەكونوميست ايتىپ وتكەنىندەي, بيۋدجەت شىعىنى ارتاتىن بولادى. وسى تۇستا ەكونوميست پرەزيدەنت ايتقان 200 ملرد تەڭگە دەگەن ءسوزدى ماماندار تۇسىنبەي وتىرعانىن ايتتى. «بۇل تسيفردىڭ بۇل ءبىر جىلعا ەسەپتەلگەن شىعىن نەمەسە ء ۇش جىلدىق بيۋدجەتتىڭ شىعىس كوزى ەكەنى انىقتالۋى ءتيىس. ءتيىستى ورگاندار ەسەپتەپ, جاريا ەتەدى دەپ ويلايمىن. سەبەبى, ۇندەۋدە بۇل جاعى اشىپ ايتىلعان جوق», - دەيدى ەكونوميست.
قارجىگەر ەرلان يبراگيم يندەكساتسيا دەگەن ينفلياتسيا كۇرت وسكەن جاعدايدا جۇزەگە اساتىن شارا ەكەنىن, ال بىزدەگى ينفلياتسيا ءار جارتى جىل سايىن وزگەرتىلىپ تۇراتىنىن ايتادى.
يندەكساتسيا بويىنشا تولەمدەر ۋاقىتشا ەمەس, سەبەبى ينفلياتسيا دا ۋاقىتشا قۇبىلىس ەمەس. تاۋارلارعا دا باعا تومەندەمەيدى, تيىسىنشە ينفلياتسيا دا ارتىپ وتىرادى.
ەرلان يبراگيم, اتاپ وتكەندەي, پرەزيدەنت ايتىپ وتىرعان 200 ملرد تەڭگە 2020 جىلدىڭ بيۋدجەتىنەن وسى باعىتقا كەتەتىن شىعىندار.
«ال 2021-2022 جىلداردىڭ بيۋدجەتىنەن قاراستىرىلاتىن قاراجات قوسىمشا تۇزەتۋ بارىسىندا انىق بولۋى كەرەك. جالپى, بيلىك الەۋمەتتىك تولەمدەردى داعدارىس ۋاقىتىندا توقتاتپايتىنىن ايتتى. قازىر ەلدە 6,5 ملن ادام وسىنداي الەۋمەتتىك جاردەماقىلاردى الادى. مەن 200 ملرد تەڭگەنى وسىلاي قابىلدادىم» دەيدى ەرلان يبراگيم.