باتىس قازاقستاندا كۇشەيتىلگەن كارانتين رەجيمى ەنگىزىلدى

بۇل قاۋلى بويىنشا باتىس قازاقستان وبلىسىندا ورال قالاسى مەن اۋداندارىنىڭ ەلدى مەكەندەرى اراسىندا كولىك قۇرالدارىنىڭ كىرىپ-شىعۋىنا تىيىم سالىندى. وتە قاجەت بولماسا, اۋىل, كەنت, قالا ىشىندە دە ادامدار مەن جەكە كولىكتىڭ قوزعالىسىنا تىيىم سالىنىپ وتىر.

جەدەل شتاب بەكىتكەن سالالار تىزىمىنە ەنگىزىلگەن ۇيىمداردا قىزمەت ەتەتىن جەكە ادامدار جۇمىس ورنىنان انىقتاما بولعان جاعدايدا ۇيىنەن جۇمىس ورنىنا جانە جۇمىس ورنىنان ۇيىنە بارۋعا رۇقسات ەتىلەدى.

ال ۇيىندەگى تۇرعىندار ازىق-ت ۇلىك پەن ءدارى-دارمەكتى الۋ ءۇشىن تىركەۋدە تۇراتىن جەرىنەن 2 كم راديۋستاعى دۇكەندەر مەن دارىحانالارعا عانا بارا الادى. ءۇي جانۋارلارىن سەرۋەندەتۋ 30 مينۋت ىشىندە, 500 مەتر راديۋستا جۇزەگە اسادى.

«مەديتسينالىق مەكەمەلەرگە شۇعىل جاعدايلاردا عانا بارۋ, ۇيدەن توتەنشە جاعدايدا جانە ادامنىڭ ءومىرى مەن دەنساۋلىعىنا قاۋىپ توندىرەتىن جاعدايلاردا عانا شىعۋ قاجەت» دەلىنگەن قاۋلىدا.

ال تۋىسقاندارعا, تانىستارعا, كورشىلەرگە, ارىپتەستەرگە جانە باسقا جەرلەرگە بارۋعا, قوعامدىق ورىنداردا, ءبىر وتباسىنىڭ ادامدارىن قوسپاعاندا, ۇشتەن ارتىق ادامنىڭ جينالۋىنا, كامەلەتكە تولماعانداردىڭ ۇلكەندەردىڭ ىلەسۋىنسىز قالا بويىنشا قوزعالۋىنا تىيىم سالىنادى.

وبلىستىڭ باس سانيتارى تۇرعىنداردىڭ كۇندەلىكتى تىرشىلىگىن قامتاماسىز ەتەتىن ۇيىمداردى قوسپاعاندا بارلىق ۇيىمدار مەن كاسىپورىنداردىڭ جۇمىسىن ۋاقىتشا توقتاتۋدى, ۇيىمدار مەن كاسىپورىنداردىڭ كۇشەيتىلگەن كارانتين ۋاقىتىندا قالىپتى جۇمىس رەجيمىن توقتاتىپ, ءوز قىزمەتىن قاشىقتان, سونىڭ ىشىندە ونلاين رەجيمىندە جالعاستىرۋى تيىستىگىن ايتقان.

مەكتەپكە دەيىنگى بالالار مەكەمەلەرىنىڭ, ارنايى الەۋمەتتىك قىزمەتتەر كورسەتەتىن جارتىلاي ستاتسيونارلىق تۇردەگى ۇيىمداردىڭ جۇمىس ىستەۋىنە تىيىم سالىندى.

قوعامدىق كولىك انتيسەپتيكالىق قۇرالدارمەن قامتاماسىز ەتىلىپ, وندا تەك جەكە قورعانىش قۇرالدارىمەن (مەديتسينالىق ماسكالار) جۇرۋگە رۇقسات ەتىلدى. قوعامدىق كولىك بارلىق سانيتارلىق-ەپيدەميولوگيالىق نورمالاردى ساقتاي وتىرىپ, ساعات 06.00-دەن ساعات 19.00-گە دەيىن شەكتەۋ رەجيمى اياسىندا جۇمىس ىستەيتىن بولادى.

سانيتارلىق دارىگەردىڭ قاۋلىسىنا سايكەس, ورال قالاسى مەن اۋداندارداعى بارلىق اۋماقتىق مەملەكەتتىك ورگاندار مەن ۆەدومستۆولىق باعىنىستى ۇيىمدار, زاڭدى تۇلعالارى (مەنشىك نىسانىنا قاراماستان) جۇمىس كۇنىن 2 ساعاتقا قىسقارتادى. سونداي-اق ءوز قىزمەتكەرلەرى مەن كليەنتتەرىنىڭ قاۋىپسىزدىگىن قامتاماسىز ەتىپ, قىزمەتكەرلەرگە قولعاپتار مەن ءبىر رەتتىك ماسكالار تاراتۋى, ورىنجايدى كۇنىنە كەمىندە 2 رەت ىلعالدى جيناۋ جانە دەزينفەكتسيالاۋى, دۇكەندەرگە, دارىحانالارعا, مەديتسينالىق مەكەمەلەر مەن باسقا دا ۇيىمدارعا كىرەتىن جانە شىعاتىن جەرلەردە سانيتايزەرلەر ورناتۋى ءتيىس.

ورىنجاي ىشىندە ادامدار سانىن شەكتەلىپ, 20 شارشى مەتر جەردە 1 ادامنان اسپاۋى ءتيىس. عيمارات ىشىندە جانە سىرتتا ادامداردىڭ اراسى كەمىندە 2 مەتر بولۋى كەرەك. ورىنجايلارعا جەكە قورعانىش قۇرالدارىنسىز (مەديتسينالىق ماسكاسىز) كىرۋگە تىيىم سالىنادى.

كارانتيننىڭ ۇزاقتىعى COVID-19 ۆيرۋسىنىڭ ينكۋباتسيالىق كەزەڭىنە قاراي سوڭعى ناۋقاستى وقشاۋلاۋ جانە جۇقتىرۋ وشاعىندا دەزينفەكتسيالىق شارالاردى اياقتاۋ ساتىنەن باستاپ بەلگىلەنەدى. ۆيرۋستىڭ ينكۋباتسيالىق كەزەڭى 14 كۇن. ياعني, باتىس قازاقستان وبلىسىنداعى كۇشەيتىلگەن كارانتين رەجيمى سوڭعى ناۋقاس وقشاۋلانعان سوڭ ەكى اپتادان كەيىن اياقتالماق.

باتىس قازاقستان