توكيو وليمپياداسىنىڭ كەيىنگە شەگەرىلۋىنە بايلانىستى كەلەسى جىلى جالاۋى جەلبىرەيدى دەپ جوسپارلانعان جەڭىل اتلەتتەردىڭ الەم چەمپيوناتى 2022 جىلى وتەتىن بولدى.
جەڭىل اتلەتيكا ەڭ كوپ جۇلدە جيىنتىعى ساراپقا سالىناتىن سپورت ءتۇرى. سول سەبەپتى دە ونى «سپورت پاديشاسى» دەپ اتايدى. ماسەلەن, بىلتىر دوحادا وتكەن الەم چەمپيوناتىندا 149 (49 التىن+49 كۇمىس+51 قولا) ءتۇرلى-ءتۇستى مەدالدار تاراتىلدى.
كاتاردىڭ استاناسىنداعى جارىستىڭ جالپى كوماندالىق ەسەبىندەگى تارتىس اقش قۇراماسىنىڭ ايقىن باسىمدىعىمەن اياقتالدى. 14 التىن, 11 كۇمىس جانە 4 قولانى ولجالاعان امەريكالىقتار جارىس كەستەسىندە جەكە-دارا كوش باستادى. ەكىنشى جانە ءۇشىنشى ورىندى كەنيا (5+2+4) مەن يامايكانىڭ (3+5+4) «قارا مارجاندارى» يەلەندى. سونداي-اق, قىتاي (3+3+3) مەن ەفيوپيا (2+5+1) سپورتشىلارى ۇزدىك بەستىكتىڭ قاتارىنان كورىندى. وكىنىشكە قاراي, پارسى شىعاناعىندا قازاقستاننىڭ ورەندەرىنە جۇلدە بۇيىرعان جوق.
جەڭىل اتلەتتەردىڭ جارىسىن تاماشالاۋعا كورەرمەندەردىڭ كوپتەپ كەلەتىنى بەلگىلى. ءىرى كورپوراتسيالار مەن ىرگەلى كاسىپورىندار, تاسى ورگە دومالاعان بيزنەسمەندەر مەن باسقا دا باي-قۋاتتىلار وسى سپورت تۇرىنە دەمەشۋلىك جاساۋعا اركەز ايرىقشا قۇشتارلىق تانىتۋدا. ال وليمپيادا – سپورت اتاۋلىنىڭ تورەسى. سول سەبەپتى دە حالىقارالىق جەڭىل اتلەتيكا فەدەراتسيالار قاۋىمداستىعى (IAAF) الەم چەمپيوناتىن وليمپيا ويىندارىمەن قاباتتاستىرماي كەين وتكىزۋدى قۇپ كورىپ وتىر.