جامبىل وبلىسىندا جۇزەگە اسىپ جاتقان اۋىل تۇرعىندارىنىڭ تۇرمىستىق تابىسىن جاقسارتۋدىڭ پيلوتتىق جوباسى اياسىندا سارىسۋ اۋدانى, ساۋداكەنت اۋىلىنىڭ تۇرعىندارى مال شارۋاشىلىعىن, ەگىن شارۋاشىلىعىن جانە شاعىن بيزنەستى دامىتۋ ماقساتىندا ەكى پايىزدىق مولشەرلەمە بويىنشا نەسيەگە قول جەتكىزدى.
اۋىلدا جوبانىڭ ء«ۇي ىرگەسىندەگى جەرلەردى ءتيىمدى پايدالانۋ» باعىتى بويىنشا 901 اۋلادا 118 گەكتار جەردە كوكونىستەر مەن جەمىستەر وسىرىلەتىن بولادى. «الاڭداردىڭ باسىم بولىگىنە قىزاناق پەن قيار ەگىلمەك. بارلىق ءۇي ماڭىنداعى ۋچاسكەلەر سۋارمالى سۋمەن قامتاماسىز ەتىلەدى. ول ءۇشىن 6100 مەتر ارىق تازالانىپ, 2500 مەتر لوتوكتار جوندەۋدەن وتكەن. يەلەرىنىڭ سۇراۋى بويىنشا 765 اۋلادا اۋىل شارۋاشىلىعى تەحنيكاسىنىڭ كومەگىمەن ەگۋ جۇمىستارى اتقارىلاتىن بولادى, قالعان وتباسىلار ءوز كۇشتەرىمەن جۇمىس ىستەۋگە دايىن», دەيدى بايقادام اۋىلدىق وكرۋگىنىڭ اكىمى امانتاي نازاربەكوۆ. ونىڭ ايتۋىنشا, ماۋسىم ايىندا ءار اۋلانىڭ ورتاشا تابىسى 618 000 تەڭگە بولادى دەپ كۇتىلۋدە ەكەن.
ال, جوبانىڭ ەكىنشى باعىتى «مال شارۋاشىلىعىن دامىتۋ» بويىنشا 92 ءۇي يەلەرى 1 275 باس مال ساتىپ العان. ونىڭ ىشىندە 288 باس ءىرى قارا, 40 بۇقا, 159 جىلقى, 709 باس ۇساق مال بار. اۋىل تۇرعىنى التاي نۇرمانوۆ 3 360 000 تەڭگە نەسيەگە قول جەتكىزىپ, 7 باس جىلقى ساتىپ الىپتى. «مال ساتىپ الۋعا 2,8 ميلليون تەڭگە جۇمسادىم. ال قالعان بولىگىنە ءبىر جىلعا جەتپەيتىن جەم-ءشوپ قورىمدى تولىقتىردىم. ايەلىم ءوزى بيە ساۋا بەرەدى. ءوزىمىز ىشكەنگە ازىن-اۋلاق قىمىز دايىندايمىز. ال تابىس كوزىن مال ءوسىرىپ, كوبەيتۋ ارقىلى قالىپتاستىرماقپىز. ەسەپتەۋىم بويىنشا جىلقىلارىمنان جىلىنا ءۇش-ءتورت ق ۇلىن الامىن دەپ جوسپارلاپ وتىرمىن. بۇدان بۇرىن دا مەن مال شارۋاشىلىعىمەن اينالىسقانمىن, الايدا ءىسىمدى ىلگەرىلەتۋ ءۇشىن قوسىمشا قاراجات كەرەك ەدى. بۇل ورايدا تومەن پايىزدىق نەسيە ۇلكەن كومەك بولدى», دەيدى ول. سول سياقتى تۇرعىن نۇرتاي بولەگەنوۆ تە 2 ميلليون تەڭگەگە 5 باس جىلقى ساتىپ العان. ول دا مالدى ءوسىرىپ, ساتۋمەن اينالىسۋعا بەلىن بەكەم بۋىپ وتىر.
سونداي-اق, جوبانىڭ ءۇشىنشى باعىتى «اۋىل سىرتىنداعى جەرلەردى ءتيىمدى پايدالانۋ» بويىنشا اتالعان اۋىلدىق وكرۋگتەن تىس 70 گەكتار بوس جەرلەر انىقتالعان. ولاردى ۇتىمدى ۇقساتۋدىڭ جولدارى قارالماق. ءتورتىنشى باعىت بويىنشا «ساۋداكەنت-2019» كووپەراتيۆى قۇرىلىپ, وعان 87 ميلليون تەڭگەگە 20 بىرلىك اۋىل شارۋاشىلىعى تەحنيكاسى ساتىپ الىنعان. قۇرىلىم توراعاسى بەگايدار ايتباەۆتىڭ ايتۋىنشا, ازىرگە 6 شارۋا قوجالىعى كووپەراتيۆ مۇشەسى اتانىپتى. پيلوتتىق جوبانىڭ بارلىق قاتىسۋشىلارى نەسيە العاننان كەيىن مۇشەلەر سانى ارتا تۇسەدى دەپ جوسپارلانۋدا. ء«بىز جەردى وڭدەۋ, ەگۋ جانە سۋارۋ ءۇشىن تەحنيكا بەرەمىز. ءۇي ىرگەسىندەگى جەرلەردەن تابىس تاپقىسى كەلەتىن تۇرعىندارعا كووپەراتيۆ تومەن باعامەن تۇقىم مەن تىڭايتقىشتار ۇسىنادى. سونداي-اق, ءبىز دايىن اۋىل شارۋاشىلىعى ونىمدەرىن وتكىزۋمەن جانە ونى نارىققا جەتكىزۋمەن اينالىسامىز. پيلوتتىق جوبانىڭ ارقاسىندا قۇرىلعان كووپەراتيۆ 20 اۋىل تۇرعىنىن جۇمىسپەن قامتاماسىز ەتەتىن بولادى», دەيدى ول.
جامبىل وبلىسى