مەملەكەتتىك حاتشى مارات ءتاجيننىڭ توراعالىعىمەن شەتەلدەردە كادرلار دايارلاۋ جونىندەگى رەسپۋبليكالىق كوميسسيانىڭ كەزەكتى وتىرىسى بولىپ, وندا بۇعان دەيىنگى مەملەكەتتىك ورگاندارعا بەرىلگەن تاپسىرمالاردىڭ ورىندالۋ بارىسى قارالدى.
مەملەكەتتىك حاتشى مارات ءتاجيننىڭ توراعالىعىمەن شەتەلدەردە كادرلار دايارلاۋ جونىندەگى رەسپۋبليكالىق كوميسسيانىڭ كەزەكتى وتىرىسى بولىپ, وندا بۇعان دەيىنگى مەملەكەتتىك ورگاندارعا بەرىلگەن تاپسىرمالاردىڭ ورىندالۋ بارىسى قارالدى.
كوميسسيا شەشىمى بويىنشا بيىلعى جىلى 1090 حالىقارالىق ستيپەنديا ءبولۋ كوزدەلىپتى. جىل باسىنان بەرى سونىڭ 299-ى بەكىتىلگەنى بەلگىلى بولدى. وسى رەتتە مەملەكەتتىك حاتشى «بولاشاق» ستيپەندياسىن تاعايىنداۋ ءىسى جاڭا ەرەجەگە سايكەس جۇرگىزىلگەندىگىمەن ءبولىستى. وسىلايشا, ۇمىتكەرلەردى بارىنشا كەڭ قامتىپ, ولاردىڭ باقتارىن سىناۋعا مۇمكىندىكتەر تۋعىزۋ كوزدەلگەن. بۇل نەعۇرلىم لايىقتى دەگەن تالاپكەرلەردى تابۋ ءۇشىن جاسالىپ وتىر. سوڭعى كونكۋرستىق ىرىكتەۋگە 700-دەن استام ۇمىتكەر قاتىسىپ, ءتيىستى تالاپتارعا سايكەس سونىڭ 400-دەن استامى كوميسسيا مۇشەلەرىنىڭ نازارىنا ۇسىنىلدى. «ۇمىتكەرلەردىڭ قۇجاتتارىن قاراپ, قىركۇيەك-قازان ايلارىندا ولاردىڭ شەتەلدەردەگى تاڭداۋلى وقۋ ورىندارىنا دەر كەزىندە جەتكىزىلۋىنە جاعداي جاساۋىمىز كەرەك. ستيپەندياتتاردى ىرىكتەپ قانا قويماي, ولاردىڭ شەتەلدەردە جان-جاقتى ءبىلىم الۋلارىنا بارلىق جاعداي جاساۋعا مىندەتتىمىز», دەدى م. ءتاجين.
سونىمەن كوميسسيا شەشىمىنە سايكەس «بولاشاق» حالىقارالىق ستيپەندياسىنا 427 ادام يە بولدى. ونىڭ ىشىندە ماگيستراتۋرا باعدارلاماسى بويىنشا – 224, دوكتورانتۋرا بويىنشا – 8, ال تاعىلىمدامادان وتۋگە 195 جاس ۇمىتكەر يە بولىپ وتىر. «ەلىمىزدىڭ جالپى مەملەكەتتىك جانە وڭىرلىك سيپاتتاعى ناقتى مۇقتاجدىعىن مەيلىنشە تولىق ەسەپكە الا وتىرىپ, كادرلار دايارلاۋ ۇدەرىسىندە ايقىن باعىتتى قامتاماسىز ەتۋ قاجەت», دەپ اتاپ ءوتتى مەملەكەتتىك حاتشى. ستيپەنديالاردى تاعايىنداۋ باسىمدىق بەرىلگەن ماماندىقتاردىڭ الدىن-الا بەكىتىلگەن تىزبەسىنە سايكەس جۇزەگە اسىرىلدى. ونىڭ ەداۋىر بولىگى مەملەكەتتىك ورگانداردىڭ ماقساتتى وتىنىمدەرىنە سايكەس بولىنسە, بۇل مامانداردى نىسانالى باعىتتا دايارلاۋ جۇمىسى كۇشەيتىلگەنىن ايعاقتايدى.
يندۋستريا جانە جاڭا تەحنولوگيالار مينيسترلىگىنىڭ ماقساتتى وتىنىمىنە سايكەس, قازاقستاننىڭ يندۋستريالاندىرۋ كارتاسىنا ەنگەن كاسىپورىنداردا جۇمىس جاسايتىن 66 ينجەنەر-تەحنيك قىزمەتكەردىڭ گەرمانيانىڭ جەتەكشى ونەركاسىپ ورتالىقتارى مەن زاۋىتتارىنىڭ بازاسىندا تاعىلىمدامادان وتەتىنى ءمالىم بولدى. مىسالى, «سالاماتتى قازاقستان» مەملەكەتتىك باعدارلاماسىن ىسكە اسىرۋ اياسىندا 20 مەديتسينا قىزمەتكەرى اقش, اۆستريا, فرانتسيا, يزرايل جانە رەسەي ەلدەرىنىڭ مامانداندىرىلعان ورتالىقتارىندا تاعىلىمدامادان ءوتىپ, بىلىكتىلىكتەرىن ۇشتايتىن بولادى. سونداي-اق, تۇڭعىش رەت اۋىل شارۋاشىلىعى سالاسىنىڭ 18 عىلىمي قىزمەتكەرى تاعىلىمدامادان ءوتۋ ءۇشىن ۇلىبريتانيا, قىتاي جانە رەسەي ەلدەرىنە اتتانارى بەلگىلى بولىپ وتىر.
بۇدان باسقا مەملەكەت باسشىسىنىڭ كوپتىلدىلىكتى دامىتۋ جونىندەگى تاپسىرماسىن ىسكە اسىرۋ ماقساتىندا نازارباەۆ زياتكەرلىك مەكتەبىنىڭ 15 وقىتۋشىسى فينليانديادا, ەلىمىزدىڭ جوعارى وقۋ ورىندارى مەن كوللەدجدەرىندە, ورتا ءبىلىم بەرەتىن مەكتەپتەردە قىزمەت ەتەتىن اعىلشىن ءتىلىنىڭ 37 وقىتۋشىسى ۇلىبريتانيا, شۆەيتساريا جانە اقش سياقتى ەلدەردىڭ ۋنيۆەرسيتەتتەرىندە دايارلىقتان وتەتىن بولادى. ال ۇلىبريتانيادا بي-بي-سي (ۆۆس) كورپوراتسياسىنىڭ, رەسەيدە (سانكت-پەتەربۋرگتەگى بونچ-برۋەۆيچ اتىنداعى تەلەكوممۋنيكاتسيا ۋنيۆەرسيتەتى بازاسىندا) جانە وڭتۇستىك كورەيادا مامانداندىرىلعان تاعىلىمدامادان ءوتۋ ءۇشىن «حابار» اق, «قازاقستان» رترك جانە «قازمەديا» ورتالىعىنىڭ 22 مامانى, ياعني بەينەوپەراتورلارى مەن بەينەينجەنەرلەرى ستيپەنديا يەگەرلەرى اتاندى.
سونىمەن بىرگە, تاريحشىلار مەن ارحەولوگتاردان قۇرالعان 5 مامان ۇلىبريتانيانىڭ كەمبريدج, بۋكينگەم جانە برۋنەل ۋنيۆەرسيتەتتەرىنە تاعىلىمدامادان وتۋگە اتتاندى. سول سياقتى, سپورت جانە دەنە شىنىقتىرۋ ءىسى جونىندەگى اگەنتتىكتىڭ ماقساتتى ءوتىنىمى بويىنشا ەلىمىزدىڭ 12 باپكەرى مەن سپورت مەنەدجەرى ۇلىبريتانيادا جانە رەسەيدىڭ سوچيدەگى حالىقارالىق وليمپيادا ۋنيۆەرسيتەتىنىڭ بازاسىندا تاعىلىمدامادان وتۋگە مۇمكىندىك الىپ وتىر. ولاردىڭ قاتارىندا وليمپيادا چەمپيونى سەرىك ساپيەۆ لوندونداعى برۋنەل ۋنيۆەرسيتەتىندە سپورتتىق مەنەدجمەنت بويىنشا ءبىلىم الاتىن بولادى. وتىرىستا سونىمەن قاتار, شەتەلدەردە كادر دايارلاۋ باعدارلاماسىن ىسكە اسىرۋ جانە جەتىلدىرۋگە قاتىستى باسقا دا ماسەلەلەر جان-جاقتى قارالدى. وتىرىس قورىتىندىسى بويىنشا مەملەكەتتىك حاتشى وكىلەتتى مەملەكەتتىك ورگاندارعا ءتيىستى تاپسىرمالار بەردى.
اسقار تۇراپباي ۇلى,
«ەگەمەن قازاقستان».