باتىس قازاقستان وبلىسىندا كوروناۆيرۋسقا شالدىققان ەكى ادام تۇراتىن ۇيلەر كارانتينگە الىنىپ, ونداعى پاتەر تۇرعىندارىنىڭ ءوز ۇيىنە كىرىپ-شىعۋى شەكتەلدى. وبلىستىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى باسشىسىنىڭ ورىنباسارى نۇرلىبەك مۇستاەۆتىڭ ايتۋىنشا, ءار پاتەردەن ءبىر ادام عانا دۇكەنگە نەمەسە دارىحاناعا بارۋ ءۇشىن شىعا الادى.
باتىس قازاقستان وبلىسىندا كەشە كوروناۆيرۋسقا شالدىققان ەكى تۇرعىن انىقتالعان بولاتىن. ونىڭ ءبىرى 24 ناۋرىزدا ساراتوۆتان كەلگەن اقسايلىق ايەل شەكارادان تەكسەرىلىپ, ارنايى ساۋالناما تولتىرىپ ءوتىپ, ءۇي جاعدايىندا وقشاۋدا بولعان. تەك 2-3 كۇن وتكەن سوڭ عانا ودان سىرقات بەلگىلەرى كورىنە باستاعان. ال اتىراۋ قالاسىنان كەلگەن ورالدىق ايەل بويىنداعى وزگەرىستەردى ءوزى بايقاپ, پروۆيزارلىق گوسپيتالعا ءوز كولىگىمەن بارعان.
- قازىر ەكى ناۋقاس تا ورال قالاسىنداعى جۇقپالى اۋرۋلار اۋرۋحاناسىنا جاتقىزىلدى. ەكەۋىنىڭ دە جاعدايى قاناعاتتانارلىق. ەمدەۋ جۇرگىزىلۋدە, - دەدى نۇرلىبەك مۇستاەۆ.
ەكى ناۋقاسپەن جاقىن قارىم-قاتىناستا بولعان 10 تۇلعا پروۆيزورلىق ستاتسيونارعا جاتقىزىلعان. ولار قازىر دارىگەرلەردىڭ باقىلاۋىندا. ال ناۋقاستارمەن جولىعىسقان, ءارتۇرلى قاتىناستا بولعان 43 ادام ءۇي كارانتينىندە وقشاۋلانعان. سونداي-اق ەكى ناۋقاس تۇراتىن كوپقاباتتى تۇرعىنۇيلەردىڭ پودەزدەرىنە دە كارانتين جاريالانعان. ياعني, ەكى ناۋقاس تۇرعان ءۇي تۇرعىندارى ءوز پاتەرىندە وقشاۋلانادى. ءار پاتەردەن ءبىر ادام عانا بەتپەردەمەن شىعىپ, دۇكەننەن, ءدارىحانادان قاجەتتى زاتتارىن الا الادى. نەمەسە قاجەتتى زاتتاردى تاپسىرىس بەرىپ, ۇيگە الدىرتادى. ءبارى باقىلاۋدا.
ايتا كەتەيىك, كوروناۆيرۋس تابىلعان ءبىر ايەلدىڭ ەگدە اتا-اناسى بار ەكەن. ولار قازىر پروۆيزورلىق گوسپيتالدا جاتىر. «ساراتوۆتان كەلگەن ناۋقاستىڭ قارىم-قاتىناستا بولعان ادامدارى بويىنشا رەسەيلىك ارىپتەستەرمەن دە بايلانىستامىز» دەدى نۇرلىبەك مۇستاەۆ.
«باتىس قازاقستان وبلىسىندا كوروناۆيرۋسپەن كۇرەس ءۇشىن بارلىق مەديكامەنت, قۇرال-جابدىق جەتكىلىكتى. ازىرگە كومەندانت ساعاتى ەنگىزىلمەيدى. بارلىق شەشىم كۇن سايىن جەدەل شتابتىڭ ۇيعارىمىمەن قابىلدانادى» دەدى باتىس قازاقستان وبلىستىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى باسشىسىنىڭ ورىنباسارى.
سوڭعى مالىمەت بويىنشا باتىس قازاقستان وبلىسىندا كوروناۆيرۋس كۇدىگى جانە ناۋقاسپەن قارىم-قاتىناستا بولعانى ءۇشىن 92 ادام اۋرۋحانالارعا جاتقىزىلعان. سونىڭ ىشىندە 2 ادام وبلىستىق جۇقپالى اۋرۋلار اۋرۋحاناسىندا, 45 ادام «كۋمىسكا» ساناتوريىندەگى پروۆيزورلىق گوسپيتالدا, 9 ادام بايتەرەك اۋدانىنداعى پروۆيزورلىق گوسپيتالدا, 36 ادام «يۆۋشكا» ساناتوريىندە كارانتيندىك ستاتسيوناردا جاتىر. ولاردان بولەك 114 ادام ءۇي كارانتينىندە وقشاۋلانعان.
باتىس قازاقستان