كارانتين جانە توتەنشە جاعداي كەزىندە 55 جاستان اسقان ەلوردالىق تۇرعىندارعا كوشەگە شىعۋدى شەكتەۋگە كەڭەس بەرىلەدى. بۇل تۋرالى نۇر-سۇلتان قالالىق اكىمدىگىنىڭ رەسمي سايتى حابارلادى.
ەگەر جۇمىس ورنىنان انىقتاما نەمەسە جەكە كۋالىك بولسا, تۇرعىلىقتى جەرىنەن جۇمىس ورنىنا جانە كەرى باعىتتا قاتىناۋعا رۇقسات ەتىلەدى. سونىمەن قاتار, تاماق ونىمدەرىن, ءدارى-دارمەكتەر مەن مەديتسينالىق ماقساتتاعى بۇيىمداردى تۇرعىلىقتى جەرى نەمەسە جۇمىس ورنى جاقىن ورنالاسقان دۇكەندەر مەن ءدارىحانالاردان ساتىپ الۋعا, مەديتسينالىق مەكەمەگە بارۋعا, ءۇي جانۋارلارىن تۇرعىلىقتى جەرگە جاقىن جەردە سەرۋەندەتۋگە شەكتەۋ قويىلمايدى.
نۇر-سۇلتان قالاسى بويىنشا كوروناۆيرۋستىق ينفەكتسيانىڭ تارالۋىنا جول بەرمەۋ جونىندەگى جەدەل شتابتىڭ شەشىمىمەن كوپپاتەرلى تۇرعىن ۇيلەردە ورنالاسقان دۇكەندەرگە جۇمىس كەستەسى ساعات 10:00 باستاپ 20:00 دەيىن بولىپ بەلگىلەندى.