تۇڭعىش پرەزيدەنت - ەلباسىنىڭ ءباسپاسوز حاتشىسى ايدوس ۇكىباي قازىر ەلباسى ەلدەگى جاعدايدى باقىلاپ وتىرعانىن ايتتى.
«بۇگىنگى كۇنى مەملەكەت ازاماتتارىمىزدىڭ قاۋىپسىزدىگىن قامتاماسىز ەتۋ ءۇشىن ماڭىزدى شارالار قابىلداپ جاتىر. وسى رەتتە, ادامدار ەلدىڭ بولاشاعى ءۇشىن جاۋاپكەرشىلىك ولاردىڭ مامانداردىڭ نۇسقاۋلارىن قالاي ورىندايتىنىنا بايلانىستى ەكەنىن ءتۇسىنۋى كەرەك. ادامداردىڭ ءوز قاۋىپسىزدىگى مەن جاقىندارىنىڭ اماندىعىنا بايىپپەن قارايتىنى قۋانتادى», دەدى ايدوس ۇكىباي.
سونداي-اق ول ەلباسىنىڭ قازىرگى ۋاقىتتا نەمەن اينالىسىپ جاتقانىن ايتتى.
«ەلباسى نۇرسۇلتان نازارباەۆ ەلدەگى جاعدايدى ءجىتى باقىلاپ, قاۋىپسىزدىك كەڭەسىنىڭ حاتشىسىنان ماڭىزدى اقپاراتتاردى الىپ وتىرادى. سونداي-اق ماڭىزدى ساياسي شەشىمدەردى تالقىلاۋعا قاتىسىپ, ەل پرەزيدەنتىنە قولداۋ كورسەتۋدە. سونىمەن قاتار ول تۇرعىندارعا كومەك كورسەتۋ جۇمىستارىمەن اينالىسىپ جاتقان Nur Otan پارتياسىنىڭ قىزمەتىن ۇيلەستىرىپ وتىر», دەدى ول.
ونىڭ ايتۋىنشا, قازىر تۇڭعىش پرەزيدەنتتىڭ باستاماسىمەن قۇرىلعان «Birgemiz» قوعامدىق قورىنىڭ جۇمىسى ەرەكشە باقىلاۋدا.
«بۇدان بولەك, ەلباسى الەمدىك ەكونوميكا جانە ساياسات ينستيتۋتىنا الەمدەگى جاعدايدى جانە قازاقستانعا جاھاندىق ترەندتەردىڭ ىقتيمالدى تەرىس ىقپالىن زەرتتەۋ بويىنشا تالداۋ جۇمىستارىن كۇشەيتۋدى تاپسىردى. بۇل دەرەكتەر سايكەس مەملەكەتتىك قۇرىلىمعا جىبەرىلەدى. بۇگىندە بارلىق كۇش حالىقتىڭ قاۋىپسىزدىگى مەن ونى قورعاۋدى قامتاماسىز ەتۋگە جۇمسالۋدا. ءبىز بىرلىكتىڭ ارقاسىندا كوپتەگەن سىناقتان وتتىك. بۇل قيىندىقتاردان دا باسىمىزدى جوعارى كوتەرىپ ەڭسەرەتىنىمىزگە سەنىمدىمىن», دەدى ۇكىباي.