قۇرلىقتىق حوككەي ليگاسىندا (قحل) سىنعا تۇسكەن ەلوردانىڭ «بارىس» كومانداسى بيىل ءتاۋىر ناتيجە كورسەتتى دەپ ايتا الامىز. سەبەبى تۇراقتى بىرىنشىلىكتە ءتورتىنشى ورىنعا تۇراقتاسا, چەرنىشەۆا ديۆيزيونىندا توپ جاردى. سونىمەن قاتار گاگارين كۋبوگىنىڭ پلەي-وفف كەزەڭىن دە جولداما العان بولاتىن.
جەرلەستەرىمىز گاگارين كۋبوگىنىڭ پلەي-وفف كەزەڭىندە العاش ماگنيتوگورسكىنىڭ «مەتاللۋرگ» كومانداسىمەن كەزدەسىپ, بەس ويىنعا سوزىلعان ماتچتا جەڭىسكە جەتتى. ەكىنشى پلەي-وفف كەزەڭىندە «بارىس» ءنوۆوسىبىردىڭ «سيبير» كلۋبىمەن شەبەرلىك بايقاسۋى كەرەك بولعان. الايدا پرەزيدەنت قاسىم-جومارت توقاەۆتىڭ كوروناۆيرۋس ىندەتىنەن ساقتانۋ ماقساتىندا ەل اۋماعىندا توتەنشە جاعداي جاريالاۋىنا بايلانىستى «بارىس» گاگارين كۋبوگىن جالعاستىرۋدان باس تارتتى.
«بارىستىڭ» وسىنداي ايتۋلى جەتىستىگىنە ءوز ۇلەسىن قوسقان كوماندانىڭ ۇزدىك سۇرمەرگەنى كوربەن نايت جۋىردا كلۋبتان كەتۋى مۇمكىن. بۇل تۋرالى وتاندىق بىرقاتار باق جارىسا جازۋدا. ويتكەنى وسى جىلدىڭ 30 ساۋىرىندە كانادالىق شابۋىلشىنىڭ «بارىسپەن» كەلىسىمشارت مەرزىمى اياقتالادى. قازىرگى تاڭدا كوربەن نايتقا ومبىنىڭ «اۆانگارد» كلۋبى كوز تىگىپ وتىر.
ال كلۋبتىڭ پرەزيدەنتى بوريس يۆانيششەۆ بارلىق ويىنشىلار كوروناۆيرۋسقا بايلانىستى ءوز ەلدەرىنە كەتكەنىن, جاعداي تۇراقتالعان سوڭ كەلىسىمشارتى اياقتالعان حوككەيشىلەرمەن جەكە-جەكە سويلەسەتىنىن ايتقان ەدى.
كانادالىق شابۋىلشى قحل-دىڭ بيىلعى ماۋسىمىندا 60 ماتچ وتكىزىپ, 41 (20+21) ۇپاي جيناعان. سونداي-اق ول پلەي-وفف كەزەڭدەگى 5 ويىندا ءبىر رەت ناتيجەلى پاس اسىرعان.