قازىر وڭ كوزگە سول كوز قاراۋىل بولاتىن ۋاقىت. «ساق ادام ساندىعىن بەكىتەدى» دەگەندەي, ىندەت كۇللى ادامزاتتى تىعىرىققا قۋىپ تىققاندا كوشەدە بەيجاي, بەيساۋات جۇرمەي, ۇيدەن باستاپ قوعامدىق ورىندارعا دەيىن تازالىق شارالارىن قاتاڭ ساقتاعان ءلازىم. سەبەبى تازالىق – ساۋلىق نەگىزى. اۋرۋ اتاندى دا جىعاتىنىن ۇمىتپاعان ءجون.
قاۋىپتى ىندەتتەن قورعانۋ ماقساتىندا ەلىمىزدەگى ءىرى قالالار مەن وبلىس ورتالىقتارىندا كوشەلەردى دەزينفەكتسيالاۋ شارالارى جۇرگىزىلۋدە. ايتالىق قارۋلى كۇشتەردىڭ بيولوگيالىق قورعاۋ بولىمشەلەرىنىڭ جەكە قۇرامى نۇر-سۇلتان قالالىق دەزينفەكتسيا قىزمەتىمەن بىرگە ەلوردا كوشەلەرىنە وڭدەۋ جۇرگىزۋدى باستاپ كەتتى. دەزينفەكتسيالىق ەرىتىندىسى بار جەكە گازسىزداندىرۋ جيىنتىعىمەن جابدىقتالعان اسكەري قىزمەتشىلەر جانە اۆتوموبيل قۇيۋ ستانسالارىنىڭ لەگى جول بويىمەن بىردەي قوزعالىپ, قالانىڭ بىرنەشە ءىرى كوشەلەرىن وڭدەدى. كوروناۆيرۋس ينفەكتسياسىنىڭ تارالۋىن بولدىرماۋ جونىندەگى جەدەل شتابپەن ءوزارا ءىس-قيمىل اياسىندا ۇيىمداستىرىلعان دەزينفەكتسيالاۋ جۇمىستارى اياسىندا ارنايى وڭدەۋگە ارنالعان اۋماقتاردى جەرگىلىكتى اتقارۋشى ورگاندار انىقتايدى. جەكە قۇرام مەن اسكەري تەحنيكانى جۇمىس بارىسىندا اسكەري پوليتسيا الىپ جۇرەدى. بۇگىنگە دەيىن نۇر-سۇلتان جانە الماتى قالالارىندا ۆيرۋستى جۇقتىرۋ قاۋپى بار 80-نەن استام نىسان وڭدەلدى.
ەل پرەزيدەنتىنىڭ توتەنشە جاعداي رەجىمىن قامتاماسىز ەتۋ جونىندەگى مەملەكەتتىك كوميسسيانىڭ وتىرىسىندا قارۋلى كۇشتەردى كوشەلەردى دەزينفەكتسيالاۋعا تارتۋ جونىندەگى تاپسىرماسىنا سايكەس, ءىرى ەلدى مەكەندەردە دە اتالعان جۇمىستار ۇيىمداستىرىلۋدا. اتاپ ايتقاندا, اسكەري قىزمەتشىلەر ءتيىستى جەرگىلىكتى اتقارۋشى ورگانداردىڭ جوسپارى بويىنشا شىمكەنت, اقتاۋ, اقتوبە, اتىراۋ, قاراعاندى, قىزىلوردا, تاراز جانە باسقا قالالاردا نىسانداردى ارنايى وڭدەۋگە كىرىستى. وسى ماقساتتا قورعانىس مينيسترلىگى بيولوگيالىق قورعاۋ بولىمشەلەرىنىڭ سانىن ۇلعايتپاق.
جالپى, ەلوردادا قالا كوشەلەرى, تروتۋارلار, ايالدامالار جانە باسقا دا قوعامدىق ورىندار كۇندەلىكتى ارنايى ەرىتىندىلەرمەن دەزينفەكتسيالانۋدا. قولدانىلىپ جاتقان ەرىتىندى ادامدار مەن جانۋارلار ءۇشىن قاۋىپسىز. قالا اۋماعىن ەرىتىندىمەن وڭدەۋگە كۇن سايىن 450 ادام قاتىسادى. سونداي-اق اۋەجايدا, ۆوكزالداردا, الەۋمەتتىك نىسانداردا, بازارلاردا, ساۋدا ويىن-ساۋىق ورتالىقتارىندا جانە باسقا دا ادام كوپ جينالاتىن جەرلەردە دەزينفەكتسيالاۋ شارالارى, سانيتارلىق ءتارتىپ كۇشەيتىلدى. جۇمىس ورىندارى مەن عيماراتتاردا مۇقيات وڭدەۋ جۇرگىزىلىپ جاتىر. قىزمەتكەرلەر مەديتسينالىق ماسكالارمەن, انتيسەپتيكتەرمەن جانە باسقا دا مەديتسينالىق قورعانىس قۇرالدارىمەن قامتاماسىز ەتىلگەن. جوسپار بويىنشا 2 مىڭنان استام تۇرعىن ءۇي دەزينفەكتسيادان ءوتۋى قاجەت. پاتەر يەلەرى كووپەراتيۆتەرى مەن قىزمەت كورسەتۋشى كومپانيالار ۇيلەردىڭ كىرەبەرىستەرىن, ەسىكتەردى, ليفتىلەردى, سۇيەنىشتەردى, تەرەزە جاقتاۋلارىن جانە ت.ب. دەزينفەكتسيالاۋعا مىندەتتى. ەلوردادا كوروناۆيرۋس ينفەكتسياسىنىڭ تارالۋىنا جول بەرمەۋ بويىنشا بارلىق شارالار قابىلدانىپ جاتىر. جەدەل شتاب جۇمىس ىستەيدى. قالا تۇرعىندارى ءتارتىپتى ساقتاپ, قاجەتسىز ۇيدەن شىقپاۋى, بارلىق قاۋىپسىزدىك شارالارىن ساقتاۋى قاجەت, دەپ حابارلادى قالا اكىمدىگى.
ال الماتى قالاسىندا ۇيلەردىڭ كىرەبەرىسى مەن قوعامدىق ورىندارداعى دەزينفەكتسيالاۋدان سوڭ تۇرعىنداردىڭ قاۋىپسىزدىگى ماقساتىندا پاتەردەن بەس ساعات كولەمىندە شىقپاۋدى وتىنگەن حابارلاما تاراتىلدى. سونداي-اق وڭدەۋ جۇمىستارى الدىن الا داۋىس زورايتقىشپەن حابارلانادى, ال وڭدەۋدەن سوڭ كىرەبەرىستەرگە كەلەسى دەزينفەكتسيالاۋ شاراسىنىڭ كەستەسى ىلىنەدى. شاھاردا بارلىعى 2868 ۇيدەگى 8633 كىرەبەرىستى ارنايى ەرىتىندىمەن وڭدەۋ جوسپارلانعان. سونىمەن بىرگە قالا ىشىندەگى وزەندەردىڭ جاعالاۋلارى دا وڭدەلمەك.