سولتۇستىك قازاقستاندىق ديقاندار بيىل كەمىندە 4,5 ميلليون توننا استىق جيناپ, وتان قامباسىنا جونەلتۋدى مەجەلەپ وتىر. بۇل ورايدا بىتىك ەگىندى دەر كەزىندە باستىرىپ, شاشاۋسىز جيناپ الۋدىڭ ماڭىزى زور. استىق تاسىمالىنا تەمىرجولشىلار دا بەلسەنە ارالاسىپ, زور ۇلەس قوسىپ كەلەدى.
سولتۇستىك قازاقستاندىق ديقاندار بيىل كەمىندە 4,5 ميلليون توننا استىق جيناپ, وتان قامباسىنا جونەلتۋدى مەجەلەپ وتىر. بۇل ورايدا بىتىك ەگىندى دەر كەزىندە باستىرىپ, شاشاۋسىز جيناپ الۋدىڭ ماڭىزى زور. استىق تاسىمالىنا تەمىرجولشىلار دا بەلسەنە ارالاسىپ, زور ۇلەس قوسىپ كەلەدى.وبلىس جىل سايىن 2 ميلليون توننا بيدايدى الىس-جاقىن شەتەلدەرگە جونەلتەتىنىن ەسكەرسەك, استىق تاسۋ ءىسىن كىدىرىسسىز ۇيىمداستىرۋدىڭ ءرولى ايتپاسا دا تۇسىنىكتى. ەلەۋلى قيىندىقتاردىڭ ءبىرى وراق ناۋقانىنىڭ قىزعان شاعىندا جۇك ۆاگوندارىنىڭ جەتىسپەۋشىلىگىنە تىرەلەتىن. رەسپۋبليكا تەمىر جول كومپانيالارى باسشىلارى مەن جەرگىلىكتى اگروفيرمالار كەزدەسۋىندە قىزىلجار ءوڭىرىنىڭ ساپالى استىعىن ەكسپورتتاۋ, ەل ىشىندە ساتۋدى جۇزەگە اسىرۋ, ول ءۇشىن تەمىر جول قاتىناسىن ءتيىمدى پايدالانۋ, جاۋاپتى سالالاردىڭ ءوزارا ۇيلەسىمدىلىگىن قامتاماسىز ەتۋ ماسەلەلەرى جان-جاقتى تالقىلاندى.
«قازاقستان تەمىر جولى» اق-تىڭ ۆيتسە-پرەزيدەنتى قانات الپىسباەۆ جىل وتكەن سايىن وتاندىق اۋىلشارۋاشىلىق ونىمدەرىن وتكىزۋ, ساتۋ رىنوگى كوزىنىڭ كەڭەيىپ كەلە جاتقانىن, وبلىستىڭ رەسەي, ازەربايجان, ورتالىق ازيا ەلدەرىمەن ەكسپورتتىق بايلانىسىنىڭ ارتا تۇسكەنىن, سول سەبەپتى باسىم باعىتتاردى انىقتاپ الۋدىڭ, تاسىمال قىزمەتىنىڭ تاريف ساياساتىن كۇنى بۇرىن بەلگىلەۋدىڭ تيىمدىلىگىن اتاپ كورسەتىپ, اۋىلشارۋاشىلىق تاۋار وندىرۋشىلەرمەن تىكەلەي جۇمىس جاسايتىن تەمىر جول قاتىناسى بولىمشەسىنىڭ قۇرىلاتىنىن جەتكىزدى. «قازتەمىرترانس» اق پرەزيدەنتى قانات الماعامبەتوۆ بۇگىنگى تاڭدا 58 مىڭ جۇك ۆاگونى بارىن, استىق تاسىمالداۋعا 6,5 مىڭ ۆاگون شىعارىلاتىنىن, بىلتىر 1260 ۆاگون ساتىپ الىنعانىن, قاۋىرت جاعداي تۋىنداي قالسا «رۋساگروترانس» كومپانياسىنان 30 مىڭ استىق تاسىمالدايتىن ۆاگون تارتىلاتىنىن مالىمدەدى.
جاڭا استىقتى قابىلداۋ جۇمىسىمەن 54 ەلەۆاتور مەن 273 استىق كەپتىرگىش اينالىسادى. جالپى سىيىمدىلىق 6,1 ميلليون تونناعا جەتەعابىل. اقمولا تەمىر جول بولىمشەسى فيليالىنىڭ ديرەكتورى رامازان ايعايبەكوۆتىڭ ايتۋىنشا, 7 ايدا سولتۇستىك قازاقستان وبلىسى ەكسپورتقا 970461 توننا, ىشكى قاجەتتىلىككە 264951 توننا استىق شىعارعان. ول 8 ەلەۆاتوردا ىلكىمدى تەمىر جول توراپتارىنىڭ جەتىسپەيتىنىن, الىس اۋدانداردىڭ ەگىنشىلەرى فيتوسانيتارلىق رۇقسات الۋ ءۇشىن وبلىس ورتالىعىنا سابىلاتىنىن ماسەلە رەتىندە كوتەردى. ايماق باسشىسى سامات ەسكەندىروۆ دەرەۋ ءتيىستى ورىندارعا تاپسىرما بەرىپ, ناقتى شارالار قولدانۋدى جۇكتەدى.
اۋىل شارۋاشىلىعى سالاسىنىڭ وكىلدەرى تاسىمال ءتاريفىن ناقتى بەلگىلەۋ, دەلدالدىق قىزمەتتەردى ازايتۋ, جۇك ۆاگوندارىنىڭ قولجەتىمدىلىگىن كۇشەيتۋ جايتتارىن ورتاعا سالىپ, پروبلەمالاردى بىرلەسە شەشۋدىڭ ناقتى جولدارى بەلگىلەندى.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى.