بۇگىن 19 ناۋرىز ساعات 00:00-دەن باستاپ پەريمەتردىڭ اينالاسىندا پوليتسيا قىزمەتكەرلەرى مەن اسكەري قىزمەتشىلەرمەن كۇزەتىلگەن وتكىزۋ پۋنكتتەرى ىسكە كىرىسەدى.
ولار قالانىڭ بارلىق كىرەبەرىستەرىندە, ونىڭ ىشىندە 10 ماگيسترالدە ورنالاسادى. كارانتين كەزەڭىندە كولىك قۇرالدارىنىڭ قالانىڭ سىرتقى شەكاراسىنان تىس جەرلەرگە كىرۋىنە جانە شىعۋىنا شەكتەۋ قويىلادى.
وسىعان بايلانىستى الماتى پوليتسياسى ازاماتتاردى ساپار مارشرۋتتارىن الدىن-الا جوسپارلاپ, رەتتەۋگە, توتەنشە جاعدايلار, كارانتين, جول قوزعالىسى ەرەجەلەرىن قاتاڭ ساقتاۋعا, سونىمەن قاتار ىشكى ىستەر ورگاندارى قىزمەتكەرلەرىنىڭ زاڭدى تالاپتارىن ءسوزسىز ساقتاۋعا شاقىرادى.
توتەنشە جاعداي رەجيمىن بۇزۋعا نەمەسە توتەنشە جاعدايدى جاريالاۋعا بايلانىستى تالاپتاردى ورىنداماعاندار ون ايلىق ەسەپتىك كورسەتكىش مولشەرىندە ايىپپۇل تولەيدى نەمەسە ون بەس كۇنگە دەيىن اكىمشىلىك قاماۋعا الىنادى.
«توتەنشە جاعداي جاريالانعان ايماقتاعى بيلىك وكىلىنىڭ زاڭدى تالابىن نەمەسە وكىمىن ورىنداماعاندارعا ەكى مىڭ ايلىق ەسەپتىك كورسەتكىش مولشەرىندە ايىپپۇل سالىنادى. سونداي-اق التى ءجۇز ساعاتقا دەيىن قوعامدىق قىزمەتكە تارتىلۋ نەمەسە بوستاندىقتى شەكتەۋ ارقىلى جازالانادى» دەيدى الماتى پوليتسيا دەپارتامەنتىنىڭ رەسمي وكىلى سالتانات ازىربەك
سونىمەن قاتار قۇقىق قورعاۋ ورىندارى توتەنشە جاعداي كەزىندە كورىنەۋ جالعان اقپارات تاراتۋدىڭ الدىن الۋ تۋرالى ەسكە سالدى. مۇنداي ارەكەتكە بارعاندار ءۇش جىلدان جەتى جىلعا دەيىن باس بوستاندىعىن ايىرىلادى.
الماتى