بۇگىن تامىزدىڭ 22-ءسى كۇنى استانا ۋاقىتىمەن 19:00 ساعاتتا اقتوبەنىڭ «اقتوبە» كومانداسى ءوز الاڭىندا ەۋروپا ليگاسىنىڭ توپتىق كەزەڭىنە شىعۋ ءۇشىن بولاتىن ءبىرىنشى ماتچتا ۋكراينا استاناسى – كيەۆ قالاسىنىڭ «دينامو» كلۋبىن قابىلدايدى.
وسى كەزدەسۋگە قاتىسۋ ءۇشىن كيەۆتىكتەر اقتوبەگە كەشە ۇشىپ كەلدى. كوماندامەن بىرگە تاعى 57 جۋرناليست, 70 جانكۇيەر بىرگە جەتتى. جالپى, ۋكراينا دەلەگاتسياسى قۇرامىن 150 ادام قۇرايدى. ۋكراينا باسىلىمدارىنىڭ وكىلدەرى كەلگەن بويدا اقتوبە قالاسىمەن تانىسىپ ۇلگەردى. «جازۋشى اعايىندار اۋەجايدان مەيمانحاناعا دەيىن باراتىن جولدا, اۆتوبۋستىڭ ىشىندە, بۇل قالانى وزدەرى بۇرىن بولعان شاھارلارمەن سالىستىرىپ وتىردى. ناتيجەسىندە ولار ونىڭ تيراسپول, سۋمى جانە دونەتسك قالالارىنا ۇقسايتىنىن بايقادى», - دەپ جازدى وسىعان وراي Sport.ua.
كەشە كەشكە «دينامو» فۋتبولشىلارى اقتوبەنىڭ قاجىمۇقان اتىنداعى ورتالىق ستاديونىنا كەلىپ, ءبىرىنشى جاتتىعۋىن وتكىزدى. جاتتىعۋدان كەيىن كوماندانىڭ وكىلى سەرگەي رەبروۆ مۇنداعى شالعىننىڭ تىم بيىك ەكەنىن ايتىپ شاعىنىپتى. ال باس جاتتىقتىرۋشى ولەگ بلوحين ەۋروپا ليگاسىنىڭ 4-ىرىكتەۋ راۋندىنىڭ ءبىرىنشى ويىنى وزدەرى ءۇشىن كەرەكتى ناتيجەنى بەرەتىنىنە سەنىمدى.
ۋكراينانىڭ بىرقاتار بۇقارالىق اقپارات قۇرالدارى كوماندالاردىڭ الاڭعا شىعاتىن ستارتتىق قۇرامدارى تۋرالى بولجام جاريالاپتى.
ولار مىناداي:
«اقتوبە»: سيدەلنيكوۆ, ارزۋمانيان, مۋلداروۆ, پريمۋس, بادلو, كوۆالچۋك, كاپادزە, حارابارا, گەينريح, حايرۋللين, داۆىدوۆ.
«دينامو»: كوۆال, گۋسەۆ, دراگوۆيچ, ۆيدا, ترەمۋليناس, ۆەلوزۋ, بەزۋس, ارۋنا, يارمولەنكو, لەنس, مبوكاني.
دامير قوجامقۇل.
PS. ماتچ بۇگىن استانا ۋاقىتىمەن 19-00 ساعاتتا كازسپورت تەلەارناسىنان تىكەلەي ەفير ارقىلى كورسەتىلەدى.
بىز اقتوبەلىكتەرگە "شاحتەردىڭ" تابىسىن قايتالۋدى تىلەيمىز.
