جۇمىستىڭ وڭايى جوق. بۇل – ءومىردىڭ ءوزى دالەلدەگەن اقيقات. الايدا, ءار جۇمىستىڭ وزىندىك قيىندىعى بار. سونداي قىزىعىنان گورى قيىندىعى باسىم جۇمىستىڭ ءبىرى – كەنشىلىك. قيىندىعى, جەر استىندا جۇمىس ىستەۋ ەكىنىڭ ءبىرىنىڭ قولىنان كەلە بەرمەيدى. بۇل جەردە ەڭبەك ەتۋ ءۇشىن ەڭ اۋەلى تەمىردەي ءتوزىم قاجەت. قىزىعى, قاتارلاس قۇربىلارىڭمەن بىرگە ەل يگىلىگىن ەسەلەۋگە ۇلەس قوساسىڭ.
جۇمىستىڭ وڭايى جوق. بۇل – ءومىردىڭ ءوزى دالەلدەگەن اقيقات. الايدا, ءار جۇمىستىڭ وزىندىك قيىندىعى بار. سونداي قىزىعىنان گورى قيىندىعى باسىم جۇمىستىڭ ءبىرى – كەنشىلىك. قيىندىعى, جەر استىندا جۇمىس ىستەۋ ەكىنىڭ ءبىرىنىڭ قولىنان كەلە بەرمەيدى. بۇل جەردە ەڭبەك ەتۋ ءۇشىن ەڭ اۋەلى تەمىردەي ءتوزىم قاجەت. قىزىعى, قاتارلاس قۇربىلارىڭمەن بىرگە ەل يگىلىگىن ەسەلەۋگە ۇلەس قوساسىڭ.
كەزىندە ەلباسىمىز ەڭبەك جولىن باستاعان تاۋ-كەن سالاسىندا بۇگىندە ابىرويمەن قىزمەت اتقارىپ, ەل يگىلىگى جولىندا ايانباي تەر توگىپ جۇرگەن قازاق جاستارى دا از ەمەس. سونداي جالىندى جاستىڭ ءبىرى – ەرلات مولداحانوۆ. ەرلات بۇگىندە «قازاقمىس» كومپانياسىنا قاراستى ەرتىس كەنىشىندە ۋچاسكە باستىعى قىزمەتىن اتقارىپ ءجۇر.
كۇرشىم اۋدانىنىڭ قاراتوعاي اۋىلىندا دۇنيەگە كەلگەن ەرلات قازىرگى ۋاقىتتا كەن يگەرۋ ءىسىنىڭ كانىگى مامانى بولعانىن ايتادى.
– بۇل جەردە 2006 جىلدان بەرى ەڭبەك ەتىپ كەلەمىن. ارينە, ەڭ العاش جۇمىسقا ورنالاسقان كەزىمدە وڭاي بولعان جوق. ءبىراز قينالعانىم دا راس. الايدا, جانىمداعى ارىپتەستەرىم جاڭادان كەلدىڭ دەپ جاتسىنباي بىلگەندەرىن ايتىپ, بىلمەگەنىمدى كورسەتىپ, دۇرىس باعىت-باعدار نۇسقاپ, كەنشىلىكتىڭ قىر-سىرىن ۇيرەتتى. ول كىسىلەرگە ايتار العىسىم شەكسىز, – دەيدى ەرلات.
كەنشى بولۋ اۋىلدا تۋىپ-وسكەن قارا سيراق قازاق بالاسىنىڭ ءوڭى تۇگىلى تۇسىنە دە كىرمەگەنى راس. الايدا, مۇنداي جۇمىستى بۇرىن-سوڭدى اتقارىپ كورمەسە دە ەڭبەكقور جاس جاڭا جۇمىسىنا بىردەن بەيىمدەلىپ, ۇرشىقشا ءيىرىپ اكەتەدى. مۇنى بايقاعان باسشىلىق ەرلاتتى 2009 جىلى كەن يگەرۋ شەبەرى (ماستەر) قىزمەتىنە تاعايىندايدى. قازىرگى ۋاقىتتا جالىندى جاس ۋچاسكە باستىعى قىزمەتىن جاۋاپكەرشىلىكپەن اتقارىپ ءجۇر.
– التى كۇن جۇمىس ىستەپ, ءبىر كۇن دەمالامىز. جۇمىس ۋاقىتىمىز ءونىم ءوندىرۋدىڭ كولەمىنە دە بايلانىستى. نەگىزىنەن تەحنيكامەن جۇمىس ىستەيمىز, رۋدانى ۆاگوندارگا تيەيمىز. قىزمەتكەرلەرگە ءوزىم باعىت-باعدار كورسەتىپ وتىرامىن. مۇنداعى جۇمىستىڭ دەنى تەحنيكا كۇشىمەن جۇزەگە اسادى. قول جۇمىسى اجەپتاۋىر جەڭىلدەدى دەۋگە بولادى. قازىرگى ۋاقىتتا باسشىلىق تەحنيكامەن جابدىقتاۋ جاعىنا ەرەكشە ءمان بەرۋدە. الاتىن جالاقىمىز دا جامان ەمەس. جالاقى كولەمى جوسپاردىڭ ورىندالۋىنا بايلانىستى. جوسپاردى اسىرا ورىنداساق, سىياقى الامىز. سوندىقتان قاي كەزدە دە ايانباي جۇمىس ىستەۋگە تالپىنامىز, – دەيدى ەرلات.
ەرلاتتىڭ ايتۋىنشا, مۇندا ەڭبەك قاۋىپسىزدىگىنە, قىزمەتكەرلەردىڭ جايلى جۇمىس ىستەۋىنە ەرەكشە كوڭىل بولىنەدى. سەبەبى, قاۋىپسىزدىك تابىستى جۇمىستىڭ كەپىلى.
ەرلات جەتەكشىلىك ەتەتىن ۋچاسكەدە التى بريگادا بار. ءار بريگادادا ون توعىز ادامنان. قىسقاسى, ەرلات جاس بولسا دا قول استىنداعى 80-90 ادامدى ورتاق جۇمىسقا جۇمىلدىرىپ, ۇجىمدا بەدەلى ارتىپ كەلەدى.
– ۇجىمداعى قىزمەتكەرلەردىڭ بارلىعى وتە ۇيىمشىل. ءاردايىم ءبىر جەڭنەن قول, ءبىر جاعادان باس شىعارىپ, جۇمىستىڭ ناتيجەلى بولۋى جولىندا ەشقايسىسى ايانىپ قالعان ەمەس. ارقايسىسى ءبىر بىرىنە ايرىقشا قۇرمەتپەن قارايدى. قازىرگى ۋاقىتتا اجەپتاۋىر تاجىريبە جيناقتاپ, جۇمىستىڭ قىر-سىرىنا قانىعىپ قالدىم. مۇندا جۇمىسقا كەلگەنىمە ەش وكىنبەيمىن, – دەيدى ەرلات مولداحانوۆ.
«اكە كورگەن وق جونار, شەشە كورگەن تون پىشەر» دەمەكشى, ەرلاتتىڭ بۇل جۇمىسقا كەلۋىنە اكەسى سەبەپشى بولىپتى. اكەسى بولاتحان ءۇش جىلداي كىزمەت ىستەگەن كورىنەدى. بۇگىندە ەڭبەكقور ەرلات اكە جولىن ابىرويمەن جالعاستىرىپ, كەن يگەرۋدىڭ ناعىز مامانىنا اينالدى...
ازامات ءابىل ۇلى.
وسكەمەن.
سۋرەتتە: ەرلات مولداحانوۆ وزات كەنشىلەر بريگاداسىمەن.