قازاق ۇلتتىق قىزدار پەداگوگيكالىق ۋنيۆەرسيتەتىنىڭ ستۋدەنتتەرى «WikiGap Kazakhstan» جوباسىنا قاتىسىپ, جەتىستىككە جەتكەن 100 قازاقستاندىق ايەلدى Wikipedia-عا ورنالاستىردى. بۇل تۋرالى وقۋ ورنىنىڭ ءباسپاسوز قىزمەتى حابارلايدى.
ونلاين ەنتسيكلوپەدياداعى گەندەرلىك الشاقتىقتى جويۋعا باعىتتالعان يگىلىكتى ءىس نيدەرلاندى كورولدىگىنىڭ قازاقستانداعى ەلشىلىگىنىڭ قولداۋىمەن قىزدار ۋنيۆەرسيتەتى جانىنداعى الەۋمەتتىك جانە گەندەرلىك عىلىمي-زەرتتەۋلەر ينستيتۋتىندا جۇزەگە استى.
شارانىڭ باستى ماقساتى – ەسىمى كوپشىلىك ءۇشىن بەيمالىم دەسە دە ءوز سالاسى بويىنشا تابىسقا جەتكەن نازىكجاندىلاردى كەڭىنەن ناسيحاتتاۋ, ينتەرنەت كەڭىستىكتە ولار تۋرالى اقپاراتتىڭ قولجەتىمدىلىگىن ارتتىرۋ.
«WikiGap Kazakhstan» جوباسى سەگىز باعىتتى قامتيدى. اتاپ ايتقاندا, ءبىلىم, عىلىم, ونەر, ساياسات, بيزنەس, مەديا, ۇكىمەتتىك ەمەس سەكتور مەن سپورت سالاسىنداعى تانىمال نازىكجاندىلار تۋرالى اقپارات Wikipedia عالامتور ەنتسيكلوپەدياسىنا قازاق, ورىس جانە اعىلشىن تىلدەرىندە ورنالاستىرىلدى. ۇيىمداستىرۋشىلاردىڭ ايتۋىنشا, اتالعان شاراعا ۋنيۆەرسيتەتتىڭ 50-گە جۋىق ستۋدەنتى تارتىلعان.
الەۋمەتتىك جوبانىڭ قورىتىندى جيىنى الماتى قالاسىنداعى SmartPoint ورتالىعىندا ۇيىمداستىرىلدى. وعان نيدەرلاندى كورولدىگىنىڭ قازاقستانداعى توتەنشە جانە وكىلەتتى ەلشىسى اندرە كارستەنس, قازاق ۇلتتىق قىزدار پەداگوگيكالىق ۋنيۆەرسيتەتىنىڭ رەكتورى گاۋحار الدامبەرگەنوۆا, جوبا اۆتورلارى مەن ستۋدەنتتەر قاتىستى.
– قازاقستاننىڭ ماقساتى – الەمدىك ۇردىستەن قالىپ قويماۋ. وسى ورايدا ماماندار مەن سالا قىزمەتكەرلەرى جاستاردى ءتۇرلى داعدىلارعا باۋلۋى قاجەت. اسىرەسە, IT سالاعا جەتە ءمان بەرگەن ابزال. ەلىمىزدە ءبىلىم الۋعا ۇمتىلاتىن, قابىلەتى مەن قارىمى جوعارى جاستار جەتكىلىكتى ەكەندىگىن ەرەكشە اتاپ وتكىم كەلەدى. قازاق ۇلتتىق قىزدار پەداگوگيكالىق ۋنيۆەرسيتەتى بولاشاق مامانداردىڭ شىعارماشىلىق الەۋەتىن كوتەرۋ, ولاردى جاڭا عىلىمي ىستەرگە باۋلۋ ارقىلى تالانتىن ۇشتاۋ ماقساتىندا كوپتەگەن ىرگەلى ىستەردى قولعا الىپ, جۇرگىزىپ كەلەدى. سونىڭ ءبىرى – ءبىلىم الۋشىلاردىڭ «WikiGap Kazakhstan» جوباسىنا قاتىسۋى. بۇگىندە بارشامىز باسەكەگە قابىلەتتى ۇرپاق تاربيەلەۋ ىسىنە ايرىقشا ءمان بەرىپ وتىرمىز. جالپى, ەلىمىزدەگى باستامالاردىڭ بارلىعى جاس بۋىننىڭ جارقىن بولاشاعى ءۇشىن قولعا الىنۋدا. جاستارىمىزدىڭ جان-جاقتى دامۋىنا جاعداي جاساۋ, ولاردىڭ ءوز سالاسى بويىنشا جەتىستىككە جەتۋىنە قولداۋ كورسەتۋ – ءبىزدىڭ باستى مىندەتىمىزدىڭ ءبىرى, – دەدى جيىندا ءسوز العان گاۋحار الدامبەرگەنوۆا.
سونىمەن قاتار باسقوسۋ بارىسىندا نيدەرلاندى كورولدىگىنىڭ قازاقستانداعى توتەنشە جانە وكىلەتتى ەلشىسى اندرە كارستەنس, «WikiGap Kazakhstan» جوباسىنىڭ مەنەدجەرى اسەلحان احمەتوۆا, الەۋمەتتىك جانە گەندەرلىك عىلىمي-زەرتتەۋلەر ينستيتۋتىنىڭ قىزمەتكەرى ماقپال دابىلتاەۆا ءىس-شارا تۋرالى ءوز پىكىرلەرىمەن ءبولىستى.
– WikiGap جوباسى ءتۇرلى سالاداعى ايەلدەر, ساراپشىلار مەن رولدىك مودەلدەر تۋرالى كوپتەگەن اقپاراتتاردى Wikipedia-عا قوسۋ ءۇشىن ءارتۇرلى ەلدەردەن جينالاتىن ادامداردىڭ ورتاق ەڭبەگى. عالامتوردا ايەلدەردىڭ الاتىن ورنىن جاقسارتۋ ءۇشىن الەمنىڭ 60-قا جۋىق ەلىندە جىل سايىن وسىنداي شارا ۇيىمداستىرىلادى. ءبىز تەڭ قۇقىلى عالامتور جاساپ, تەڭ قۇقىلى الەم قۇرعىمىز كەلەدى. سەبەبى گەندەرلىك تەڭدىك نيدەرلاندى مەن قازاقستان ساياساتىنىڭ ماڭىزدى باسىمدىقتارىنىڭ ءبىرى بولىپ تابىلادى, – دەدى اندرە كارستەنس.
جوباعا قاتىسقان ستۋدەنتتەر Wikipedia جەلىسىنە ماقالانى ورنالاستىرۋ ءۇشىن IT مامانداردىڭ ارنايى ترەنينگتەرىنەن ءوتىپ, اقىل-كەڭەستەرىن الدى. بۇل باستامانىڭ جاستار ءۇشىن پايداسى ايتارلىقتاي كوپ. ولار ينتەرنەت كەڭىستىكتە ءبىلىمىن ارتتىرىپ, كاسىبيلىگىن تەرەڭدەتۋگە مۇمكىندىك الادى.
– قىزدار ۋنيۆەرسيتەتىندە ءبىلىم الاتىن ستۋدەنتتەردىڭ باسىم بولىگى اۋىلدان كەلگەن قاراكوزدەر. ولار وقۋلارىن بىتىرگەننەن كەيىن وزدەرىنىڭ وڭىرلەرىنە قايتادى جانە دە تەك قانا مۇعالىم رەتىندە ەڭبەك ەتپەي, سونىمەن قاتار كوپتەگەن زاماناۋي جاڭاشىلدىقتاردىڭ باستاماشىسى بولادى, – دەيدى وقۋ ورنىنىڭ ستراتەگيالىق دامۋ جانە حالىقارالىق ىنتىماقتاستىق جونىندەگى پرورەكتورى ءلاززات بولەباەۆا.
ايتا كەتەيىك, WikiGap جوباسى WikiMediaSweden جانە شۆەتسيانىڭ سىرتقى ىستەر مينيسترلىگى باستاماسىمەن جاسالعان عالامدىق كامپانيانىڭ ءبىر بولىگى بولىپ سانالادى.
– Wikipedia – پايدالانۋشىلارمەن جاسالعان الەمدەگى ەڭ ءىرى ونلاين-ەنتسيكلوپەديا. اتالعان ونلاين كىتاپحانادا ەر ادامدار تۋرالى ماقالالار ايەلدەر جايىنداعى اقپاراتتان ءتورت ەسە كوپ. ءبىز بۇل كورسەتكىشكە وزگەرىس ەنگىزۋدى قالايمىز, – دەپ اتاپ ءوتتى باسقوسۋدا «WikiGap Kazakhstan» جوباسىنىڭ مەنەدجەرى اسەلحان احمەتوۆا
بۇگىندە اتالعان شارا الەمنىڭ 60-تان استام مەملەكەتىندە جۇزەگە اسىپ كەلەدى. قازىرگى كۇنگە دەيىن جوباعا قاتىسۋشى 2500 ادام Wikipedia-عا 30-دان استام تىلدە 36 مىڭعا جۋىق ماقالا ەنگىزىپتى. ولاردىڭ باسىم بولىگى جاستاردىڭ قاتىسۋىمەن جۇزەگە اسىرىلعان.