«ماسكەۋ مەن بەيجىڭدە COVID-19 كوروناۆيرۋستىق پنەۆمونيا ەپيدەمياسىنا قارسى بىرلەسكەن كۇرەس بارىسى تالقىلاندى. بۇگىن رەسەيدەگى قىتاي ەلشىلىگىندە «روسپوترەبنادزور» باسشىسى اننا پوپوۆانىڭ قاتىسۋىمەن ءتيىستى كونسۋلتاتسيالار ءوتتى», دەپ حابارلادى «رەسەي – قىتاي: باستى جاڭالىقتار» موبيلدىك قوسىمشاسىنىڭ اقپاراتتىق قىزمەتى.
«روسپوترەبنادزور» باسشىسى ءبىر-بىرىمەن قاتار قونعان ەكى ەلدىڭ كوروناۆيرۋستىڭ جاڭا ءتۇرىنىڭ تارالۋىنا قارسى ءىس-قيمىل ارەكەتتەرىنە «كەمەدەگىنىڭ جانى ءبىر» دەپ باعا بەردى. رەسەيدىڭ اۋرۋدىڭ وسى تۇرىمەن قارسى كۇرەستە قىتايمەن ىنتىماقتاستىقتى ودان ءارى نىعايتۋعا دايىن ەكەندىگىن باسا ايتتى.
ونىڭ ايتۋىنشا, قىتاي COVID-19-مەن كۇرەسۋ شارالارىنىڭ تيىمدىلىگىن دالەلدەدى, رەسەي وسى باعىتتاعى قىتاي تاجىريبەسىن مۇقيات زەرتتەپ, قاپەرگە الىپ جاتقانىن ارىپتەستەرىنىڭ ەسىنە سالىپ ءوتتى.
پوپوۆا حانىم رەسەيدىڭ اۋرۋدىڭ تارالۋىن بولدىرماۋ ءۇشىن قاتاڭ شارالار قابىلداعانىن ەسكە سالدى. COVID-19 پروفيلاكتيكاسى بويىنشا سانيتارلىق شارالار اياسىندا قازىرگى ۋاقىتتا رەسەي فەدەراتسياسىنىڭ اۋماعىندا 30 مىڭعا جۋىق ادام باقىلاۋدا تۇر. ولاردىڭ ۇشتەن ءبىرى عانا قىتاي ازاماتتارى . سونداي-اق, پوپوۆا حانىم قىتاي ەلشىلىگىن رەسەيدەگى قىتاي ازاماتتارىنا ەپيدەمياعا قارسى ەرەجەلەر تۋرالى ەسەپ بەرىپ, سانيتارلىق جۇمىستارمەن بەلسەندى اينالىسۋعا شاقىردى. قىتايدىڭ رەسەيدەگى ەلشىسى چجان حانحۋي قىتايداعى ىندەتتىڭ شارىقتاۋ شەگىنىڭ ءوتىپ كەتكەنىن ەسكە ءتۇسىرىپ, «رەسەي قىتاي ازاماتتارىنىڭ كىرۋىنە قاتىستى شەكتەۋلى شارالاردى جاقىندا تۇزەتەدى نەمەسە الىپ تاستايدى» دەگەن ءۇمىتىن ءبىلدىردى.
ديپلومات قىتايدىڭ رەسەي قابىلداعان سانيتارلىق-كارانتيندىك شارالارعا تۇسىنىكتىكپەن قاراعانىن دا ايتىپ ءوتتى. ونىڭ ايتۋىنشا, ەلشىلىك ءوز ارنالارى ارقىلى رەسەيدەگى قىتاي ازاماتتارىنا قۇزىرلى ورگانداردىڭ قابىلداعان شەشىمدەرى تۋرالى اقپاراتپەن قۇلاعداندىرىپ, قولدانىستاعى ەرەجەلەردى ساقتاۋ قاجەتتىگىن ەسكەرتىپ وتىراتىنىن دا ەسكە سالىپ ءوتتى.
وسىدان 2 كۇن بۇرىن, 28 اقپاندا قىتايدىڭ رەسەيدەگى ديپلوماتيالىق ميسسياسى ازاماتتارىن «ەرەجەلەردى ساقتاۋعا جانە تەكسەرۋلەر مەن كارانتيندەر بارىسىندا بيلىك وكىلدەرىمەن ىنتىماقتاستىققا» شاقىردى.
«رەسەي تارابى قحر-مەن سىرتقى ساياساتتا باسىمدىققا يە ەكەندىگىن, رەسەي قىتايمەن دوستىق پەن ىنتىماقتاستىقتى جوعارى باعالايتىنىن باسا ايتادى. ماسكەۋدەگى ەپيدەمياعا قارسى شارالار تەك قحر ازاماتتارىنا عانا ەمەس, بارىنە دە, قاتىستى. سوندىقتان قۇزىرلى ورىندار تالاپ ەتكەن ساقتىق شارالارىن ساقتاۋ مىندەتتى », دەلىنگەن قىتاي ەلشىلىگىنىڭ حابارلاماسىندا.
ماسكەۋدە تۇراتىن كوپتەگەن قىتايلار بيلىكتىڭ ەپيدەمياعا قارسى شارالارىنا تۇسىنىكتىكپەن قاراپ وتىر. ماسكەۋدەگى ادەبيەت جانە ونەر ۋنيۆەرسيتەتىنىڭ ستۋدەنتى چجوۋ نەننىڭ ايتۋىنشا, جاڭا جىل مەرەكەسىنەن قحر-دان ورالعان 150-گە جۋىق ستۋدەنتتى ەكى اپتالىق باقىلاۋدا ۇستاۋعا شەشىم شىعارىلعان.
«جاتاقحانانىڭ ءۇش قاباتى كارانتيندىك ايماققا ءبولىندى, كارانتيننەن كەيىن ستۋدەنتتەر 2 ناۋرىزعا دەيىن كومەندانتقا بارىپ, دەنە قىزۋىن كۇنىنە ەكى رەت تەكسەرتىپ وتىرۋعا مىندەتتى. ءبىز مۇنىڭ قاجەتتىلىكتەن قابىلدانعان شەشىم ەكەنىن بىلەمىز» دەيدى چجوۋ.
وسىعان دەيىن ماسكەۋدەن تاراپ جاتقان عالامتور كوزدەرىندە «قىتاي ازاماتتارىنا كولىكتى پايدالانۋعا تىيىم سالىنعانى, مەترو ۆاگوندارى مەن ميكرواۆتوبۋستارعا كىرۋگە رۇقسات بەرىلمەگەنى» تۋرالى اقپارات پايدا بولعانىن بىلەمىز. بۇل اقپاراتتى كوپتەگەن باسىلىمداردىڭ باس تاقىرىپ رەتىندە قولدانعانىن دا كوزىمىز كوردى.
«ماسكەۋ بيلىگى, ارينە, قىتايلاردىڭ قالا اينالاسىندا قوزعالىسىنا قويىلعان شەكتەۋلەرگە قاتىستى ەشقانداي بۇيرىق بەرگەن جوق. ءبىزدىڭ قۇقىمىز شەكتەلمەگەنىن تاعى دا ايتقىم كەلىپ وتىر. كەيبىر شەشىمدەردىڭ ساقتىق شارالارىن ساقتاۋ ءۇشىن قابىلداعانىن تۇسىنەمىز » دەيدى چجوۋ.
سونداي-اق چجوۋ حانىم الەۋمەتتىك جەلىدەگى جاريالانىپ جاتقان اقپاراتتارعا سەنۋگە بولمايتىنىن دا ءتۇسىندىرىپ ءوتىپتى.
«ماسكەۋدە مەن وقىعان ۋنيۆەرسيتەتتە تەك رەسەيلىك عانا ەمەس, قازاقستاندىق, وزبەكستاندىق ستۋدەنتتەر وقيدى. ولار قىتاي حالقى باستان كەشىپ جاتقان اۋىر سىناققا تۇسىنىستىكپەن قارايدى, ونى جەڭىپ شىعارىنا دا سەنەدى. قازىر ماسكەۋ جاستارى «دوستىقتى ەمەس, ۆيرۋستى وقشاۋلايمىز» دەگەن تۇسىنىكپەن ءومىر ءسۇرىپ جاتىر» دەپ ءسوزىن تۇيىندەدى چجاۋ.