الماتىنىڭ ىرگەسىندەگى بورالداي ەلدى مەكەنىندە ورنالاسقان ۇلتتىق قاۋىپسىزدىك كوميتەتىنە قاراستى شەكارا قىزمەتى №2022 اسكەري بولىمىندە وزگە ۇلت وكىلدەرىنىڭ قازاق ەلىنە دەگەن ىقىلاس-العىسىن كوپتىڭ الدىندا, جاريالى تۇردە بىلدىرۋىنە مۇمكىندىك كەزدەسۋ ءوتتى.
تۇڭعىش پرەزيدەنت نۇرسۇلتان نازارباەۆتىڭ جارلىعىمەن اتالىپ وتەتىن العىس ايتۋ كۇنىنىڭ ءمانى ەرەكشە. بۇل – تاعدىر تالكەگىمەن قازاقستان جەرىنە ەرىكسىز قونىس اۋدارعان ءتۇرلى ەتنوس وكىلدەرىنىڭ قۇتتى قونىسىنا اينالعان قاسيەتتى قازاق جەرى مەن قوناقجاي قازاق حالقىنا تەرەڭ تاعزىمنىڭ بەلگىسى. سونىمەن قاتار اعا ۇرپاق وكىلدەرىنە, اتا-انا, تۋىس-باۋىرعا شىنايى سەزىممەن ريزاشىلىق بىلدىرەتىن كۇن. اسكەري ءبولىمنىڭ قىزمەتكەرى, مايور ايدىن ءتۇسىپجانوۆ ەڭ الدىمەن ءوزى قىزمەت ەتەتىن ءبولىمنىڭ جۇمىسى تۋرالى تانىستىرىپ ءوتتى. ەلىمىزدىڭ وڭتۇستىگى مەن سولتۇستىگى, باتىسى مەن شىعىسىنداعى شەكاراسىندا توتەنشە جاعداي ورىن السا, باس –اياعى بىرەر ساعاتتا بارىپ, قوسىمشا كۇش رەتىندە جۇمىلۋعا ماماندانعان اسكەري ءبولىمنىڭ ءاربىر ءساتى سىن-قاتەرلەر مەن تاۋەكەلدەردەن تۇرادى ەكەن. ء«بىزدىڭ جۇمىسىمىزدىڭ ءوزى قۇپيا. ءبىز مۇنى جاريالى تۇردە ايتا المايمىز. مۇندا ەلىنىڭ بىرتۇتاستىعىنا ءومىرىن ارناعان ەرلەردىڭ ەسىمىن ەلى ءبىلۋى مىندەتتى ەمەس» دەپ سانايتىن بۇگىنگى زاماننىڭ باتىرلارى قىزمەتتە دەپ سەنىممەن ايتا الامىن. مۇندا اسىرە پاتريوتيزممەن ادا, ءوزىن-ءوزى جارنامالاۋعا جانى قاس, بىراق ءومىرىن, باسىنىڭ اماندىعىن ەلدىڭ بىرتۇتاستىعى مەن قاۋىپسىزدىگىنەن بولە-جارا قاراي المايتىن ازاماتتار ەلدىڭ شەبىندە ءجۇر» دەپ اتاپ ءوتتى مايور ايدىن ءتۇسىپجانوۆ.
وسى جيىنعا ىرگەدەگى الماتىدان كەلگەن قازاقستان حالقى اسسامبلەياسىنىڭ مۇشەلەرى ءسوز الىپ, العىس ايتۋ كۇنى قازاقستاندىق ءپاتريوتيزمنىڭ, دوستىق پەن بىرلىگىمىزدىڭ, مادەني سان الۋاندىعىمىزدىڭ جارقىن كۇنى ەكەندىگىن تىلگە تيەك ەتتى. تۇرىك مادەني ورتالىعىنىڭ وكىلى, قازاقباي كاسيموۆ العىس ايتۋ كۇنىن مەرەكەلەۋدىڭ جاڭا ءداستۇرى «ماڭگىلىك ەل» بىرلىگىن ورتاق تاريح جانە تاريحي سانا نەگىزىندە نىعايتۋ مەن دامىتۋدى كوزدەيتىنىن ايتتى.
«وسى كۇن تاعدىر توعىستىرعان قازاقستاننىڭ كوپەتنوستى حالقىنىڭ ورتاق تاريحىن قۇرمەتتەيتىن, قايىرىمدىلىق داستۇرلەرىن, الەۋمەتتىك ىنتىماقتى جانە ءوزارا كومەك كورسەتۋدى قولدايتىن كۇن. بۇل – رەپرەسسيا مەن جەر اۋدارۋ جىلدارىندا ءبىزدىڭ حالىق كورسەتكەن مەيىرىمدىلىك پەن ادامگەرشىلىك سىندى رۋحاني داستۇرلەر كۇنى» دەپ اتاپ ءوتتى «احىسكا» تۇرىك ەتنومادەني ورتالىعى توراعاسىنىڭ ورىنباسارى قازاقباي كاسيموۆ.
سونداي-اق, ول العىس ايتۋ كۇنى قازاقستاندىق ءپاتريوتيزمنىڭ, دوستىق پەن بىرلىگىمىزدىڭ, مادەني سان الۋاندىعىمىزدىڭ جارقىن كۇنى ەكەندىگىن تىلگە تيەك ەتتى.
ايتپاقشى, قازاقستاندا تۇراتىن 130 ۇلت وكىلدەرىنىڭ اراسىندا اۋعان ۇلتىنىڭ دا وكىلدەرى بارىن وسى جيىندا بىلدىك. ولاردىڭ ءتىپتى «ارياننا» دەپ اتالاتىن مادەني ورتالىعى جۇمىس ىستەيتىنىن بىلگەندە تابالدىرىعىنان اتتاعان بىرەر ۇلتقا دا مادەني ورتالىق اشىپ بەرۋگە اسىق تۇراتىن «قوناقجايلىمىزعا» تاعى دا ءبىر كوز جەتكەردىك. وسى ورتالىقتىڭ باسشىسى ۆوستوك احماتتۋللا وسىدان بىرنەشە جىل بۇرىن اۋعانىستاننان كەلىپ, الماتىدا تۇراقتاپ قالىپتى. كەيىن ءوزى ءتارىزدى قازاق جەرىنە كەلىپ, تۇراقتاپ قالعان اۋعاندىقتاردىڭ باسىن قوسىپ, قازاقستان حالقى اسسامبلەياسىنا تىركەلگەن.
«قازاقستان حالقى اسسامبلەياسى قۇرىلعان كۇن – 1 ناۋرىزدى جىل سايىن بارلىق ەتنوستاردىڭ ءبىر-بىرىنە جانە مەيىرباندىق تانىتىپ, ول ادامداردى ءوز تۋعانىنداي قابىلداعان قازاقتارعا العىس ايتۋ كۇنى رەتىندە اتاپ ءوتۋ ادىلەتتى بولار ەدى. وسى كۇن ءبىزدى ءبىر-بىرىمىزگە بۇرىنعىدان دا جاقىنداستىرا تۇسپەك. بۇل كۇندى مەن مەيىرىمدىلىكتىڭ, بۇكىل قازاقستاندىقتاردىڭ ءبىر بىرىنە دەگەن دوستىعى مەن ماحابباتىنىڭ جارقىن مەرەكەسى دەپ قابىلدايمىن. العىس ايتۋ كۇنى – قازاقستان حالقىن ماڭگىلىككە بىرىكتىرۋگە باعىتتالعان «ماڭگىلىك ەل» جالپىۇلتتىق پاتريوتتىق يدەياسىنىڭ, ەلىمىزدەگى بارلىق ۇلت پەن ۇلىستى ءبىر شاڭىراق استىنا توپتاستىراتىن قازاقستان حالقى اسسامبلەياسىنىڭ كۇنى, – دەپ اتاپ ءوتتى ۆوستوك احماتتۋللا.
جيىن سوڭى اسكەري جاۋىنگەرلەردىڭ اسسامبلەيا مۇشەلەرىمەن ەركىن اڭگىمە سۇحباتىمەن جالعاستى.