ەلوردادا كيبەرقاۋىپسىزدىك سالاسىنداعى الەمدىك كوشباسشىلاردىڭ ءبىرى Trend Micro مەن قازاقستاندىق T&T Security كومپانياسى عىلىمي جانە تەحنيكالىق ارىپتەستىكتى باستاۋ تۋرالى كەلىسىمگە قول قويدى.
جيىن بارىسىندا كومپانيا وكىلدەرى مەن قاتىسۋشىلار قازىرگى كەزدەگى مەملەكەتتىك مەكەمەلەر, ۇيىمدارعا قاتىستى اقپاراتتىق قاۋىپسىزدىك پەن ونىڭ تۇرلەرى تۋرالى ءسوز قوزعادى. سونىمەن بىرگە اتالعان سالاداعى قولدانىلىپ جۇرگەن جۇيەنىڭ كەمشىلىكتەرى, حالىقارالىق جانە قازاقستاندىق كومپانيالاردىڭ «كيبەرقالقان» جۇيەسىن نىعايتۋ جونىندەگى بىرلەسكەن جۇمىسى تۋرالى اڭگىمەلەدى.
نەگىزى 2013 جىلى قالانعان T&T Security كيبەر قاۋىپتەردىڭ جاڭا بۋىنىنا قارسى كۇرەسكە ارنالعان قۇرالداردى دايىنداۋعا ماماندانعان كومپانيا. ەلىمىزدە تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنىڭ قولداۋىمەن جۇمىس ىستەۋدە. ارىپتەستىك اياسىندا تاراپتار قازاقستان اۋماعىندا اقپاراتتىق قاۋىپسىزدىك سالاسىنداعى بىرلەسكەن جوبالار مەن باستامالاردى دايىنداۋعا جانە جۇزەگە اسىرۋعا, سونداي-اق قولدا بار شەشىمدەردى تەرەڭ تەحنولوگيالىق بىرىكتىرۋگە باعىتتاۋدى جوسپارلاپ وتىر.
تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنىڭ اقپاراتتىق قاۋىپسىزدىك كوميتەتى توراعاسىنىڭ ورىنباسارى رۋسلان ابدىقالىقوۆ «مۇنداي ارىپتەستىكتىڭ ءوزى «قازاقستاننىڭ كيبەرقالقانى» باعدارلاماسى جۇمىسىنىڭ ناتيجەسى دەپ ەسەپتەيمىن. بۇل ەلدىڭ اقپاراتتىق قاۋىپسىزدىگىنىڭ نىعايۋىنا قىزمەت ەتەدى. ودان بولەك ەلىمىزدى الەمدىك قوعامداستىققا جاڭا قىرىنان, ياعني كيبەرقاۋىپسىزدىك بويىنشا ساپالى شەشىمدەردىڭ ءوندىرۋشىسى رەتىندە تانىتادى. سونىمەن قاتار بۇل باستاما قازاقستاندىق Iت-ونىمدەردىڭ ەكسپورتىنا, كەرىسىنشە الەمدىك برەندتەردىڭ قازاقستاندىق نارىققا كىرۋىنە جول اشادى», دەدى مامان.