قالا كىتاپحانالارىنىڭ وقۋ زالدارىنا كەلۋشىلەردى كوپتەپ تارتۋ ءۇشىن ەلوردادا زاماناۋي كىتاپحانا ديزاينى ۇسىنىلدى. مادەنيەت جانە سپورت باسقارماسىنىڭ باسشىسى نۇرلان سىدىقوۆ كىتاپحانا ديزاينى تۋرالى پىكىرىمەن ءماسليحات دەپۋتاتتارىمەن ءبولىستى, دەپ حابارلادى قالا اكىمدىگىنىڭ ءباسپاسوز قىزمەتى.
نۇرلان سىدىقوۆتىڭ ايتۋىنشا, قازىر ەلوردادا مەملەكەتتىك جانە جەكە يەلىكتەگى 20 كىتاپحانا بار. كىتاپ قورى 700 مىڭ دانانى قۇرايدى. ستاتيستيكاعا سايكەس, جىلىنا 70 مىڭعا جۋىق تۇراقتى وقىرمان كىتاپحانالارعا بارادى. وقىرماندار سانى – 540 مىڭ ادام. بۇگىنگى تاڭدا باسقارما الدىندا زاماناۋي ديزاينەرلىك شەشىمدەردى ەنگىزۋ ارقىلى كىتاپحانا جەلىسىن تۇرلەندىرۋ مىندەتى تۇر. وسى يدەيالاردى ىسكە اسىرۋ بوگەنباي باتىر داڭعىلىنداعى 1000 شارشى مەترلىك ەسكى كىتاپحانا عيماراتىنان باستالادى. اتالمىش كىتاپحانا كۇنىنە مىڭ وقىرمانعا دەيىن قابىلداي الادى, قازىر ءبىلىم ورداسىنا ءبىر كۇندە 50-60 ادام كەلەدى. «وقۋ زالى 5-10 %-عا عانا جۇمىس جاسايدى. كىتاپحانا كولەمى ۇلكەن, سوندىقتان وقىرمانداردى تارتۋىمىز كەرەك. وسىعان ۇقساس جوبا باسقا قالالاردا ىسكە اسىرىلدى.
ماسەلەن, الماتىدا بالالار كىتاپحاناسى زاماناۋي ۇلگىدە جاڭارىپ شىقتى. ەگەر بۇرىن وعان ورتا ەسەپپەن 40 ادام كەلسە, قازىر كەلۋشىلەر سانى 1400-گە جەتتى», - دەدى نۇرلان سىدىقوۆ. جوبانىڭ ەسكيزدەرى بويىنشا ءداستۇرلى كىتاپحانالار فورماتىنان الشاقتاۋ تۋرالى شەشىم قابىلداندى. ول بويىنشا زاماناۋي زالدار ىڭعايلى ورىندىقتارى, دەمالۋ الاڭدارى مەن تاماقتانۋ بولمەلەرى بار كوۆوركينگ ورتالىقتارىنا ۇقسايدى. سونىمەن قاتار, كىتاپحانا ينتەرەر جاراقتارىمەن تولىقتىرىلىپ, اشىق تۇستەرمەن بەزەندىرىلگەن. ءماسليحات دەپۋتاتى امان ايۋپوۆ ءوز سوزىندە وقىرمانداردى تارتۋدىڭ باستى ولشەمى رەتىندە ديزاين ەمەس, كىتاپحانا مازمۇنى جانە قىزىقتى ادەبيەتتەر بولۋى كەرەك دەگەن پىكىر ءبىلدىردى.
«كىتاپ تولتىرۋ تۇرعىسىنان حالىقارالىق تاجىريبەنى قولدانۋىمىز كەرەك. كوركەم ادەبيەت پەن تەحنيكالىق ادەبيەتتەردى قامتيتىن جاقىن, الىس شەتەل كىتاپحانالارىنا قوسىلۋعا بولادى. قازىرگى تاڭدا بىزدە تەحنيكالىق كىتاپتاردىڭ ازدىعى بايقالادى. سونىمەن قاتار, كوپتەگەن وقۋ ورىندارى وقۋلىقتاردىڭ كەز-كەلگەن تۇرىنە قول جەتكىزە المايدى. ەگەر باسقا ەلدەردەگى كىتاپحانالار قولجەتىمدى بولسا, اۋديتوريانىڭ قىزىعۋشىلىعى ارتادى», - دەدى ول.
نۇرلان سىدىقوۆ كىتاپ قورى ءجيى جاڭارتۋ مۇمكىندىگى بولماعانىن اتاپ ءوتتى. ونىڭ ايتۋىنشا, جىل سايىنعى جازىلىم بولسا دا, كىتاپتار قازىرگى زامانعى تالاپتارعا ساي كەلمەيدى.
ء«بىز جىل سايىن بەلگىلى ءبىر قاراجات ءبولىپ, ادەبيەتتەردى ساتىپ الۋىمىز كەرەك. سونىمەن قاتار كىتاپتاردى قايتا جازىپ شىعىپ, ءارتۇرلى جاستاعى وقىرماندار اراسىندا تانىمال ادەبيەتتەرگە تالداۋ جاساۋىمىز كەرەك. ءبىزدىڭ ماقساتىمىز – مەملەكەتتىك تىلدەگى كىتاپ قورىن كوبەيتۋ. بۇگىنگى تاڭدا ادەبيەتتىڭ تەك 28%-ى مەملەكەتتىك تىلدە, قالعان كىتاپ قورى ورىس تىلىندە. سوندىقتان ءبىز بۇل كورسەتكىشتى تەڭەستىرۋىمىز كەرەك. بۇل باعىتتا جاڭا تاسىلدەر جەتكىلىكسىز, بىراق اتالمىش ماسەلە بويىنشا تاجىريبە الماسۋ ءۇشىن شەتەلگە قىزمەتكەرلەردى جىبەرۋگە بولادى», - دەدى باسقارما باسشىسى.
دەپۋتاتتار بۇل باعىتتا دەنساۋلىق ساقتاۋ, ءبىلىم بەرۋ جانە الەۋمەتتىك قورعاۋ سالالارىنىڭ وكىلدەرىمەن بىرلەسىپ جۇمىس جاساۋدى ۇسىندى. وسىلايشا, مەديتسينالىق تاقىرىپتاعى كىتاپ كورمەلەرىن ەمحانالاردا وتكىزۋگە بولادى. بىراق بۇل ءۇشىن باسشىلىق تيىمدىلىكتىڭ نەگىزگى كورسەتكىشتەرىن انىقتاي وتىرىپ, جۇمىس تۇجىرىمداماسىن جاساۋى كەرەك.