نۇر-سۇلتان قالاسىنداعى ەۋرازيالىق ينتەگراتسيا ينستيتۋتىندا «ۇلتتىق قوعامدىق سەنىم كەڭەسى: تالدامالىق زەردەلەۋ» ساراپتامالىق بايانداماسىنىڭ تۇساۋكەسەرى ءوتتى.
وعان ۇلتتىق قوعامدىق سەنىڭ كەڭەسىنىڭ مۇشەلەرى ازاماتحان ءامىرتاي, تالعات قاليەۆ, مۇرات ابەنوۆ, پرەزيدەنت جانىنداعى ستراتەگيالىق زەرتتەۋلەر ينستيتۋتىنىڭ وكىلدەرى الۋا جولدىبالينا مەن مادينا نۇرعاليەۆا, باق وكىلدەرى قاتىستى.
جيىندا اتالعان ينستيتۋتتىڭ ديرەكتورى, ساياساتتانۋشى ەرلان سايروۆ ۇلتتىق قوعامدىق سەنىم كەڭەسى جۇمىسىنىڭ شىنايى باعاسىن بەرەتىن زەرتتەۋ تاقىرىبىنىڭ ماڭىزدىلىعىنا توقتالدى.
– ەلىمىزدە دەموكراتياعا دەگەن تالاپ-سۇرانىس ارتا ءتۇستى. وزدەرىڭىز بىلەتىندەي, كەيىنگى ەكى جىلدىڭ مۇعدارىندا كوزقاراستاردىڭ ءار الۋاندىعىندا ۇلكەن وزگەرىس بار. وسى سەرپىلىسكە جاۋاپ رەتىندە وتكەن جىلى ۇلتتىق قوعامدىق سەنىم كەڭەسى قۇرىلعان بولاتىن. اتالعان كەڭەس جارتى جىلدا قانداي جۇمىس اتقارىپ, قوعامعا قانداي سەرپىن بەردى؟ سونداي-اق قازاقستانداعى دەموكراتيا ماسەلەسىنە نەمەسە ەركىندىك, بوستاندىق يندەكسىنە قاتىستى حالىقارالىق دارەجەدە قانداي جاقسى اسەر بەرگەنى جونىندە ءبىراز ساراپتاما جۇمىستارى كەرەك, – دەدى ە.سايروۆ.
ونىڭ ويىنشا, بۇل وتە ماڭىزدى. سەبەبى ۇلتتىق كەڭەس ارقىلى پرەزيدەنت قاسىم-جومارت توقاەۆ مەملەكەت پەن قوعام اراسىنداعى ءوزارا سەنىم شەڭبەرىن كەڭەيتۋدى, اشىق ديالوگ الاڭىن قۇرۋ اياسىندا شەشىم قابىلداۋدى نازارعا الىپ وتىر. قوعامنىڭ بۇگىنگى ءرولىن كۇشەيتىپ, قازاقستاندىق الەۋمەتتىڭ ساياسي ماڭىزىن ارتتىرۋعا بىرقاتار قادام جاسالۋدا. وسىلايشا ۇلتتىق قوعامدىق سەنىم كەڭەسى مەملەكەت پەن قوعامنىڭ بارلىق ءومىر سالالارىن رەفورمالاۋدا شوعىرلانعان شەشىمدەردى جاساۋشى قۇرالعا اينالدى.
باياندامادا ۇلتتىق كەڭەستىڭ قالىپتاسۋىنىڭ نەگىزگى كەزەڭدەرى اتالدى. بۇل كەڭەستىڭ بۇعان دەيىنگى ديالوگ الاڭدارىنان ەرەكشەلىكتەرى مەن ايىرماشىلىقتارى ەسكەرىلىپ, وقيعالاردىڭ حرونولوگيالىق دامۋى جاساقتالۋدا. سونداي-اق الەۋمەتتىك زەرتتەۋلەردىڭ ناتيجەلەرى ۇسىنىلۋدا.
– ماسەلە ديناميكادا ەمەس, پروتسەستىڭ ءجۇرىپ جاتقانىندا. ۇلتتىق كەڭەستىڭ التى ايداعى جۇمىسى تۋرالى ايتىپ وتىرمىن. جارتى جىلدا ايتارلىقتاي جۇمىس اتقارىلدى. الايدا جالپى ساياسي مادەنيەت قالىپتاسپاي وتىر. ونى وزگەرتۋ قاجەت. ءبىر مىسال كەلتىرەيىن. بۇگىندە بەيبىت جيىندار تۋرالى ءتۇرلى پىكىر ايتىلۋدا. دەموكرات بولۋ ءۇشىن ءتۇرلى پىكىرلەردى تىڭداۋعا دايىن بولۋ قاجەت, – دەدى ت.قاليەۆ.